រាជធានីភ្នំពេញ ៖ លើសពីតំបន់ដែលពោលពេញដោយសក្តានុពលទេសចរធម្មជាតិដ៍ទាក់ទាញនោះ ខេត្តស្ទឹងត្រែង នៅមានមុខម្ហូបពិសេសចំនួន ៥ មុខទៀតដែលធានាថាឆ្ញាញ់ប្លែក ក្នុងការបម្រើភ្ញៀវទេសចរដែលបានទៅដល់ទឹកដីខេត្តជាប់ទន្លេមេគង្គមួយនេះ ។ ម្ហូបទាំង ៥ មុខនេះ ទំនងនៅខេត្តដទៃពុំមាននោះទេ ។
លោក អ៊ន់ ប៉ាសឿន ប្រធានមន្ទីរទេសចរណ៍ខេត្តស្ទឹងត្រែង បានឱ្យដឹងថា ខេត្តស្ទឹងត្រែង គឺជាតំបន់ទេសចរណ៍បែបវប្បធម៌ ប្រពៃណី និងអេកូទេសចរដ៏សម្បូរបែប បើប្រៀបធៀបទៅនិងបណ្តាខេត្តមួយចំនួនទៀតនៅកម្ពុជា ។ លើសពីនេះ ខេត្តស្ទឹងត្រែង នៅមានអ្វីដែលប្លែកពីគេទៀត គឺម្ហូបពិសេសៗចំនួន ៥ មុខ ដែលធានាថា មានរស់ជាតិឆ្ងាញ់ និងទាក់ទាញភ្ញៀវទេសចរជាខ្លាំង ។
ម្ហូបទាំង ៥ មុខនោះ រួមមានស្ងោរជ្រក់ត្រីប៉ាស៊ីអ៉ី ភ្លាត្រី ឆាគ្រឿងត្រីខ្យា ស្ងោរទឹកប្រហុកត្រីថ្ម ឬស្ងោរភាប៉ាកក និងសេក (សាច់ជ្រូក) ។ ម្ហូបទាំង ៥ មុខនេះប្រហែលជាបណ្តាខេត្តផ្សេងៗទៀតពុំមាននោះទេ ។ តួយ៉ាងដូចជាស្ងោរជ្រក់ត្រីប៉ាស៊ីអ៉ី ត្បិតអីត្រីប៉ាស៊ីអ៉ី មានតែក្នុងទន្លេមេគង្គ និងខេត្តស្ទឹងត្រែងនេះតែម្តង ។
លោក អ៊ន់ ប៉ាសឿន បាននិយាយបន្ថែមថា ចាប់ពីខែវិច្ឆិកា ដល់ខែមិថុនា ជារដូវកាលដែលទន្លេមេគង្គមានទេសភាពស្រស់ត្រកាល ។ កំលុងពេលនោះ ខេត្តបានផ្តោតសំខាន់ទេសចរតាមដងទន្លេមេគង្គ ដែលទាក់ទាញបំផុត គឺតំបន់ប្រាំសាមទន្លេមេគង្គ ដែលពោរពេញដោយសក្តានុពលបែបធម្មជាតិ ដែលអ្នកទេសចរអាចទស្សនាព្រៃលិចទឹក វាលខ្សាច់ដ៏វែងអន្លាយ និងពណ៌សក្បោះ និងហ្វូងសត្វស្លាប ។
ទន្ទឹមនោះ យើងក៏មានការរៀបចំសេវាកម្មសម្រាប់ភ្ញៀវទេសចរជិះទូកលេងកម្សាន្តតាមតំបន់ទន្លេមេគង្គ និងតំបន់ណាមសាប ។ ការជិះទូកថៃយ៉ាក់លេងកម្សាន្តនោះ យើងបានយកចិត្តទុកដាក់ក្នងការការពារសុវត្ថិភាពភ្ញៀវទេសចរណាស់ ។ នេះជាការបញ្ជាក់របស់លោកប្រធានមន្ទីរទេសចរណ៍ខេត្តស្ទឹងត្រែង ។
ចែករំលែកព័តមាននេះ