ព្រះពុទ្ធសាសនាត្រូវបានច្បាប់ជាតិដាក់បញ្ចូលទៅក្នុងបាវចនាជាតិថាជាសាសនារបស់រដ្ឋ ។ វិស័យព្រះពុទ្ធសាសនាបានចាក់ឫសគល់យ៉ាងជ្រៅទៅក្នុងផ្នត់គំនិតរបស់ប្រជាជនខ្មែរតាំងពីបរមបុរាណមករហូតមកដល់បច្ចុប្បន្ន ព្រះពុទ្ធសាសនាបានដើរតួនាទីយ៉ាងសំខាន់ក្នុងការអប់រំសីលធម៌ដល់ប្រជាជនឱ្យប្រកាន់ភ្ជាប់នូវអំពើរល្អ ចេះជួយអ្នកដទៃ មានចិត្តមេត្តាករុណា មិនបៀតបៀតជីវិតគេ ប្រកាន់យកនូវភាពស្មោះត្រង់ សុច្ចរិតទៀងត្រង់ និងរួមសាមគ្គីគ្នា ។
អ្នកបួសក្នុងព្រះពុទ្ធសាសនាមានតួនាទីយ៉ាងសំខាន់ក្នុងការផ្សព្វផ្សាយធម៌ បណ្ដុះអំពើល្អក្នុងសង្គម និងដឹកនាំសត្វលោកទៅកាន់ផ្លូវល្អដើម្បីរស់នៅប្រកបដោយក្ដីសុខ សេចក្ដីស្ងប់នៅក្នុងផ្លូវចិត្ត រំលត់អំពើបាបចាកគ្រឿងសៅហ្មងទាំងឡាយ ។
បច្ចុប្បន្នប្រជាពលរដ្ឋខ្មែរបានស្គាល់ច្បាស់ហើយអំពីព្រះនាមរបស់ព្រះសង្ឃ៤អង្គដែលកំពុងមានកេរ្តិ៍ឈ្មោះល្បីល្បាញទាំងនៅលើបណ្តាញសង្គម និងទាំងសកម្មភាពជាក់ស្តែង ដែលព្រះអង្គទាំងនោះកំពុងមានស្នាដៃល្អលើកស្ទួយព្រះពុទ្ធសាសនាឱ្យបានខ្ពង់ខ្ពស់ និងថែមទាំងបានដើរតួនាទីជាគ្រូបាអាចារ្យអប់រំ ណែនាំ ផ្សព្វផ្សាយធម៌ធ្វើឱ្យពុទ្ធសាសនិកជនដែលបានស្ដាប់ព្រះធម៌ហើយ ក៏បានធូរស្បើយពីទុក្ខកង្វល់ទាំងឡាយ ។
ព្រះសង្ឃខ្មែរទាំងបួនអង្គនោះ ១. ព្រះអង្គសាន សុខជា ២. ព្រះអង្គគូ សុភាព ៣. ព្រះអង្គជួន កក្កដា និង៤. ព្រះអង្គហាក់ សៀងហៃ ។ ព្រះសង្ឃទាំង៤អង្គនេះហើយជាសសរស្តម្ភទល់ទ្រព្រះពុទ្ធសាសនាឱ្យបានខ្ពង់ខ្ពស់ ឱ្យអន្តរជាតិមើលឃើញ និងបានស្គាល់ពីតម្លៃពិតនៃព្រះពុទ្ធសាសនាថាជាសាសនាស្វែងរកសន្តិភាពជូនប្រជាជាតិនៅលើពិភពលោក ៕ សាន សារិន
ចែករំលែកព័តមាននេះ