កាន់តែកៀកថ្ងៃចូលឆ្នាំចិនទៅហើយ គេឃើញបងប្អូនជនជាតិចិន កូនខ្មែរជាប់សែស្រឡាយចិនហាក់មានការមមាញឹកជាខ្លាំងដោយមានអ្នកខ្លះបានចាប់ផ្តើមទិញគ្រឿងរណ្តាប់សម្រាប់សែនត្រៀមទុកឱ្យហើយ ខ្លះក៏ចាប់ផ្តើមបោសសម្អាតផ្ទះជាបណ្តើរៗហើយ ដើម្បីទទួលទេវតាឆ្នាំថ្មីដែលនឹងចុះមករក្សាមនុស្សលោកក្នុងពេលឆាប់នេះ ។ យោងតាមប្រតិទិនហុងស៊ុយចិនសែសម្រាប់ឆ្នាំ២០២២ ដែលជាឆ្នាំខាល ឬឆ្នាំខ្លា គេជឿថាមានពណ៌៤ដែលជាពណ៌នាំលាភសំណាង៖
១. ពណ៌ខ្មៅ ពណ៌នេះជានិមិត្តសញ្ញានៃចលនាដ៏រឹងមាំ, ចំណង់ចំណូលចិត្ត, សេចក្តីស្រលាញ់ដ៏ស្មោះអស់ពីដួងចិត្ត និងតំណាងឱ្យធាតុភ្លើង ហើយជាពណ៌នាំសំណាងសម្រាប់អ្នក ដែលកំពុងមានទំនាក់ទំនងស្នេហា ឬកំពុងមានបុត្រធីតា និងតំណាងឱ្យទ្រព្យសម្បត្តិសម្បូរយូរអង្វែង ។ ថ្វីបើពណ៌នេះនាំសំណាងដល់ជីវិតស្នេហាក៏ពិតមែន តែវាក៏អាចងាយនឹងនាំឱ្យកើតមានកំហឹងផងដែរ មិនគួរប្រើឱ្យជោកជាំពេកទេ ។
២. ពណ៌ទឹកប៊ិក ពណ៌នេះជានិមិត្តសញ្ញានៃចំណេះដឹង ប្រជ្ញា និងការរៀបចំទុកដាក់ដែលជាពណ៌ល្អបង្ហាញពីការទិញទ្រព្យសម្បត្តិ ផ្ទេរទំនិញមានតម្លៃ អ្នករកស៊ីមុខជំនួញធំៗ ប៉ុន្តែមិនត្រូវប្រើប្រាស់ពណ៌នេះជ្រុលហួសហេតុពេកទេ វាអាចនឹងបង្កឱ្យក្លាយជាភាពរង្គោះរង្គើនៅក្នុងជីវិតគ្រួសារបាន ។
៣. ពណ៌ស ពណ៌នេះតំណាងឱ្យធាតុឈើ ប្រសិទ្ធភាពនៃការព្យាបាល ការលូតលាស់ ការច្នៃប្រឌិត និងភាពសុខសប្បាយ ។ ពណ៌សនឹងនាំសំណាងល្អដល់មនុស្សដែលផ្លាស់ប្តូរទីកន្លែងការងារ ឬកំពុងចាប់ផ្តើមដំណើរការអាជីវកម្មថ្មីថ្មោង ប៉ុន្តែមិនត្រូវប្រើច្រើនហួសហេតុពេកទេព្រោះវានឹងអាចនាំឱ្យមានការច្រណែនឈ្នានីសអំពីអ្នកដទៃ ។
៤. ពណ៌បៃតងស្រាល ពណ៌នេះតំណាងនៃម្លប់ដ៏ត្រជាក់ត្រជំ ភាពរីករាយ សេរីភាព និងភាពស្ងប់ស្ងាត់ ។ ពណ៌នេះគេជឿថាជាពណ៌ពង្រឹងនៃសំណាងក្នុងការងារ ការទំនាក់ទំនង និងការចរចាគ្រប់កិច្ចការ ។ ពណ៌នេះល្អខ្លាំងសម្រាប់អ្នកដែលជួបសម្ភាសការងារ និងការចេញជួបអតិថិជនជាដើម ។ ប៉ុន្តែការប្រើប្រាស់ពណ៌នេះច្រើនហួសហេតុពេកនឹងធ្វើឱ្យធាតុទឹកសកម្មខ្លាំងជ្រុលនឹងនាំឱ្យត្រជាក់ខ្លាំងបង្កទៅជាអសកម្មនៃកិច្ចការនានាក៏សឹងកើតមាន ។
គ្រូហុងស៊ុយចិនសែបានបញ្ជាក់ថា ត្រូវប្រយ័ត្នពណ៌ឆុង គឺពណ៌ក្រហម និងពណ៌លឿង ។ ដើម្បីប្រើពណ៌ទាំងបួននេះចូលជាមួយគ្នាឱ្យកាន់តែមានង៉ូវហេង និងភាពសុខសាន្ត យើងត្រូវប្រើពណ៌ផ្ទៃមេឃលាយបញ្ចូល ដោយអាចរំលេចពណ៌ខៀវ ឬពណ៌ស រាងច្រើនបន្តិចផង ដើម្បីជាការទាញចូលលាភសំណាងល្អហូរចូលផ្ទះច្រើនៗពេញមួយឆ្នាំ២០២២ ៕ សាន សារិន
ចែករំលែកព័តមាននេះ