ខេត្តប៉ៃលិន ៖ ការរាតត្បាតជំងឺកូវីដ ១៩ បានធ្វើឱ្យមុខរបរមួយចំនួនមិនអាចដំណើរការបានពិសេសទាក់ទងវិស័យសេវាកម្មជាដើមនោះ ។ ខុសពីមនុស្សជាច្រើនមិនអាចធ្វើអ្វីកើតជាមួយការភ័យបារម្ភពីកូវីដ ១៩ នេះ លោក ហៀន ហន ដែលជាកសិករម្នាក់នៅខេត្តប៉ៃលិន បានសំងំដាំចេកណាំំវ៉ា បានប្រមាណ ១ ពាន់គុម្ព ដើម្បីផ្គត់ផ្គង់ជីវភាព ។
កសិកររូបនេះមាន អាយុ ៣៨ ឆ្នាំ រស់នៅក្នុងភូមិថ្នល់ទទឹង ឃុំអូរអណ្តូង ស្រុកសាលាក្រៅ ខេត្តប៉ៃលិន ។ លោក ហៀន ហន បានរៀបរាប់ឱ្យដឹងថា លោកបានចាប់ផ្តើមដាំដំណាំចេកណាំវ៉ា ជាប្រភេទចេកស បានជិត ១ ឆ្នាំមកហើយ សរុបបានចំនួន ១៣០០ គុម្ព នៅលើដីចម្ការចំនួន ៤,៥ ហិកតា ។ រហូតមកដល់ពេកនេះដាំណាំចេករបស់លោកបាន ប្រមូលផល ២ ទៅ ៣ ដងហើយ ។
កសិកររូបនេះនិយាយថា ចេកណាំវ៉ាមានទីផ្សារល្អ ងាយស្រួលលក់ ។ មានម៉ូយបើកបររថយន្តមកពីតាមបណ្តានានា ដូចជា ខេត្តបន្ទាយមានជ័យ ខេត្តបាត់ដំបង និងខេត្តសៀមរាប មកទិញចេករបស់លោក ។ ហៀន ហើន និយាយទាំងញញឹមថា គេចូលមកទិញទាំងស្ទងចេក រាប់ចំនួនស្និត គឺ ១ ស្និត ឈ្មួញទិញក្នុងតម្លៃ ១០០០ ទៅ ១១០០ រៀល ។ ក្នុង ១ ខែ អាចប្រមូលផលម្តង ពោលគឺតាំងពីដាំរហូតមកដល់ពេលនេះ ប្រមូលផលបានជិត ១០០០ ស្និតហើយ ។
ទោះយ៉ាងណាការដាំចេករបស់កសិករខាងលើមានបញ្ហាមួយចំនួនផងដែរ ទោះមិនមានបញ្ហាទីផ្សារ តែមានបញ្ហាទឹកស្រោចស្រព ។ លោក ហៀន ហន និយាយថា កាលពីរដូវប្រាំងឆ្នាំ ២០២១ ចេករបស់លោកមួយចំនួនបាន ងាប់សារគ្មានទឹក ។ កាលនោះរដូវប្រាំងបានអូសបន្លាយយូរពេកហើយលោកគ្មានប្រព័ន្ធទុយោទឹកបូមស្រោចតាមគុម្ពចេកនីមួយៗ ។ កសិករដែលកំពុងពេញចិត្តនឹងផលដំណាំចេគនិយាយថា ចេកជារុក្ខជាតិហូបផ្លែ ដែលងាយស្រួលដាំដុះ មិនសូវមានការលំបាកខ្លាំងដូចដំណាំផ្សេងនោះទេ ដោយការពារកុំឱ្យមានករណីភ្លើងឆេះព្រៃ និងក្រាស៊ីដើមជាការស្រេច ៕
ចែករំលែកព័តមាននេះ