រាជធានីភ្នំពេញ ៖ បុរសម្នាក់ផឹកស្រាស្រវឹងជោកជាំឡើងកាំជណ្តើរទៅសម្រាកនៅបន្ទប់ជួលជាន់ទី១ ងងឹតមុខធ្លា.ក់ពីលើជណ្តើររងរបួសធ្ងន់សន្លប់ស្ដូកស្ដឹងបាត់មាត់ក បង្កអោយមានការភ្ញាក់ផ្អើល កាលពីវេលាម៉ោង១០យប់ថ្ងៃទី៣ ខែកុម្ភៈ ឆ្នាំ២០២២ នៅផ្ទះជួលភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។
ជនរងគ្រោះឈ្មោះ ស៊ូ ពៅ ភេទប្រុស អាយុ៤៥ឆ្នាំ មុខរបរជាជាកូនជាងសំណង់ មានស្រុកកំណើតនៅភូមិតាកែន ស្រុកឈូក ខេត្តកំពត ។
តាមប្រភពព័ត៌មានបញ្ជាក់ពីសាច់ញាតិក្រុមគ្រួសាររបស់ជនរងគ្រោះបាននិយាយប្រាប់ថា នៅមុនពេលកើតហេតុជនរងគ្រោះបាននាំគ្នាចាកចេញពីស្រុកកំណើត ដើម្បីមករកការងារធ្វើនៅឯទីក្រុងភ្នំពេញដោយរួមដំណើរមកមានស្រី្តម្នាក់ និងប្រុសចំនួនបួននាក់ សរុបទាំងអស់មានគ្នាប្រាំនាក់ ពីរនាក់ឪពុក និងកូនស្រី ពួកគាត់នាំគ្នាជិះម៉ូតូ ចំណែកបួននាក់ទៀត ពួកគាត់នាំគ្នាជិះរថយន្តឈ្នួល ។
តាមការរៀបរាប់បញ្ជាក់ពីសាច់ញាតិក្រុមគ្រួសាររបស់ជនរងគ្រោះបានអោយដឹងថា ជនរងគ្រោះ ខណៈពេលដែលជិះរថយន្តឈ្នួលបណ្តើរនាំគ្នាផឹកស្រាបណ្ដើររហូតមកដល់ផ្ទះជួលកើតហេតុខាងលើបាននាំគ្នាហូបស្រាបន្តថែមទៀត លុះនៅវេលាម៉ោងកើតហេតុជនរងគ្រោះបានឡើងទៅលើផ្ទះជួលជាន់ទីមួយ ដើម្បីចូលទៅសម្រាក ដោយដើរឡើងតាមជណ្តើរ ស្រាប់តែងងឹតមុខរអិលធ្លាក់ពីលើជណ្ដើរមកក្រោម បណ្ដាលឲ្យរងរបួសធ្ងន់សន្លប់ស្ដូកស្ដឹងបាត់មាត់កឈឹងផ្អើលប្រជាពលរដ្ឋនាក់នៅជិតខាងនាំគ្នាលើកជនរងគ្រោះដាក់លើរម៉កសណ្ដោងយកទៅសង្គ្រោះនៅមន្ទីរពេទ្យជិតកន្លែងកើតហេតុ តែខាងមន្ទីរពេទ្យមិនហានទទួលទេ ដោយសារឃើញសភាពធ្ងន់ធ្ងរពេកបន្ទាប់មកក៏ដឹកទៅសង្គ្រោះបន្តនៅមន្ទីរពេទ្យ ឡាំប៊ុនផន ក៏មិនហ៊ានទទួលទើបដឹកយកជនរងគ្រោះត្រឡប់មកកន្លែងកើតហេតុវិញ ហើយបងប្អូនប្រជាពលរដ្ឋនៅជុំវិញកន្លែងកើតហេតុអាណិតដល់ជនរងគ្រោះបាននាំគ្នារៃអង្គៀសលុយបានជាង២០ម៉ឺនរៀលអោយទៅសាច់ញាតិរបស់ជនរងគ្រោះ ដើម្បីដោះស្រាយដឹកថ្លៃដឹកទៅសង្គ្រោះព្យាបាល ។
ក្រោយពេលកើតហេតុប្រជាពលរដ្ឋបានទាក់ទងហៅរថយន្តសង្គ្រោះបន្ទាន់សម្ភពរស្មីមកដឹកជនរងគ្រោះយកទៅសង្គ្រោះបន្តនៅមន្ទីរពេទ្យព្រះកុសុមៈ ៕
ចែករំលែកព័តមាននេះ