រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ក្រុមក្មេងទំនើងមួយក្រុមមានគ្នាជាច្រើននាក់បានជិះម៉ូតូជាច្រើនគ្រឿងប្រដាប់ដោយដាវ កាំបិត ពូថៅ ដេញកា.ប់យុវជនមួយក្រុមទៀត និងអាជីវករលក់ស្រាក្រឡុកយ៉ាងអានាធិបតេយ្យផ្អើលពេញផ្លូវទន្លេសាប បណ្តាលឲ្យមានអ្នករបួសជាច្រើននាក់ និងខូចខាតម៉ូតូអស់ជាច្រើនគ្រឿងផងដែរ ចំណែកជនបង្កវិញ ក៏រត់គេចខ្លួនបាត់ស្រមោលតែម្តង។
សេចក្តីរាយការណ៍បន្តថា ហេតុការណ៍ភ្ញាក់ផ្អើលខាងលើនេះដែរ បានកើតឡើងកាលពីវេលាម៉ោង១២រំលងអធ្រាត្រ ថ្ងៃទី៥ ខែមករា ឆ្នាំ២០២២ នៅតាមបណ្ដោយផ្លូវទន្លេសាប ត្រង់ចំណុចសណ្ឋាគារសុខា ក្បែរបន្ទប់ទឹកសារធារណៈ ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
សេចក្តីរាយការណ៍បន្តទៀតថា ក្រុមក្មេងទំនើងជាជនបង្កខាងលើ មិនស្គាល់អត្តសញ្ញាណនោះទេ គ្រាន់តែគេស្គាល់ថា នៅក្រុមរហ័សនាម «ឫស្សីកែវ R.S.K» ។
បើតាមប្រភពព័ត៌មានពីអ្នកលក់ស្រាក្រឡុកនៅកន្លែងកើតហេតុ បានប្រាប់ឱ្យដឹងថា មុនពេលកើតហេតុ គឺនៅកន្លែងគាត់ និងកន្លែងជាប់គ្នានោះ មានភ្ញៀវប្រុសស្រីអង្គុយញ៉ាំអីជាធម្មតា និងមានក្រុមយុវជនមួយក្រុមទៀតមានគ្នាប្រហែល១០នាក់ បានមកឈប់ម៉ូតូអង្គុយលេងនៅជិតកន្លែងកើតហេតុនោះ ។
ប្រភពដដែលបានបន្តទៀតថា នៅពេលកើតហេតុ ស្រាប់តែលេចមុខក្រុមជនបង្ករហ័សនាម «ឫស្សីកែវ RSK» មានគ្នាច្រើននាក់ ជិះម៉ូតូប្រហែល២០គ្រឿង ដោយជិះលើកក្រវី ដាវ កាំបិត ពូថៅ ដំបងប្រសាចពេញផ្លូវតែម្តង មើលទៅពិតជាអានាធិបតេយ្យមែនទែន ។
ប្រភពដដែលបន្តថា ក្រោយមកក៏បានឈប់នៅកន្លែងកើតហេតុ និងបានដកកាំភ្លើងផាវបាញ់២ទៅ៣គ្រាប់ឡើងទៅលើជាសញ្ញាអោយបក្សពួកខ្លួនចុះដេញកា.ប់យុវជនមួយក្រុមមិនស្គាល់អត្តសញ្ញាណនោះរត់ប្រសាចពេញផ្លូវ និងបន្តកា.ប់រះមិនរើសមុខ ដោយកា.ប់ទាំងអ្នកលក់ស្រាក្រឡុកនៅកន្លែងកើតហេតុនោះទៀត បណ្តាលខូចខាតសម្ភារៈជាច្រើន និងរបួសភ្ញៀវប្រុសស្រីជាច្រើនអ្នកដេកដួលក្នុងថ្លុកឈា.មតែម្តង។
ប្រភពដដែលបន្តថា ហើយក្រុមជនបង្កទាំងនោះក៏បានបន្តដេញកា.ប់ម៉ូតូដែលជិះរត់នៅកន្លែងកើតហេតុនោះបណ្តាលខូចខាតចំនួន២គ្រឿង និងបន្តដេញកា.ប់ម៉ូតូយុវជន២នាក់ផ្សេងទៀត ដោយ០១គ្រឿងម៉ាក suzuki nex និងមួយគ្រឿងទៀតម៉ាកហុងដាឌ្រីមសង់ ដែរជិះរត់ បណ្តាលឲ្យខូចខាតទាំងស្រុង និងកា.ប់ផ្តាច់ស្លាកលេខម៉ូតូយកទៅបោះចោលទៀត ។
ប្រភពដដែលបន្តទៀតថា មិនត្រឹមតែប៉ុណ្ណោះ ក្រុមជនបង្កខាងលើនេះនៅជិះបន្តទៅកា.ប់ម៉ូតូ suzuki nex មួយគ្រឿងទៀតនៅមុខសណ្ឋាគារសុខា បណ្តាលឲ្យខូចខាតបន្ថែមទៀត។ និយាយអោយខ្លី គឺក្រុមជនបង្កនោះ បានដេញកា.ប់ទាំងអស់មិនរើសមុខឡើយ ចាប់ពីចំណុចមុខបន្ទប់ទឹកសារធារណៈ រហូតដល់មុខសណ្ឋាគារសុខា ។ បន្ទាប់ពីបង្កហេតុរួច ក្រុមជនបង្កបាននាំគ្នាជិះរត់គេចខ្លួនបាត់ស្រមោលអស់ដោយសុវត្ថិភាពតែម្តង ។
បន្ទាប់ពីកើតហេតុ ជនរងគ្រោះត្រូវបានមិត្តភ័ក្ដិដឹកបញ្ជូនទៅព្យាបាលរបួសភ្លាមៗ នៅសល់តែ អ្នកលក់ស្រាក្រឡុក រួមទាំងម្ចាស់ម៉ូតូរងគ្រោះដែលជាអ្នកមិនដឹងរឿងបាននាំគ្នាទៅដាក់ពាក្យបណ្ដឹងអោយសមត្ថកិច្ចជួយអន្តរាគមន៍ស្រាវជ្រាវតាមរកជនបង្កទាំងនោះ យកមកផ្តន្ទាទោសតាមផ្លូវច្បាប់ ។
ចែករំលែកព័តមាននេះ