ខេត្តព្រះសីហនុ ៖ មាសពេជ្រ កែវកង រួមនឹងរបស់មានតម្លៃជាច្រើននៅក្នុងផ្ទះថៅកែលក់ខ្សាច់ លក់ថ្ម ស្ថិតនៅ ភូមិ៣ សង្កាត់៣ ក្រុងព្រះសីហនុ ត្រូវបានចោរគាស់ផ្ទះចូលលួចយកអស់គ្មានសល់ ខណៈពេលដែលម្ចាស់ផ្ទះមិននៅ ។ ហេតុការណ៍ចោរគាស់ផ្ទះនេះបានកើតឡើងនៅវេលាម៉ោងប្រមាណ៧ និង៣០នាទីព្រឹក ថ្ងៃទី០៨ ខែ កក្កដា ឆ្នាំ២០១៦ ។
លោក ស៊ុន រី អាយុ៤៤ឆ្នាំ និងអ្នកស្រី សាន ណៃសេង អាយុ៤៣ឆ្នាំ ជាម្ចាស់ផ្ទះ មានមុខរបរជាថៅកែលក់ខ្សាច់លក់ថ្ម នៅចំណុចជាប់ស្ថានីយប្រេងឥន្ធនៈ សូគីម៉ិច (ក្បែរភ្លើងស្តុបផ្លូវបំបែករ៉ា) បានឲ្យដឹងថា នៅមុនពេលកើតហេតុម៉ោងប្រហែល៧ព្រឹក គាត់និងក្រុមគ្រួសារបានចេញទៅកន្លែងដេប៉ូលក់ខ្សាច់ លក់ថ្ម ដូចសព្វមួយដង ហើយផ្ទះទាំងមូលមិនមាននរណាម្នាក់នៅទេ ក្រោយមកនៅវេលាម៉ោងប្រមាណ៧ និង៣០នាទី ក៏ស្រាប់តែកូនប្រុសរបស់គាត់បានទៅចូលផ្ទះ ហើយក៏ឃើញផ្ទះផ្នែកខាងក្រោយបង្អួចត្រូវបានចោរគាស់ចូល និង ជាន់ទី២ ក៏ត្រូវចោរគាស់ចូលក្នុងបន្ទប់ធ្វើការងាររបស់គាត់ដែរ ។ ភ្លាមៗនោះកូនប្រុសគាត់ក៏បានទូរស័ព្ទប្រាប់គាត់ គាត់ក៏ត្រឡប់មកដល់ផ្ទះវិញទើបដឹងថា សម្ភារៈមានតម្លៃជាច្រើនត្រូវបានបាត់បង់អស់គ្មានសល់ ដូចជា មាសជាង១០ តម្លឹង, ខ្សែកពេជ្រ តម្លៃជាង២ម៉ឺនដុល្លារ, ចិញ្ចៀនពេជ្រ១វង់ តម្លៃជាង៧ពាន់ដុល្លារ, លុយ៧០០ដុល្លារ រួមនឹងក្បាលកាមេរ៉ាសុវត្ថិភាពផងដែរ ។
អ្នកស្រី សាន ណៃសេង បានបន្តទៀតថា ទ្រព្យសម្បត្តិជាច្រើនត្រូវបានបាត់បង់អស់ហើយ ប៉ុន្តែអ្វីដែលគាត់មានការងឿងឆ្ងល់នោះ សូម្បីតែក្បាលកាមេរ៉ាសុវត្ថិភាពដែលជាប្រអប់ថតចម្លងទិន្នន័យ ក៏ត្រូវចោរនោះលួចយកទៅអស់គ្មានសល់ ចំណុចនេះគាត់មានការសង្ស័យថា ចោរដែលលួចនោះទំនងជាមនុស្សធ្លាប់ស្គាល់ ធ្លាប់ចេញចូលផ្ទះគាត់ច្បាស់ ទើបអាចដឹងគ្រប់កន្លុកកន្លៀត បន្ទប់ធ្វើការ និង កន្លែងដាក់ក្បាលកាមេរ៉ា ។
បច្ចុប្បន្ន ជុំវិញករណីនេះ សមត្ថកិច្ចប៉ូលិសសង្កាត់លេខ៣កំពុងចុះធ្វើការស្រាវជ្រាវនៅផ្ទះកើតហេតុ ដើម្បីស្វែងរកការពិតពាក់ព័ន្ធជនសង្ស័យដែលចូលលួចទ្រព្យសម្បត្តិផ្ទះខាងលើ ដោយគេសង្ឃឹមថា ក្រុមចោរលួចនឹងអាចរកឃើញក្នុងពេលឆាប់ៗ ៕
ចែករំលែកព័តមាននេះ