សរសៃធូបគឺជាគ្រឿងផ្សំបញ្ចេញផ្សែងក្រអូបឈ្ងប់ត្រូវបានគេជឿថាបង្កើតបរិយាកាសវេទមន្តសម្រាប់ការអញ្ជើញហៅ ឬពាំនាំពាក្យពេចន៍ទៅកាន់បារមីនៃអាទិទេព និងវិញ្ញាណដែលតែងតែមានវត្តមាននៅជុំវិញអាសនៈនៃការបួងសួងនេះ ។ កិច្ចពិធីនៃការអុជធូបត្រូវបានគេជឿថាជាវេទមន្តនៃការបញ្ជូនសារទៅឱ្យនរណាម្នាក់មិនថាជាទេវតា អារុក្ខ អារក្ស អ្នកតា ដួងវិញ្ញាណនៃពួកខ្មោចព្រាយបិសាចឡើយ គឺសារនេះនឹងទៅដល់អ្នកទាំងនោះមិនខាន…
សរសៃធូបគឺជាគ្រឿងផ្សំបញ្ចេញផ្សែងក្រអូបឈ្ងប់ត្រូវបានគេជឿថាបង្កើតបរិយាកាសវេទមន្តសម្រាប់ការអញ្ជើញហៅ ឬពាំនាំពាក្យពេចន៍ទៅកាន់បារមីនៃអាទិទេព និងវិញ្ញាណដែលតែងតែមានវត្តមាននៅជុំវិញអាសនៈនៃការបួងសួងនេះ ។ កិច្ចពិធីនៃការអុជធូបត្រូវបានគេជឿថាជាវេទមន្តនៃការបញ្ជូនសារទៅឱ្យនរណាម្នាក់មិនថាជាទេវតា អារុក្ខ អារក្ស អ្នកតា ដួងវិញ្ញាណនៃពួកខ្មោចព្រាយបិសាចឡើយ គឺសារនេះនឹងទៅដល់អ្នកទាំងនោះមិនខាន ។
អត្ថន័យនៃការអុជធូប គឺជាការផ្សារភ្ជាប់ធាតុក្នុងខ្លួនទៅនឹងញាណទាំង៥នៃរាងកាយរបស់មនុស្ស តាមរយៈក្បួនហោរា ដែលភាសាចិនថា ហុងស៊ុយ ក្នុងន័យទស្សន៍ទាយដឹងអំពីថាមពលរបស់មនុស្ស ដើម្បីប្រើវាធ្វើទំនាក់ទំនងទៅនឹងអ្វីមួយដែលជាបរិស្ថាននៅជុំវិញខ្លួនរបស់ពួកគេ ។ ដូចនេះការអុជធូប ដែលមិនត្រឹមត្រូវតាមក្បួនតម្រា មិនសមប្រកបទៅនឹងការប្រើប្រាស់ត្រូវបានចាត់ទុកថាជាការអុជធូបដែលមិនផ្សារភ្ចាប់ទៅនឹងមជ្ឈដ្ឋានធម្មជាតិនៃញាណ ។ ការអុជធូបនៅក្នុងជំនឿខ្មែរបុរាណតែងតែប្រើប្រាស់នូវការអុជធូបជាចំនួនសេសដែលគិតចាប់ពីចំនួន ១សរសៃ ៣សរសៃ ៥សរសៃ ៧សរសៃ ៩សរសៃ ១១សរសៃ និង២១សរសៃ ចំនួនអុជធូបទាំងនេះ មានន័យដូចតទៅ៖
ចំនួន១សរសៃធូបតំណាងឱ្យដួងវិញាណ ដែលវិលវល់នៅជុំវិញមជ្ឈដ្ឋានរបស់យើង ។ ការអុជប្រកាសប្រាប់ទៅកាន់ដួងវិញ្ញាណ ដែលនូវវិលវល់រកទីមិនឃើញ ។ ឧទាហរណ៍ ការអុជសែនតង្វាយទៅកាន់ព្រលឹងខ្មោច ការអុជសែនបញ្ជៀសពែដើម្បីរំដោះគ្រោះថ្នាក់ផ្សេងៗ ។
ចំនួន៣សរសៃធូប តំណាងឱ្យឋានទាំង៣ ឋានលើ , ឋានកណ្ដាល និងឋាននរក ។ ការផ្សារភ្ជាប់ឋានទាំងបីទៅនឹងសាច់ញាតិប្រាំពីរសន្តាន ឪពុកម្ដាយ និងជីដូនជីតា ដែលកំណត់យកផើងដោតធូបចំនួន៤ស្មើនឹង១២សរសៃ តំណាងខែទាំង១២ ដែលជាទំនាក់ទំនងនៃវិញ្ញាណសាច់ញាតិ អុជចំពោះសាច់ញាតិដែលស្គាល់គ្នា ។
ចំនួន៥សរសៃធូប តំណាងឱ្យការផ្សារភ្ជាប់ញាណទាំង៥របស់មនុស្សទៅនិងមជ្ឈដ្ឋាននៃញាណអាថ៌កំបាំងដែលមិនអាចមើលឃើញដោយភ្នែកទទេបានដូចជា ទេវតាថ្នាក់ទាប ជំនាងផ្ទះ ព្រះភូមិ ម្រេញគង្វាល អរ័ក្ស អ្នកតាជាដើម ។ លទ្ធិថេរវាទនៃពុទ្ធសាសនាត្រូវបានតំណាងឱ្យព្រះពុទ្ធទាំង៥ព្រះអង្គផងដែរ ។
ចំនួន៧សរសៃធូប តំណាងឱ្យការផ្សារភ្ជាប់ញាណទាំង៦ របស់មនុស្សទៅបូកនឹងញាណទសបារមី១ទៀត បានជាញាណនៃការដឹងមុន ដឹងនូវព្រឹត្តិការណ៍មិនល្អអ្វីមួយដែលនឹងអាចកើតឡើងចំពោះពួកគេក្នុងពេលឆាប់ៗខាងមុខ ។ ឧទាហរណ៍ ឪពុកម្ដាយស្លាប់ហើយ រួចបានធ្វើអាសនៈលើកគាត់ជាគ្រូ ត្រូវអុជ៧សរសៃធូប តំណាងឱ្យគុណឪពុក គុណម្ដាយ ដែលអញ្ជើញពួកគាត់មកជាកិច្ចការពារចំពោះកូនចៅ ទាំង៧ថ្ងៃ ។
ចំនួន៩សរសៃធូប តំំណាងឱ្យការឧទ្ទិសចំពោះទសបារមី ដែលមានអាសនៈបាយសីថ្នាក់៩ ដែលជាបារមីខ្លាំងពូកែអាចប្រមើលមើលឃើញ នូវកាលពេលវេលាខាងមុខបានឆ្ងាយដូចទៅនឹងដួងផ្កាយទាំង៩ដួងនៅក្នុងប្រព័ន្ធព្រះអាទិត្យ ។ ឧទាហរណ៍ ការអុជធូបចំពោះតែទេវៈ អទិទេព ដែលមានបារមីខ្លាំងពូកែ លើកអាសនៈជាថ្នាក់៩ ថ្នាក់កម្រិតធំមានទំនាក់ទំនងញាណទៅនឹងការស្នងរូបនៃបុគ្គល ។
ចំនួន១១សរសៃធូប តំណាងឱ្យការផ្សារភ្ជាប់ញាណ ឬព្រលឹងទាំង១០របស់មនុស្សទៅបូកនឹងព្រលឹងវិញ្ញាណខាងក្រៅ១ មិនថាជាវិញ្ញាណទេវតា អារក្សអ្នកតា ឬជាវិញ្ញាណខ្មោចព្រាយបិសាចជាដើម ដែលត្រូវបានអុជអន្ទងហៅដើម្បីមកស្ថិតក្នុងខ្លួនរបស់ពួកគេ ។
ចំនួន២១សរសៃធូប តំណាងឱ្យការឧទ្ទិសសំបូងសង្រូងទៅកាន់ច្រកទ្វារទេវតាទាំង២១ច្រកឱ្យទទួលបានជាក់ច្បាស់អំពីការបន់ស្រន់អ្វីមួយ ឬកិច្ចប្ដឹងប្ដល់អ្វីមួយដែលមិនសុខចិត្ត និងសុំឱ្យពពួកបារមី ឬទេវតាជួយ ។
ទោះជាយ៉ាងណាការអុជធូបនេះបើទោះជាក្នុងជំនឿបែបណាក៏ដោយចុះពិសេសបុណ្យប្រពៃណីធំ តែការអុជធូបបន់ស្រន់ទាំងនោះក៏គួរមានការប្រុងប្រយ័ត្នផង ព្រោះកន្លងមកភ្លើងធូបនេះបានដុតបំផ្លាញផ្ទះសម្បែង ទ្រព្យសម្បត្តិអ្នកស្រុកអស់ជាច្រើនហើយ ៕ សាន សារិន
ចែករំលែកព័តមាននេះ