រាជធានីភ្នំពេញ ៖ និន្នាការប្រើប្រាស់ផលិតផលក្នុងស្រុកពិសេសផលិតផលធ្វើពីដីមានការកើនឡើង បានធ្វើឱ្យសិប្បកម្មស្មួនដី របស់អ្នកខេត្តកំពង់ឆ្នាំងមានទីផ្សារ ។ អ្នកស្រី យង់ សុខា ប្រធានមជ្ឈមណ្ឌលអភិវឌ្ឍន៍កុលាភាជក្នុងខេត្តកំពង់ឆ្នាំង…
រាជធានីភ្នំពេញ ៖ និន្នាការប្រើប្រាស់ផលិតផលក្នុងស្រុកពិសេសផលិតផលធ្វើពីដីមានការកើនឡើង បានធ្វើឱ្យសិប្បកម្មស្មួនដី របស់អ្នកខេត្តកំពង់ឆ្នាំងមានទីផ្សារ ។ អ្នកស្រី យង់ សុខា ប្រធានមជ្ឈមណ្ឌលអភិវឌ្ឍន៍កុលាភាជក្នុងខេត្តកំពង់ឆ្នាំង បានឱ្យដឹងថា ផលិតផលធ្វើដី ឥឡូវមានការគាំទ្រជាងមុខបន្តិច ។ អ្នកស្រីបញ្ជាក់ថា ក្អម និងឆ្នាំងភាគច្រើនគេយកដាក់ម្ហូប ឬសម្រាប់ចម្អិនអាហារ ដូច្នេះផលិតផលបែបនេះមានការកុម្ម៉ង់ទិញច្រើន ។
ម្យ៉ាងវិញទៀត បើតាមប្រធានមជ្ឈមណ្ឌលអភិវឌ្ឍន៍កុលាភាជ មើលឃើញថា ក្នុងស្ថានភាពរាលត្បាតពីជំងឺកូវីដ ១៩ ដែលផលិត ផលពីបរទេសពិបាកនាំចូល អាចជាឱកាសឱ្យពលរដ្ឋងាកមកប្រើផលិតផលក្នុងស្រុក ។ លោកស្រីបន្ថែមថា កន្លងមកដូចជាផើងផ្កាមានការនាំចូលពីក្រៅមកច្រើន តែនៅពេលមានផ្ទុះជំងឺកូវីដ ១៩ ការនាំចូលមានការលំបាក ពលរដ្ឋបានងាកមកប្រើផលិត ផលអ្នកខេត្តកំពង់ឆ្នាំង ។ ចំណែកឆ្នាំងដីដែលកាលពីមុនគេទិញទុកសម្រាប់តែប្រើដាំថ្នាំខ្មែរ តែមកដល់សព្វថ្ងៃនេះគេទិញយកទៅច្នៃជាឆ្នាំងស្លដ៏ទាក់ទាញ បានបង្ហាញពីអត្តសញ្ញាណខ្មែរផង បង្ហាញពីការចូលរួមថែរក្សាបរិស្ថានផង ។ ទោះយ៉ាងអ្នកស្រី យង់ សុខា និយាយថា របរស្មូនដីនេះមិនសូវជាទទួលបានប្រាក់ចំណេញច្រើននោះទេ ដោយសារមានការចំណាយទៅលើវត្ថុធាតុដើមច្រើន និងអាជីពដែលបង្ហាញពីអត្តសញ្ញាខ្មែរនេះមានការនឿយហត់ ប្រើកម្លាំងទៀតផង ។
ឆ្នាំងដីយកទៅដាក់សម្លប្រហើរនំបញ្ចុក កូនចានតូចៗធ្វើពីដី ដាក់បង្អែមធ្វើឱ្យបង្អែមត្រជាក់ និងកាន់តែឈ្ងុយឆ្ងាញ់ ។ គំនិតច្នៃប្រឌិតរបស់អ្នកលក់ ដើម្បីទាក់ទាញចំណាប់អារម្មណ៍អ្នកទិញមិនមែនមានត្រឹមតែសម្រាប់អាហារ នំចំណីនោះទេ ផលិតផលធ្វើពីដីជាច្រើនទៀត ត្រូវបានគេប្រើប្រាស់សម្រាប់តុបតែងតាមសណ្ឋាគារ ភោជនីយដ្ឋានធំៗទៀតផង ។
មានការសង្កេតឃើញថា ការប្រើប្រាស់ផលិតផលក្នុងស្រុកនាពេលបច្ចុប្បន្នត្រូវគេឱ្យតម្លៃ ។ តម្លៃយ៉ាងហោចណាស់ អ្នកបានប្រើប្រាស់ផលិតផលក្នុងស្រុកដូចជារបស់ផលិតចេញពីដីជាដើមនេះ បានបង្ហាញថា អ្នកប្រើប្រាស់នោះបានចូលរួមលើកកម្ពស់ស្នាដៃខ្មែរ ជាអ្នកថែរក្សាអត្តសញ្ញាណជាតិ និងជាអ្នកស្រឡាញ់ធម្មជាតិ បរិស្ថានជាដើម ៕
ចែករំលែកព័តមាននេះ