អ្នកស្រី ហេង សុភាព រស់នឹងការដាំបន្លែជិត ២០ ឆ្នាំហើយ
- ព្រះវិហារ
ខេត្តព្រះវិហារ ៖ ជាកសិករនៅភូមិកំពត ឃុំរហ័ស ស្រុករវៀង ខេត្តព្រះវិហារ អ្នកស្រី ហេង សុភាព បានដាំបន្លែប្រមាណ…
ខេត្តព្រះវិហារ ៖ ជាកសិករនៅភូមិកំពត ឃុំរហ័ស ស្រុករវៀង ខេត្តព្រះវិហារ អ្នកស្រី ហេង សុភាព បានដាំបន្លែប្រមាណ ១៩ ឆ្នាំហើយ ពោលគាត់ដាំបន្លែនៅពេលមានអាយុ ៣០ ឆ្នាំឥឡូវគាត់មានអាយុ ៤៩ ឆ្នាំ ។ រងបន្លែនៅក្បែរផ្ទះបានលើកកម្ពស់ជីវភាពរបស់គាត់បានសមរម្យ និងអាចបញ្ជួនកូន ៤ នាក់ទៅរៀនដោយមិនមានក្តីបារម្ភ ។
«ការដាំំបន្លែកាលពីដំបូងៗមានលក្ខណៈតិចតួច ៤ ទៅ ៥ រងប៉ុណ្ណោះគ្រាន់ ទុកសម្រាប់ផ្គត់ផ្គង់គ្រួសារ លក់ដូរខ្លះនិងចែកពលរដ្ឋក្នុងភូមិទទួលទាន ។ ប៉ុន្តែនៅពេលដាំបន្លែយូរៗទៅមានម៉ូយមកទទួលទិញជាប្រចាំស្របពេលដែលគម្រោងអភិវឌ្ឍន៍លើការដាំដុះ និងខាងមន្ទីរកសិកម្មចុះមកណែនាំពីការដាំដុះថែមទៀត ទើបធ្វើឲ្យខ្ញុំសម្រេចចិត្តពង្រីកផ្ទៃដីដាំដុះជាបន្តបន្ទាប់រហូត បើគិតមកដល់សព្វថ្ងៃមានជិតកន្លះហិកតា» នេះជាការបញ្ជាក់របស់អ្នកស្រី ហេង សុភាព ។
ការលក់បន្លែជាប្រចាំថ្ងៃពេលខ្លះរបស់អ្នកស្រី ហេង សុភាព បានកម្រៃ ៤ ទៅ ៥ ម៉ឺនរៀល ហើយនៅថ្ងៃណាបន្លែមានច្រើនអាចលក់បានរហូតដល់ ១០ ម៉ឺនរៀល ។ ប្រាក់ចំណូលពីការដាំបន្លែបានដើរតួរសំខាន់ក្នុងការជួយដល់ក្រុមគ្រួសារអ្នកស្រី ។ ក្រៅពីធ្វើស្រែទុកសម្រាប់ហូបប្រាក់ចំណូលពីបន្លែសម្រាប់ចាយវាយលើម្ហូបអាហារ និងដោះស្រាយនៅពេលមានបញ្ហាជីវភាព ។
កសិករដែលមានកូន ៤ នាក់រូបនេះនិយាយថា ការដាំបន្លែនៅក្បែរផ្ទះៗធ្វើឲ្យគាត់មិនពិបាកធ្វើចំណាកស្រុកទៅកន្លែងផ្សេងដើម្បីបានចំណូល ។ ដាំបន្លែនៅនិងផ្ទះហើយបានចំណូលមានឱកាសមើលថែរកូនៗទៀតផង ។ «បើគ្មានប្រាក់ចំណូលបានមកពីការដាំបន្លែនេះទេ គ្រួសារមិនដឹងមានអ្វីទុកឱ្យកូនរៀនសូត្របាននិងគ្មានអ្វីសម្រាប់ផ្គត់ផ្គង់គ្រួសារ ។ ដូចនេះជីវភាពគ្រួសារពឹងផ្អែកលើការដាំបន្លែកូនៗទាំងបួនបច្ចុប្បន្ននេះកានសិក្សាថ្នាក់វិទ្យាល័យ» កសិករ សុភាព និយាយទាំងមុខញញឹម ។
តាមអ្នកស្រី ហេង សុភាព បន្ទាប់ពីចាប់ប្រមូលផលបន្លែតាំងពីខែធ្នូឆ្នាំ ២០២១ រហូតដល់ខែមករាដើមឆ្នាំ ២០២២នេះក្រៅពីការកាត់ចំណាយលើថ្នាំ ជីនិងគ្រាប់ពូជអស់រួចអស់ហើយ គ្រួសារអ្នកស្រីអាចនៅសល់ប្រាក់ ៥ លានទៅ ៦លានរៀល ។ ស្របពេលគ្រួសារអ្នកស្រី ហេង សុភាព ពឹងលើមុខរបរដាំបន្លែសុវត្ថិភាពដើម្បីបានប្រាក់ចំណូលយកមកផ្គត់ផ្គង់ដល់គ្រួសារ ។ បច្ចុប្បន្នប្រជាពលរដ្ឋនៅក្នុងភូមិដែលជាង ១០០ គ្រួសារក្នុងនោះមានប្រមាណ ៩០% ចាប់យកមុខរបរដាំបន្លែដែរ ៕
ចែករំលែកព័តមាននេះ