ខេត្តស្ទឹងត្រែង ៖ នារីវ័យក្មេងម្នាក់បានសុំម្តាយទៅដើរលេងជាមួយមិត្តរហូតទល់ល្ងាចនៅតែមិនឃើញត្រឡប់មកផ្ទះទៀត លុះក្រោយមកក៏ទទួលដំណឹងដែលធ្វើឲ្យស្ត្រីជាម្តាយរន្ធត់ចិត្តយ៉ាងខ្លាំង គឺនាងបានលង់ទឹកបាត់ស្រមោលឈឹងតែម្តង ។ ហេតុការណ៍លង់ទឹកនេះកើតឡើងកាលពីវេលាម៉ោង៥ និង៤៥នាទីល្ងាច ថ្ងៃទី១៤ ខែកក្កដា ឆ្នាំ២០១៦ នៅចំណុចគល់ស្ពានអូរត្រែល ស្ថិតក្នុងភូមិអូរត្រែល ឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែង លុះវេលាម៉ោងប្រមាណ៩ព្រឹកថ្ងៃទី១៥កក្កដា ទើបប្រទះឃើញសពផុសឡើងវិញ ។
ប្រភពព័ត៌មានក្បែរកន្លែងកើតហេតុ បានឲ្យដឹងថា មុនដំបូងគេបានឃើញក្រុមនារីរងគ្រោះ៣នាក់ជិះម៉ូតូ១គ្រឿងទំនងជាស្រវឹងស្រាផងនោះបានមកឈប់ចាក់សាំង១លីត្រក្បែរគល់ស្ពាន ដោយឲ្យលុយអ្នកលក់៥ពាន់រៀលហើយអ្នកលក់អាប់ឲ្យ២ពាន់រៀលវិញតែនារីរងគ្រោះឆ្លើយថាមិនបាច់អាប់ទេ ខ្ញុំធីបឲ្យចុះ រួចពួកគេក៏បាននាំគ្នាជិះម៉ូតូចុះទៅច្រាំងទន្លេគល់ស្ពាន នាំគ្នាចុះលេងទឹក ។ ក្រោយមកមានអ្នកឃាត់ថា កុំប្រលែងគ្នាក្នុងទឹកប្រយ័ត្នលង់តែក្រុមនារីរងគ្រោះមិនបានស្តាប់តែនៅតែនៅប្រឡែងគ្នាក្នុងទឹកដដែល មួយសន្ទុះក្រោយមកនារីម្នាក់ក្នុងចំណោម៣នាក់នោះស្រាប់តែរអិលជើងលិចទៅតាមទឹកបាត់តែម្តង ។
ប្រភពបានឲ្យដឹងទៀតថា បន្ទាប់ពីការបាត់ខ្លួននារីរងគ្រោះ នារីជាមិត្តភក្តិ២នាក់ទៀតក៏បានស្រែកហៅឲ្យគេជួយ និងរាយការណ៍ដល់កម្លាំងនគរបាលយាមស្ពានក្បែរនោះឲ្យជួយអន្តរាគមន៍ភ្លាមដែរ តែជាអនិច្ចានារីម្នាក់នោះបានលិចទៅតាមផ្ទៃទឹកនោះទៅហើយ ។
តាមការរៀបរាប់របស់ស្ត្រីឈ្មោះ អឹម សុខហ្វាវី អាយុ៦២ឆ្នាំ ត្រូវជាម្តាយនារីរងគ្រោះបានឲ្យដឹងថា នៅវេលាម៉ោងប្រហែលជាជិត៣រសៀលកូនស្រីគាត់(នារីរងគ្រោះ)បានសុំទៅដើរលេងជាមួយមិត្តភក្តិនៅទួលគ្រួស រហូតទល់ល្ងាចនៅតែមិនទាន់ឃើញមកផ្ទះ លុះក្រោយមកទើបទទួលដំណឹងពីមិត្តភក្តិរបស់នាងថា លង់ទឹកនៅគល់ស្ពានអូរត្រែល ធ្វើឲ្យរូបគាត់តក់ស្លុតជាខ្លាំង ។
ប្រភពពីសមត្ថកិច្ចនៅក្បែរគល់ស្ពាន បានបញ្ជាក់ថា បន្ទាប់ពីគ្រួសារប្រទះឃើញសពផុសឡើងនៅត្រើយខាងលិច ក៏បានស្រង់ដាក់ទូកមកត្រើយខាងកើត ហើយក៏មានការចុះទៅពិនិត្យដោយកម្លាំងនគរបាលព្រហ្មទណ្ឌកម្រិតធ្ងន់ និងកម្លាំងនគរបាលនៃការិយាល័យបច្ចេកទេសកោសល្យវិច្ច័យខេត្តផងដែរ ។
នគរបាលឲ្យដឹងថា នារីរងគ្រោះមានឈ្មោះ កៅ សំណាង ភេទស្រី អាយុ២៥ឆ្នាំ រស់នៅក្នុងបន្ទុកគ្រួសារនៅភូមិព្រែក សង្កាត់ស្ទឹងត្រែង ក្រុងស្ទឹងត្រែង ។ បច្ចុប្បន្នសពជននារីរងគ្រោះត្រូវគ្រួសារសាច់ញាតិនាំទៅបញ្ចុះនៅឈាបនដ្ឋានភូមិបាចុង សង្កាត់ព្រះបាត ក្រុងស្ទឹងត្រែង ៕
ចែករំលែកព័តមាននេះ