ប្រទេសវៀតណាមគ្រោងទិញវ៉ាក់សាំង Pfizer/BioNTech ចំនួន ២១,៩លានដូសដើម្បីធ្វើការចាក់ឲ្យកុមារអាយុពី ៥ទៅ ១១ឆ្នាំ។ រដ្ឋមន្ត្រីសុខាភិបាលលោក Nguyễn Thanh Long…
ប្រទេសវៀតណាមគ្រោងទិញវ៉ាក់សាំង Pfizer/BioNTech ចំនួន ២១,៩លានដូសដើម្បីធ្វើការចាក់ឲ្យកុមារអាយុពី ៥ទៅ ១១ឆ្នាំ។
រដ្ឋមន្ត្រីសុខាភិបាលលោក Nguyễn Thanh Long បានបង្ហាញពីគម្រោងនេះនៅក្នុងកិច្ចប្រជុំកាលពីពេលថ្មីៗនេះ ដោយលោកថ្លែងថាផែនការចាក់វ៉ាក់សាំងសម្រាប់កុមារកំពុងរងចាំការអនុម័តពីរដ្ឋាភិបាល។
លោកបានថ្លែងថា អង្គការសុខភាពពិភពលោកបានចេញអនុសាសន៍សម្រាប់ការចាក់វ៉ាក់សាំងដល់កុមារអាយុពី ១២ ទៅ ១៧ឆ្នាំ ប៉ុន្តែមិនទាន់ចេញការណែនាំស្តីពីការវ៉ាក់សាំងសម្រាប់កុមារអាយុពី ៥ ទៅ ១១ឆ្នាំឡើយ ដូច្នេះក្រសួងនឹងធ្វើកិច្ចកការនេះដោយយកចិត្តទុកដាក់ តាមបែបវិទ្យាសាស្ត្រ និងគណនេយ្យភាព និងរៀនពីប្រទេសទាំងអស់ដែលបានចាប់ផ្តើមកម្មវិធីចាក់វ៉ាក់សាំងរួច។
លោកថ្លែងថា «នេះគឺជារឿងសំខាន់។ យើងមិនអាចធ្វេសប្រហែសឡើយ និងត្រូវធ្វើបន្តិចម្តងៗ ប៉ុន្តែរឹងមាំ ដើម្បីធានាសុវត្ថិភាពដល់កុមារ»។
បើតាមរបាយការណ៍ពីមូលដ្ឋាននានា នៅដើមឆ្នាំ ២០២២នេះ មានកុមារសរុបទាំងអស់អាយុ ចន្លោះ ៥ និង ១១ឆ្នាំ មានចំនួន ១១,៥លាននាក់នៅវៀតណាម។
វៀតណាមបានធ្វើការចាក់វ៉ាក់សាំង Pfizer និង Moderna សម្រាប់កុមារអាយុ ១២ ទៅ ១៧ឆ្នាំកាលពីខែវិច្ឆការឆ្នាំមុន។ ការចាក់ភាគច្រើនត្រូវបានធ្វើឡើងនៅតាមសាលារៀន។ រហូតមកដល់ពេលនេះ មានការចាក់បានសរុប ១៥,៣លានដូសសម្រាប់ក្រុមនេះ រួមមាន ៧,០៦លានដែលជាដូសទី ២។
គិតត្រឹមថ្ងៃទី ២១ ខែមករា វៀតណាមមានការឆ្លងកូវីដ ១៩សរុបជាង ២,០៩លានករណី និងស្លាប់ ៣៦.២៦៦នាក់៕ (យោងតាមប្រភព៖ Vietnam News)
ចែករំលែកព័តមាននេះ