រាជធានីភ្នំពេញ ៖ ការចិញ្ចឹមសត្វជ្រូកនៅកម្ពុជា អាចផ្គត់ផ្គង់តម្រូវការក្នុងប្រទេសបានប៉ុន្មានខែមកហើយ ។ នៅពេលការចិញ្ចឹមសត្វជ្រូកក្នុងស្រុកអាចឆ្លើយតបតម្រូវការទៅផ្សារបានហើយនោះ ប្រទេសដែលធ្លាប់តែទិញជ្រូករស់នាំចូលពីប្រទេសជិតខាងនេះ គ្រោងរៀបចំសាច់ជ្រូកបង្កកទៅទីផ្សារប្រទេសចិននៅពេលខាងមុខនេះ ។ រដ្ឋមន្ត្រីក្រសួងកសិកម្ម…
រាជធានីភ្នំពេញ ៖ ការចិញ្ចឹមសត្វជ្រូកនៅកម្ពុជា អាចផ្គត់ផ្គង់តម្រូវការក្នុងប្រទេសបានប៉ុន្មានខែមកហើយ ។ នៅពេលការចិញ្ចឹមសត្វជ្រូកក្នុងស្រុកអាចឆ្លើយតបតម្រូវការទៅផ្សារបានហើយនោះ ប្រទេសដែលធ្លាប់តែទិញជ្រូករស់នាំចូលពីប្រទេសជិតខាងនេះ គ្រោងរៀបចំសាច់ជ្រូកបង្កកទៅទីផ្សារប្រទេសចិននៅពេលខាងមុខនេះ ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានណែនាំទៅមន្ត្រីជំនាញក្រោមឱវាទឱ្យត្រៀមរៀបចំឃ្លាំងបង្កក និងកន្លែងទីសត្វឃាតស្តង់ដារ ដើម្បីស្ទុកសាច់បង្កកសម្រាប់នាំចេញទៅប្រទេសចិន ។ លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ជាការណែនាំរបស់លោករដ្ឋមន្ត្រីខាងលើនេះ បន្ទាប់ពីកម្ពុជាអាចផ្គត់ផ្គង់ជ្រូករស់នៅក្នុងស្រុកបាន ៤ ខែចុងក្រោយ ។
តែទោះយ៉ាងណា លោក តាន់ ផាន់ណារ៉ា បានបញ្ជាក់ថា «ការនាំចេញសាច់ជ្រូកបង្កកទៅកាន់ប្រទេសចិនមិនងាយស្រួលទេ ។ ភាគីចិនត្រូវមកពិនិត្យ និងវាយតម្លៃពីអនាម័យ និងភូតគាមអនាម័យជាមុនទាមអាចនាំទៅបាន ។ ខ្ញុំបានណែនាំទៅវិស័យឯកជនហើយ ពិសេសនៅក្នុងសមាគមអ្នកចិញ្ចឹមសត្វដែលមានកសិកដ្ឋានធំៗ ឱ្យគាត់ត្រៀមក្នុងការនាំចេញសាច់បង្កកនេះ» ។
លោក ស្រ៊ុន ពៅ សមាគមអ្នកចិញ្ចឹមសត្វកម្ពុជា បានបង្ហាញនូវការគាំលើផែនការនេះ ។ ។លោកថា ការនាំសាច់បង្កកនេះពិតជាមានសារៈសំខាន់ណាស់ នឹងជាជោគជ័យថ្មីរបស់កម្ពុជាសម្រាប់ការលើកកម្ពស់វិស័យចិញ្ចឹមសត្វ និងជាការបង្កើនចំណូលក្នុងសកម្មភាពសេដ្ឋកិច្ច ជាតិផងដែរ ។
មិនទាន់មានការបញ្ជាក់ច្បាស់លាស់ថា នៅពេលដែលកម្ពុជាអាចនាំចេញសាច់ជ្រូកបង្កកនេះឲ្យពិតប្រាកដនោះទេ។ ចិនបានក្លាយជាក្តីសង្ឃឹមសម្រាប់នាំចេញផលិតផលកសិកម្មច្រើនក្រោមពីកម្ពុជាចិនមានកិច្ចព្រមព្រៀងពាណិជ្ជកម្មសេរីមក ។ ផ្លែមៀនប៉ៃលិន រួមនឹងត្រីប្រា ដែលភាគីចិនបានពិនិត្យវាយតម្លៃលើបញ្ហាអនាម័យនៅមិនទាន់បាននាំចេញនៅឡើយទេ ៕
ចែករំលែកព័តមាននេះ