សម្តេចតេជោ កំពុងជួបពិភាក្សាការងារជាមួយនាយឧត្តមសេនីយ៍ មីន អោងឡាង
- ភ្នំពេញ
រាជធានីភ្នំពេញ ៖ ដូចជា ការគ្រោងទុកនៅរសៀលថ្ងៃទី២៦ ខែមករា ឆ្នាំ ២០២២ សម្ដេចអគ្គមហាសេនាបតីតេជោ ហ៊ុន សែន…
រាជធានីភ្នំពេញ ៖ ដូចជា ការគ្រោងទុកនៅរសៀលថ្ងៃទី២៦ ខែមករា ឆ្នាំ ២០២២ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានទទួលជួបពិភាក្សាការងារតាមប្រព័ន្ធវីដេអូ ជាមួយ ឯកឧត្តម នាយឧត្តមសេនីយ៍ មីន អោងឡាង ពាក់ព័ន្ធស្ថានភាពវិវត្តថ្មីៗនៅមីយ៉ាន់ម៉ា ។ នេះបើតាមការចេញផ្សាយ របស់ទូរទស្សន៍ជាតិកម្ពុជា (ទទក) ។
កាលពីថ្ងៃទី២៥ មករា កន្លងមកនេះ ក្នុងជួបពិភាក្សាការងារតាមប្រព័ន្ធវីដេអូជាមួយលោក Ismail Sabri Yaakob នាយករដ្ឋមន្ត្រីនៃប្រទេសម៉ាឡេស៊ី សម្ដេចថា នឹងជួបពិភាក្សាតាមវីដេអូជាមួយនឹងលោក មីន អោងឡាង ដើម្បីចង់ដឹងបន្ថែមទៀតអំពីការងារទាំងអស់នេះ ។
សម្តេចថា ការជួបនេះក្រោយពីសម្តេចបានទៅទស្សនកិច្ចរបស់សម្ដេចទៅមីយ៉ាម៉ាហើយនោះ ស្រាប់តែមានការកាត់ទោសលោក ជំទាវ អោង សានស៊ូជី រយៈពេល៤ឆ្នាំ និងការប្រើប្រាស់យន្តហោះក្នុងប្រតិបត្តិការយោធា ។
សម្ដេចតេជោ បានមានប្រសាសន៍ថា ពេលនេះស្ថានភាពនៅមីយ៉ាន់ម៉ា មានលក្ខណៈស្មុគស្មាញមែនទែន ដោយសារមានរដ្ឋាភិបាលដល់ទៅពីរឯណោះ រួមទាំងរដ្ឋាភិបាលស្រមោលផងដែរ ។
ក្នុងជំនួបពិភាក្សាជាមួយសម្តេចតេជោ លោកនាយករដ្ឋមន្ត្រីម៉ាឡេស៊ីក៏បានអំពាវនាវអោយមានការដោះលែងអ្នកទោសនយោបាយទាំងអស់នៅប្រទេសមីយ៉ាន់ម៉ា រួមទាំងលោកជំទាវ អោង សានស៊ូជីផងដែរ ។
លោកថា ទាក់ទងទៅនឹងជំនួយមនុស្សធម៌ តាមរយៈមជ្ឈមណ្ឌលអាហារ ដែលត្រូវធ្វើយ៉ាងណាឲ្យបានទៅដល់ដៃប្រជាពលរដ្ឋមីយ៉ាន់ម៉ា ។
សូមរំលឹកថា សម្តេចតេជោ ហ៊ុន សែន ធ្លាប់បានអះអាងរួចហើយថា ការដោះស្រាយវិបត្តិរបស់មីយ៉ាន់ម៉ា គឺត្រូវឈរលើគោលការណ៍រួមទាំង៥ ដែលអាស៊ានបានសម្រេច កាលពីខែមេសា ឆ្នាំ២០២១ ក្នុងកិច្ចប្រជុំកំពូលពិសេសនៅឥណ្ឌូនេស៊ីស្តីពីបញ្ហារបស់មីយ៉ាន់ម៉ា ។
គោលការណ៍រួមទាំង៥នោះរួមមាន ៖ ទី១. បិទបញ្ចប់អំពើហិង្សា, ទី២. រៀបចំកិច្ចសន្ទនាក្នុងន័យស្ថាបនា ក្នុងចំណោមភាគីពាក់ព័ន្ធ,ទី៣. បញ្ជូនជំនួយមនុស្សធម៌ចូលទៅក្នុងមីយ៉ាន់ម៉ា, ទី៤. តែងតាំងប្រេសិតពិសេស ដើម្បីសម្របសម្រួលកិច្ចពិភាក្សា និងទី៥. អនុញ្ញាតឱ្យប្រេសិតពិសេសចូលទៅក្នុងប្រទេសនេះ ។
ដំណើរទស្សនកិច្ចរបស់សម្តេចតេជោទៅកាន់ប្រទេសមីយ៉ាន់ម៉ាបានកំពុងស្ថិតក្នុងការចាប់អារម្មណ៍ និងតាមដានយ៉ាងយកចិត្តទុកដាក់ពីបណ្តាញផ្សព្វផ្សាយ និងមេដឹកនាំប្រទេសនានាក្នុងតំបន់ និងលើពិភពលោក ៕
ចែករំលែកព័តមាននេះ