លោកឧកញ៉ា ម៉ុង ឫទ្ធី ចិញ្ចឹមកូនខ្លា!
- ភ្នំពេញ
ភ្នំពេញ៖ លោកឧកញ៉ា ម៉ុង ឫទ្ធី សមាជិកព្រឹទ្ធសភា និងជាសេដ្ឋីខាងកសិកម្ម បានចិញ្ចឹមកូនខ្លាដំបង មួយក្បាល ទុកជាការកម្សាន្ត។ លោកបានបង្ហោះរូបថតជាមួយកូនខ្លា…
ភ្នំពេញ៖ លោកឧកញ៉ា ម៉ុង ឫទ្ធី សមាជិកព្រឹទ្ធសភា និងជាសេដ្ឋីខាងកសិកម្ម បានចិញ្ចឹមកូនខ្លាដំបង មួយក្បាល ទុកជាការកម្សាន្ត។ លោកបានបង្ហោះរូបថតជាមួយកូនខ្លា ដែលមានអាយុ ៣ខែ ហើយលោក បំបៅទឹកដោះគោកូនខ្លា ដែលមានឈ្មោះថា រ៉ាដា។ កូនខ្លានោះ ត្រូវបានលោកឧកញ៉ា ម៉ុង ឫទ្ធី ឲ្យដឹងថា លោកឧកញ៉ា ទៀ វិចិត្រ ដែលជាកូនរបស់លោក ទៀ វិញ មេបញ្ជាការកងទ័ពជើងទឹក ជាអ្នកឲ្យដល់រូបលោក។
នៅលើហ្វេសប៊ុក លោកឧកញ៉ា ម៉ុង ឫទ្ធី បានសរសេរយ៉ាងដូច្នេះថា «ព្រឹកថ្ងៃសៅរិ៍ទី២៩ ខែមករា ឆ្នាំ២០២២ ចុះមកមើលការងារសាងសង់ចេតីយ៍សមូហភាព និងប្រាសាទព្រះវិហារជានិមិត្តរូប ប្រទះឃើញសត្វក្ងោកញីឈ្មោលមួយគូ នាំគ្នាមកទុំនៅលើប្រាសាទ ក្បែរជាង កំពុងតែធ្វើការរួចហើយ ក៏បង្ហួសមកបំបៅទឹកដោះគោអោយរ៉ាដា ដែលមានអាយុ ទើបតែបាន ៣ខែ អរគុណច្រើនខ្លាំងណាស់ក្មួយ ទៀ វិចិត្រដែលបានអោយ រ៉ាដា មកពូ»។
សូមរម្លឹកថា កាលពីព្រឹកថ្ងៃទី២៧ ខែមិថុនា ឆ្នាំ២០២១ កម្លាំងចម្រុះ បានដកហូតយកសត្វតោឈ្មោលមួយក្បាលរបស់បុរសជនជាតិចិន នៅផ្ទះវីឡាមួយកន្លែង ស្ថិតនៅផ្ទះលេខ២២ ផ្លូវ៣០៦ ភូមិ៧ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។ កងកម្លាំងចម្រុះ ចាត់ទុកថា សត្វតោឈ្មោលនោះ ជាប្រភេទសត្វព្រៃ ដែលចិញ្ចឹមនៅក្នុងផ្ទះ ដោយខុសច្បាប់។ ដូចនេះ នាយខណ្ឌរដ្ឋបាលព្រៃឈើភ្នំពេញ បានប្រាប់ឱ្យដឹងថា ដោយសារមានប្រជាពលរដ្ឋជិតខាង បានរាយការណ៍ប្រាប់អំពីការចិញ្ចឹមសត្វតោ នៅក្នុងផ្ទះវីឡាខាងលើពីសំណាក់បុរសជនជាតិចិន ទើបអាជ្ញាធរ សហការជាមួយអាជ្ញារមូលដ្ឋាន ចុះស្រាវជ្រាវ ឈានដល់ការចុះដកហូតយកសត្វតោឈ្មោលមួយក្បាលនោះ ដើម្បីបញ្ជូនទៅថែរក្សាទុក នៅសួនសត្វភ្នំតាម៉ៅ។
កាលណោះ ក្រសួងបរិស្ថាន បានប្រកាសថា យោងតាមច្បាប់ ពលរដ្ឋមិនមានសិទ្ធិ ក្នុងការចិញ្ចឹមសត្វព្រៃ ដែលជាប្រភេទសត្វកម្រនោះទេ។ ច្បាប់ ស្តីពី ព្រៃឈើ មាត្រា ៤៩ ចែងថា ការយកធ្វើជាកម្មសិទ្ធិ សន្និធិ ឬថែរក្សាជាលក្ខណៈសួនសត្វ ឬគ្រួសារនូវប្រភេទសត្វក្នុងក្រុមជិតផុតពូជ ត្រូវបានហាមឃាត់ ហើយច្បាប់ស្តីពី តំបន់ការពារធម្មជាតិ មាត្រា ៥៨ កំណត់ថា ការនាំចូល នាំចេញនូវប្រភេទសត្វ រុក្ខជាតិ និងគ្រាប់រុក្ខជាតិ ត្រូវស្នើសុំច្បាប់អនុញ្ញាត។
ក្រសួងបរិស្ថាន ក៏បានប្រកាសអំពាវនាវដល់បងប្អូនប្រជាពលរដ្ឋ ចូលរួមថែរក្សា និងអភិរក្សសត្វព្រៃ និងកុំព្យាយាមចាប់សត្វកម្រៗ មកចិញ្ចឹម នៅតាមផ្ទះ ដែលជាសកម្មភាពខុសច្បាប់ គួរទុកសត្វទាំងនោះ ឱ្យនៅរស់នៅក្នុងព្រៃធម្មជាតិ ដើម្បីបង្កើនការបន្តពូជ បង្កើនចំនួនប្រភេទសត្វកម្រៗ។
ក៏ប៉ុន្តែប៉ុន្មានថ្ងៃក្រោយមក សម្តេចតេជោ នាយករដ្ឋមន្ត្រី ហ៊ុន សែន បានសម្រេចអនុញ្ញាតឲ្យបុរសជនជាតិចិននោះ យកសត្វតោឈ្មោលនោះ ចេញពីសួនសត្វភ្នំតាម៉ៅ យកមកចិញ្ចឹមក្នុងផ្ទះដូចដើមវិញ ដោយសារតែសត្វតោនោះ នឹកម្ចាស់ ដែលជាបុរសចិន ហើយមិនព្រមស៊ីចំណី។
យ៉ាងណាក៏ដោយ សត្វតោឈ្មោលរបស់ជនជាតិចិននោះ ស្លូត ប្រៀបដូចជាសត្វចិញ្ចឹម ហើយក៏មានមហាជន អាចចូលលេង និងថតរូបជាមួយ នៅពេលដឹកយកមកពីភ្នំតាម៉ៅ មកដល់ផ្ទះវីឡា នៅក្នុងរាជធានីភ្នំពេញវិញ៕
ចែករំលែកព័តមាននេះ