ការមានកន្លែងស្នាក់នៅជាកម្មសិទ្ធិខ្លួនឯង គឺជាក្តីសុបិនរបស់មនុស្សគ្រប់រូប ហើយគ្មានអ្នកណាម្នាក់ចង់ជួលផ្ទះ ឬជួលបន្ទប់រស់នៅអស់មួយជីវិតឡើយ ។ មនុស្សជាច្រើនគិតចង់ទិញផ្ទះ ឬខុនដូជារបស់ខ្លួន
ការមានកន្លែងស្នាក់នៅជាកម្មសិទ្ធិខ្លួនឯង គឺជាក្តីសុបិនរបស់មនុស្សគ្រប់រូប ហើយគ្មានអ្នកណាម្នាក់ចង់ជួលផ្ទះ ឬជួលបន្ទប់រស់នៅអស់មួយជីវិតឡើយ ។ មនុស្សជាច្រើនគិតចង់ទិញផ្ទះ ឬខុនដូជារបស់ខ្លួន ប៉ុន្តែនៅពេលមានប្រាក់គ្រប់គ្រាន់តែងតែជួបបញ្ហាក្នុងការជ្រើសរើស ថា គួរទិញមួយណាល្អជាង ។ ថ្ងៃនេះ យើងលើកយក១០ចំណុចមកប្រៀបធៀប វានឹងអាចជួយលោកអ្នកក្នុងការជ្រើសរើសទិញផ្ទះ ឬខុនដូបែបណាដែលសមស្របបំផុត ។
១-ទីតាំង ៖
ខុនដូ នឹងមានប្រៀបក្នុងរឿងនេះច្រើនជាងផ្ទះ ព្រោះការស្វែងរកដីដើម្បីអភិវឌ្ឍន៍គម្រោងខុនដូភាគច្រើន គឺស្ថិតនៅជិតផ្លូវ ឬចូលទៅក្នុងមិនជ្រៅប៉ុន្មាន ដែលងាយស្រួលធ្វើដំណើរ និងសន្សំសំចៃពេលវេលាច្រើនជាងផ្ទះ ខណៈផ្ទះមានទីតាំងនៅជាយក្រុង ហើយត្រូវចូលទៅជ្រៅ ។ ប៉ុន្តែទោះយ៉ាងណា ប្រសិនបើផ្ទះនោះស្ថិតនៅក្នុងក្រុង វាងាយស្រួលធ្វើដំណើរ តែក៏មានតម្លៃខ្ពស់ផងដែរ ។
២-ចំណតរថយន្ត ៖
ការជ្រើសរើសផ្ទះ យ៉ាងណាក៏មានចំណតរថយន្តផ្ទាល់ខ្លួននៅក្នុងផ្ទះដែរ ។ នៅពេលបើករថយន្តត្រឡប់មកផ្ទះយប់ជ្រៅប៉ុនណា ក៏មានកន្លែងចតរថយន្ត មិនចាំបាច់ចំណាយពេលរកកន្លែង បន្ទាប់ពីចតរួចរាល់ អ្នកអាចដើរចូលក្នុងផ្ទះបាន ។ ចំណែកខុនដូមានចំណតរថយន្តតិច ព្រោះជាតំបន់ដែលត្រូវចែករំលែកគ្នា ។ ក្នុងមួយគម្រោងមានចំណតរថយន្តលើសពី៥០%នៃចំនួនបន្ទប់ ដូច្នេះ វាអាចគ្មានកន្លែងចតយានយន្តគ្រប់គ្រាន់ និងសំខាន់នៅពេលចតរថយន្តរួចរាល់ អ្នកត្រូវដើរឆ្ងាយទើបដល់បន្ទប់ជាមួយនឹងអីវ៉ាន់រយីងរយោង ព្រមទាំងចំណាយកម្លាំងទៀតផង ។
៣-ទេសភាព ៖
រឿងទេសភាពអាចនិយាយបានថា ជាភាពឆ្នើមដែលខុនដូតែងមានប្រៀបជាងផ្ទះយ៉ាងពិតប្រាកដ ។ ប្រសិនបើក្តីសុខរបស់អ្នក គឺការអង្គុយមើលទេសភាពទីក្រុង ឬពន្លឺភ្លើងនៅពេលយប់ពីទីកន្លែងខ្ពស់ៗ អ្នកគង់ត្រូវការជ្រើសរើសទិញខុនដូប្រសើរជាង ចំណែកផ្ទះ ប្រសិនបើទិញផ្ទះមានបរិវេណក្បែរៗដែលអាចបង្កើតជាសួនពណ៌ខៀវតូចៗទុកមើលខ្លួនឯងបាន តែទេសភាពក្រុងគង់មិនមែនជាចម្លើយតបទេ ។
៤-បង្កើតសួន ៖
ទោះជាអគារកម្រិតណា ក៏ផ្ទះមានកន្លែងបង្កើតសួនច្រើនជាងខុនដូ ។ ប្រសិនបើអ្នកចូលចិត្តដាំដើមឈើ ធ្វើសួនបន្លែ គឺផ្ទះជាចម្លើយតបដែលសមស្របជាមួយអ្នកច្រើនជាង ចំណែកខុនដូ បរិវេណមានកំណត់ ដោយបន្ទប់ខ្នាតតូចអនុវត្តតាមច្បាប់អនុញ្ញាតរបស់ខុនដូ ។ បើសិនជាអ្នកចង់បានកន្លែងដាំបន្លែផ្សេងៗ អ្នកត្រូវជ្រើសរើសទិញបន្ទប់ទំហំធំទៅតាមនោះដែរ ដែលវាមានតម្លៃខ្ពស់ តែយ៉ាងណាៗ ក៏មានបរិវេណតូចជាងការជ្រើសរើសទិញផ្ទះ ។
៥-ភាពងាយស្រួល ៖
ខុនដូមានភាពងាយស្រួលច្រើនយ៉ាងជាងផ្ទះ ដែលខុនដូមានទាំងអាងហែលទឹក កន្លែងទទួលភ្ញៀវនៅចំកណ្តាល និងកន្លែងហាត់ប្រាណ ។ល។ ចំណែកផ្ទះបើសិនជាមិនបានទិញតាមគម្រោងខ្នាតធំទេ ក៏គ្មានភាពងាយស្រួលដូចខុនដូដែរ ។ ដូច្នេះ ប្រសិនបើអ្នកជាមនុស្សចូលចិត្តបែបមានអ្វីៗផ្ដល់ឲ្យគ្រប់យ៉ាងដូចជា កន្លែងហាត់ប្រាណ ឬសម្រាកលំហែអារម្មណ៍ ការជ្រើសរើសទិញខុនដូ គឺជាការឆ្លើយតបដ៏ល្អ ខណៈដែលខុនដូជាច្រើនផ្តល់ភាពងាយស្រួលច្រើនបែបច្រើនយ៉ាង ។
៦-សត្វចិញ្ចឹម ៖
ការជ្រើសរើសទិញផ្ទះនឹងមានប្រៀប ហើយស័ក្តិសមសម្រាប់ការចិញ្ចឹមសត្វជាងការរស់នៅក្នុងខុនដូ ។ អ្នកមិនចាំបាច់ចិញ្ចឹមសត្វនៅក្នុងផ្ទះនោះទេ ដរាបណាសត្វចិញ្ចឹមរបស់អ្នកមិននាំមកនូវភាពក្តៅក្រហាយដល់អ្នកណាម្នាក់ ។ អ្នកក៏មានសេរីភាពពេញលេញក្នុងការចិញ្ចឹមសត្វក្នុងផ្ទះខ្លួនឯង ។ ចំណែកការស្នាក់នៅក្នុងខុនដូ គម្រោងភាគច្រើនមិនអនុញ្ញាតឱ្យចិញ្ចឹមសត្វឡើយ ឬបើអនុញ្ញាត ក៏ចិញ្ចឹមក្នុងបន្ទប់តូចៗ ដែលមិនសមស្របតាមលក្ខណៈចិញ្ចឹម ។ ដូច្នេះ បើសិនជាអ្នកដឹងខ្លួនថា ជាអ្នកស្រឡាញ់សត្វ ហើយជីវិតមិនអាចគ្មានសត្វចិញ្ចឹមបាន គឺគួរជ្រើសរើសទិញផ្ទះស្នាក់នៅល្អជាងទិញខុនដូ ។
៧-សុវត្ថិភាព ៖
ការរស់នៅក្នុងខុនដូ នឹងមានប្រៀបក្នុងរឿងសុវត្ថិភាពជាងផ្ទះ ព្រោះតំបន់ដែលត្រូវការពារសុវត្ថិភាពមានតិច ហើយភ្នាក់ងារសន្តិសុខអាចធ្វើតួនាទីនេះ ។ ប៉ុន្តែទោះយ៉ាងណា ក៏ស្ថិតលើការគ្រប់គ្រង និងការចាត់ចែងតាមកន្លែងនីមួយៗផងដែរ ។ នេះជារឿងមួយទៀតដែលអ្នកត្រូវផ្តល់ភាពសំខាន់ និងយកមកពិចារណា ។
៨-ចំណែករួម ៖
ចំណែករួមនេះ ផ្ទះនឹងមានប្រៀបជាង ព្រោះបើសិនជាមិនទិញផ្ទះតាមគម្រោង ក៏នឹងគ្មានការចំណាយលើចំណែករួមនេះ បើមានក៏គ្រាន់តែថ្លៃសំរាមប្រចាំខែប៉ុណ្ណោះ ។ រីឯផ្ទះនៅតាមគម្រោង យ៉ាងណាក៏ការចំណាយលើចំណែករួមនេះថោកជាងខុនដូដែរ ។ ទោះជាអ្នកទិញខុនដូហើយ តែមិនបានចូលរស់នៅ អ្នកក៏ត្រូវចំណាយលើចំណែករួមនេះជារៀងរាល់ខែ ។
៩-ចំនួនសមាជិកក្នុងគ្រួសារ ៖
ប្រសិនបើក្រុមគ្រួសាររបស់អ្នកមានចំនួនសមាជិកច្រើន ការជ្រើសរើសទិញផ្ទះ គួរតែជារឿងសមស្របជាងការទិញខុនដូ ព្រោះផ្ទះអាចរ៉ាប់រងសមាជិកក្នុងគ្រួសារបានច្រើន និងសមស្របជាមួយគ្រួសារធំដែលមានអ្នកអាយុច្រើន ក៏ដូចអ្នកមានគម្រោងរៀបការ ឬនឹងមានកូន ។ ចំណែកការជ្រើសរើសស្នាក់នៅក្នុងខុនដូ គួរតែសមស្របជាមួយមនុស្សវ័យធ្វើការដែលមានសមាជិកគ្រួសារត្រឹមតែ២-៣នាក់ ។
១០-ទិញងាយ លក់ឆាប់ ៖
ត្រូវព្រមទទួលស្គាល់ថា ខុនដូអាចលក់ងាយជាងផ្ទះ បើអ្នកគិតចង់ទិញសម្រាប់រស់នៅយូរអង្វែង ហេតុផលនេះអាចមិនមែនជាបញ្ហាទេ តែបើអ្នកទិញសម្រាប់ស្នាក់នៅក្នុងរយៈពេលខ្លី អ្នកត្រូវសាកល្បងសម្រេចចិត្តមើលសិន ហើយមិនមែនខុនដូគ្រប់កន្លែងសុទ្ធតែអាចលក់បានងាយៗទាំងអស់ឡើយ ព្រោះយ៉ាងណាក៏មានកត្តាផ្សេងទៀតដែលត្រូវពិចារណាផងដែរដូចជា ទីតាំង និងប្រសិទ្ធភាពនៃការគ្រប់គ្រងគម្រោងនីមួយៗជាដើម ៕
ចែករំលែកព័តមាននេះ