សារព័ត៌មាន China របស់ចិនផ្សាយកាលពីពេល ថ្មីៗកន្លងមកថា ក្រុមហ៊ុនឧស្សាហកម្មចិន «Bina Industrial» ស្ថិតនៅក្រុងហាងចូវ ខេត្ត Zhejing បានប្រកាសពីចរិតជាតិនិយមរបស់ខ្លួនដោយផ្តល់រង្វាន់លើកទឹកចិត្តដល់បុគ្គលិករូបណាវាយបំផ្លាញទូរស័ព្ទ Iphone របស់ខ្លួនចោល រួចទិញទូរស័ព្ទថ្មីជាផលិតផលរបស់ចិន នឹងផ្តល់រង្វាន់ ។
ការផ្តល់រង្វាន់នោះ គឺចំនួន១.០០០យាន់ ឬ១៥០ដុល្លារ ចំពោះទូរស័ព្ទ IPhone 4 ។ ចំណែក iPhone 5 នឹងផ្តល់រង្វាន់១.៥០០យាន់ ឬ២២៧ដុល្លារ និង IPhone 6 ចំនួន២.៥០០យាន់ ឬ៣៨០ដុល្លារ ។ ចំពោះនរណាម្នាក់ដែលទិញទូរស័ព្ទ IPhone 7 ស៊េរីថ្មី រួចយកទៅបំផ្លាញចោល ហើយទិញទូរស័ព្ទចិន អាចយកប័ណ្ណទិញទៅបើកប្រាក់ជាមួយក្រុមហ៊ុន ភ្លាមៗតែម្តង ។ គោលបំណងគឺចង់ឱ្យបុគ្គលិកស្រឡាញ់ផលិតផលផលិតនៅចិន (Made In China) ព្រោះបច្ចុប្បន្នទំនិញដែលផលិតនៅចិនកំពុងទទួលការពេញនិយមខ្ពស់នៅលើទីផ្សារក្នុងប្រទេស ដោយមិនចាំបាច់ទិញទំនិញពីអាមេរិកដែលថ្លៃហួសហេតុឡើយ ។
ក្រុមហ៊ុន Bina Industriai មានបុគ្គលិកច្រើនជាង៥០នាក់ ភាគច្រើនប្រើទូរស័ព្ទម៉ាក សៀវមី (Xiaomi) ហួវ៉ៃ (Huavei) និងមួយផ្នែកទៀតប្រើ iPhone របស់ក្រុម Apple ។ បុគ្គលិកដែលប្រើទូរស័ព្ទ iPhone ចំនួន១០នាក់ហើយយល់ព្រមវាយកម្ទេចទូរស័ព្ទរបស់ខ្លួន ដើម្បីយករង្វាន់ ៕
ចែករំលែកព័តមាននេះ