រាជធានីភ្នំពេញ ៖ ផ្លូវល្បឿនលឿនពីភ្នំពេញទៅក្រុងព្រះសីហនុ គ្រោងដាក់ឱ្យប្រើប្រាស់ជាផ្លូវការនៅខែកញ្ញាខាងមុខនេះ ។ សាធារណជន ពិសេសធុរជនរកស៊ីវិស័យដឹកជញ្ជួន បានសារទរចំពោះដំណឹងដែលថា ផ្លូវល្បឿនលឿនលើកទី ១…
រាជធានីភ្នំពេញ ៖ ផ្លូវល្បឿនលឿនពីភ្នំពេញទៅក្រុងព្រះសីហនុ គ្រោងដាក់ឱ្យប្រើប្រាស់ជាផ្លូវការនៅខែកញ្ញាខាងមុខនេះ ។ សាធារណជន ពិសេសធុរជនរកស៊ីវិស័យដឹកជញ្ជួន បានសារទរចំពោះដំណឹងដែលថា ផ្លូវល្បឿនលឿនលើកទី ១ របស់កម្ពុជានេះដាក់ឱ្យដំណើរការមុនការកំណត់នោះ ។
លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា បានសារទរចំពោះដំណឹងនេះ ។ លោកថា ការប្រើប្រាស់ផ្លូវល្បឿនលឿននេះ នឹងមានសារៈសំខាន់ណាស់ចំពោះការដឹកទំនិញចេញចូលកម្ពុជា ក៏ដូចជាការធ្វើឡូជីស្ទិកនៅក្នុងប្រទេសទាំងមូល ដែលមានប្រមាណ ៧០% បានប្រើប្រាស់កំពង់ផែស្វយ័តក្រុងព្រះសីហនុ និងត្រូវដឹកទំនិញតាមរយៈការដឹកជញ្ជូនតាមផ្លូវជាតិលេខ ៤ សព្វថ្ងៃនេះ ។
លោកឧកញ៉ាសង្កត់ធ្ងន់ថា នៅពេលដែលផ្លូវល្បឿនលឿនពីភ្នំពេញទៅក្រុងព្រះសីហនុនេះដាក់ឱ្យប្រើប្រាស់ នឹងធ្វើឱ្យការដឹកជញ្ជូន និងឡូជីស្ទិកទទួលបានផលចំណេញច្រើន ។ ចំណេញទាំងពេលវេលា និងថ្លៃដឹកជញ្ជួន បើប្រៀប ធៀបទៅនិងការដឹកជញ្ជូនតាមផ្លូវជាតិលេខ ៤ ។ លោកឧកញ៉ាបញ្ជាក់ថា ផ្លូវល្បឿនលឿនវា នឹងធ្វើឱ្យការបើកបរចំណេញប្រេងឥន្ធនៈជាងការបើកបរនៅតាមផ្លូវចង្អៀតហើយបើកយឺតនោះ ។ ចំណេញម្យ៉ាងទៀតចំណេញលើចម្ងាយផ្លូវ ៣០ ទៅ ៤០ គីឡូម៉ែត្របើធៀបទៅនិងផ្លូវជាតិលេខ ៤ ។
លោកឧកញ៉ាបន្តថា «យើងសង្ឃឹមទុកថា ផ្លូវល្បឿនលឿននេះនឹងធ្វើឱ្យការដឹកជញ្ជូនក៏ដូចជាការធ្វើឡូជីស្ទិកនៅក្នុងប្រទេសនេះនឹងជួយឱ្យសេដ្ឋកិច្ចកម្ពុជាមានការរីកចម្រើនពិសេសអាចប្រកួតប្រជែងជាមួយ និងប្រទេសជិតខាងបានទៅលើការដឹកជញ្ជូននិងឡូជីស្ទិកនេះ» ។
ប្រធានសមាគមភស្តុភារកម្មកម្ពុជាថា ផ្លូវល្បឿនលឿនេះនឹងក្លាយជាជម្រើសទី ១ សម្រាប់ការដឹកជញ្ជូន ។ ចំណែកផ្លូវជាតិលេខ ៤ អាចនឹងក្លាយជាផ្លូវទេសចរណ៍ និងការធ្វើដំណើររបស់ប្រជាពលរដ្ឋ ។ ផ្លូវល្បឿនលឿនភ្នំពេញ-ខេត្តព្រះសីហនុ វិនិយោគក្នុងកញ្ចប់ទឹកប្រាក់ជាង ២ ពាន់លានដុល្លារ ដោយក្រុមហ៊ុនប្រទេសចិន ។ ការធ្វើដំណើរលើផ្លូវនេះនឹងត្រូវបង់ថវិកា ។
កន្លងមកលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូននិយាយថា លោកនឹងស្នើឱ្យក្រុមហ៊ុនបញ្ចុះថ្លៃពី ៥ ទៅ ១០ ឆ្នាំសិន ដើម្បីផ្តល់លទ្ធភាពអាចឱ្យពលរដ្ឋប្រើប្រាស់ផ្លូវល្បឿនលឿននេះបាន ។ លោកថា លទ្ធភាពពលរដ្ឋពេលនេះមិនទាន់អាចចំណាយលើការបង់ថ្លៃសេវាបើកបរលើផ្លូវល្បឿននេះទេ បើកំណត់តម្លៃស្តង់ដារតាមប្រទេសមួយចំនួននោះ ។ តម្លៃស្តង់ដារផ្លូវល្បឿនលឿនតាមប្រទេសផ្សេងៗចន្លោះពី ១០ សេន ទៅ ១៥ សេនក្នុងមួយគីឡូម៉ែត្រ ដូច្នេះបើធ្វើដំណើរពីភ្នំពេញទៅក្រុងព្រះសីហនុ ត្រូវចំណាយយ៉ាងហោចណាស់ក៏ ២០ ដុល្លារដែរ លើប្រវែងផ្លូវជាង ១៩០ គីឡូម៉ែត្រនេះ ។
នៅពេលបង្ហើបឱ្យដឹងពីគម្រោងដាក់ឱ្យដំណើរការផ្លូវល្បឿនលឿននេះ លោក ស៊ុន ចាន់ថុល ពុំបានបញ្ជាក់ពីតម្លៃក្នុងការធ្វើដំណើរលើផ្លូវនេះនោះទេ ។ តែលោកថា ផ្លូវនេះនឹងដាក់ឱ្យពលរដ្ឋធ្វើដំណើសាកល្បងនៅខែក្កដាខាងមុខ ៕
ចែករំលែកព័តមាននេះ