រាជធានីភ្នំពេញ ៖ នៅក្នុងឱកាសនៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលបានប្រព្រឹត្តទៅក្នុងរយៈពេល៣ថ្ងៃ នៅក្នុងរាត្រីទី២ នៃព្រះរាជពិធីបុណ្យនេះ គឺចំថ្ងៃ១៥កើត ពេញបូណ៌មី ខែកត្តិក ត្រូវនឹងថ្ងៃទី២១ វិច្ឆិកា ឆ្នាំ២០១០ ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុតបានសព្វព្រះរាជហឫទ័យ ស្តេចយាងជាព្រះរាជាធិបតីដ៏ខ្ពង់ខ្ពស់នៅក្នុងព្រះរាជពិធីបុណ្យសំពះព្រះខែ និងអកអំបុកដែលបានរៀបចំឡើងយ៉ាងមហោឡារិកនៅក្នុងព្រះទីនាំងទេវាវិនិច្ឆ័យនៃព្រះបរមរាជវាំង ។
ព្រះរាជពិធីបុណ្យសំពះព្រះខែ និងអកអំបុកត្រូវបានអតីតព្រះមហាក្សត្រខ្មែរគ្រប់ជំនាន់បន្តរហូតដល់ព្រះករុណាជាអម្ចាស់ជីវិតតម្កល់លើត្បូង ព្រះបាទសម្តេចព្រះបរមនាថ ព្រះមហាក្សត្រនៃ ព្រះរាជាណាចក្រកម្ពុជា គោរពបូជា និងប្រារព្ធឡើងជារៀងរាល់ឆ្នាំក្នុងព្រះរាជហឫទ័យប្រកបដោយសទ្ធាជ្រះថ្លា ដើម្បីថែរក្សា និងលើកតម្កើងព្រះរាជពិធីបុណ្យប្រពៃណីរបស់ជាតិយើងទាំងមូល និងនាំមកនូវសិរីសួស្តី ជ័យមង្គលដល់របរកសិកម្ម ស្រែចំការរបស់ប្រជាកសិករកម្ពុជា ជាបងប្អូនកូនចៅរបស់ព្រះអង្គឱ្យទទួលបានទិន្នផលខ្ពស់ក្នុងឆ្នាំក្រោយៗបន្តទៀត ។
ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុកក្នុងឆ្នាំនេះបានប្រព្រឹត្តទៅ បន្ទាប់ពីព្រះរាជពិធីបុណ្យដ៏ឧត្តុង្គឧត្តម និងជាប្រវត្តិសាស្ត្ររបស់ជាតិចំនួន៣ គឺព្រះរាជពិធីបុណ្យយាងឡើងគ្រងរាជសម្បត្តិគំរប់ខួប៦ឆ្នាំ របស់ព្រះករុណាជាអម្ចាស់ជីវិតតម្កល់លើត្បូងព្រះមហាក្សត្រនៃព្រះរាជាណាចក្រកម្ពុជា ព្រះរាជពិធីបុណ្យចំរើនព្រះជន្មវស្សាគំរប់៨៨យាងចូល៨៩ព្រះវស្សា របស់ព្រះករុណាព្រះបាទសម្តេចព្រះមហាវីរក្សត្រ ព្រះវររាជបិតាជាតិខ្មែរជាទីសក្ការៈដ៏ខ្ពង់ខ្ពស់បំផុត និងពិធីបុណ្យឯករាជ្យជាតិខួបអនុស្សាវរីយ៍លើកទី៥៧ (៩ វិច្ឆិកា ១៩៥៣-៩ វិច្ឆិកា ២០១០)។ តាមរយៈព្រះរាជបូជនីយកិច្ចទាមទារឯករាជ្យរបស់ព្រះមហាវីរក្សត្រនេះ ហើយធ្វើឱ្យប្រជាជាតិកម្ពុជាកូនចៅ ចៅទួតរបស់ព្រះអង្គចងចាំជានិច្ចគ្មានថ្ងៃបំភ្លេចបាន ចំពោះព្រះរាជគុណូបក្ការៈដ៏ធំធេងមិនអាចគណនាបានរបស់ព្រះករុណាព្រះវររាជបិតាជាតិខ្មែរ សម្តេចព្រះវររាជមាតាជាតិខ្មែរ និងព្រះករុណាព្រះមហាក្សត្រដែលបានប្រោសព្រះរាជទានដល់ជាតិមាតុភូមិ និងប្រជារាស្ត្រកម្ពុជាតាំងពីអតីតកាល ជាពិសេសចាប់តាំងពីសម័យសង្គមរាស្ត្រនិយមដ៏រុងរឿងបន្តរហូតមកដល់សម័យបច្ចុប្បន្ន ។
យាង និងអញ្ជើញចូលរួមដង្ហែព្រះរាជសកម្មភាពព្រះករុណាជាអម្ចាស់ជីវិតតម្កល់លើត្បូងជាទីសក្ការៈដ៏ខ្ពង់ខ្ពស់ក្នុងឱកាសនោះមានសម្តេចរាជបុត្រីព្រះរៀមនរោត្តម បុប្ផាទេវីសមាជិកាព្រឹទ្ធសភា សម្តេចនរោត្តម សិរីវុឌ្ឍ ឧត្តមប្រឹក្សាផ្ទាល់ព្រះមហាក្សត្រ និងអ្នកម្នាង សម្តេចចៅហ្វាវាំងគង់ សំអុល ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង លោកគុយ សុផល ទេសរដ្ឋមន្ត្រី ទទួលបន្ទុកកិច្ចការទូទៅអមក្រសួងព្រះបរមរាជវាំង ព្រមទាំងព្រះរាជវង្សានុវង្ស លោកជំទាវជាឧត្តមប្រឹក្សាផ្ទាល់ព្រះមហាក្សត្រថ្នាក់ដឹកនាំ និងនាហ្មឺនសព្វមុខមន្ត្រីព្រះបរមរាជវាំង ។
បន្ទាប់ពីព្រះករុណាជាអម្ចាស់ជីវិតតម្កល់លើត្បូងជាទីសក្ការៈដ៏ខ្ពង់ខ្ពស់ ស្តេចយាងថ្វាយគ្រឿងសក្ការៈបូជារួចមក អ្នកឧកញ៉ាភក្តីព្រះស្តេច ហេង គឹមគុណ ធម្មការ និងសាសនាព្រះបរមរាជវាំងបានតាំងនមស្ការព្រះរតនត្រ័យ និងថ្វាយតង្វាយក្នុងព្រះរាជពិធីបុណ្យដ៏មង្គលនេះ មានរៀបចំគ្រឿងសក្ការៈបូជាផ្សេងៗ មានទាំងតូរ្យតន្ត្រីប្រគំថ្វាយនូវបទ សាធុការ ក្លុំ ជើត ឆា បញ្ចុះ លាអុំទូក ទេពរំដួល ទេពនិម្មិត ទេពបន្ទំ អាយុយឺនយូរ និងបទកំសាន្តសួនសួគ៌ជាដើម ថ្វាយចំពោះព្រះរតនត្រ័យ ព្រះចង្កូមកែវ ដែលទ្រង់ព្រះសណ្ឋិតគង់នៅឋានភុជង្គនាគ ព្រះពុទ្ធបាទ ស្ថិតនៅក្នុងស្ទឹងយោនកបូរី ព្រះចូឡាមុនីចេតិយ ព្រះស្ថិតនៅក្នុងឋានតាវត្តឹង្ស ព្រះចេតិយស្ថិតនៅឋានព្រហ្មលោក ព្រមទាំងសម្តេចព្រះអមរិន្ទ្រាទេវរាជ សម្តេចព្រះមហាព្រហ្ម និងទេវតាថែរក្សាព្រះមហាស្វេតច្ឆត្រជាដើម ។
ព្រះរាជពិធីនេះ បានកំណត់ចូលពីថ្ងៃ១៤កើត ខែកត្តិក ឆ្នាំខាល ទោស័ក ពុទ្ធសករាជ២៥៥៤ ត្រូវនឹងថ្ងៃទី២០ វិច្ឆិកា ឆ្នាំ២០១០ ដរាបដល់ថ្ងៃ ១៥កើត ខែកត្តិក ជាថ្ងៃពេញបូណ៌មីព្រះចន្ទពេញវង់ ព្រះករុណាជាអម្ចាស់ជីវិតតម្កល់លើត្បូង ព្រះបាទសម្តេច ព្រះបរមនាថ ព្រះចៅក្រុងកម្ពុជាធិបតី ព្រះអង្គមានព្រះរាជសទ្ធាដ៏ប្រសើរជ្រះថ្លាក្រៃលែងនៅក្នុងព្រះពុទ្ធសាសនា ហើយបានត្រាស់បង្គាប់ឱ្យសម្តេចចៅហ្វាវាំងគង់ សំអុល រៀបចំគ្រឿងសក្ការៈមួយផ្នែកទៀត មានអំបុក ចេក ដូង ដំឡូង ត្រាវជាដើម សុទ្ធសឹងជាផលិតផលដំណាំក្នុងស្រុក និងអុជទៀនធូបប្រទីបជ្វាលា បំភ្លឺព្រោងព្រាត ថ្វាយព្រះខែ បូជាចំពោះព្រះបរមរូបព្រះសៈសៈ បណ្ឌិតបរមពោធិសត្វ ដែលទ្រង់ព្រះសណ្ឋិតតាំងនៅក្នុងវង់ព្រះ ចន្ទសព្វថ្ងៃនេះ ព្រមទាំងព្រះបញ្ចៈវៈលាហៈកៈ គ្រប់ព្រះអង្គ ទេវតាគ្រប់ព្រះអង្គតាមព្រះរាជបវេណីតាំងពីបូរាណកាលរៀងមក ។
ម្យ៉ាងទៀតព្រះរាជពិធីបុណ្យនេះ នៅបានបួងសួងចង់ដឹងអំពី ឧទកៈធារា ឬដំណើរទឹកភ្លៀងដែលទេវតាគ្រប់ព្រះអង្គ ពិសេសព្រះបញ្ចៈវៈលាហៈកៈជួយបង្អុរទឹកភ្លៀងឱ្យបានធ្លាក់ចុះទៅលើប្រឹថពីនៃព្រះរាជាណាចក្រកម្ពុជា ទាំង២៤រាជធានី និងខេត្តក្នុងឆ្នាំថោះត្រីស័ក ពុទ្ធសករាជ ២៥៥៥ ឆ្នាំក្រោយនេះ ថាតើរាជធានី និងបណ្តាខេត្តណាខ្លះមានភ្លៀងធ្លាក់ច្រើនជាងគេ ដោយសន្មត់យកទៀនទាំង២៤ដើម តំណាងឱ្យរាជធានី និងខេត្តទាំង២៤ ។ ក្នុងកិច្ចដំណើរការសំរក់ទៀនផ្សងចង់ដឹងអំពីទឹកភ្លៀង ធម្មការ និងសាសនាព្រះបរមរាជវាំងបានធ្វើការគន់គូរកំណត់យកទៀន ដោយរាប់ពីក្បាលនាគទៅកន្ទុយនាគ ក្នុងនោះទៀនទី ១ តំណាងឱ្យទឹកភ្លៀងខេត្តកណ្តាល, ទៀនទី២ តំណាងឱ្យទឹកភ្លៀងខេត្តកំពត, ទៀនទី៣ តំណាងឱ្យទឹកភ្លៀងខេត្តកំពង់ចាម, ទៀនទី៤ តំណាងឱ្យទឹកភ្លៀងខេត្តកំពង់ធំ, ទៀនទី៥ តំណាងឱ្យទឹកភ្លៀងខេត្តកំពង់ឆ្នាំង, ទៀនទី៦ តំណាងឱ្យទឹកភ្លៀងខេត្តកំពង់ស្ពឺ, ទៀនទី៧ តំណាងឱ្យទឹកភ្លៀងខេត្តកែប, ទៀនទី៨ តំណាងឱ្យទឹកភ្លៀងខេត្តកោះកុង, ទៀនទី៩ តំណាងឱ្យទឹកភ្លៀងខេត្តក្រចេះ, ទៀនទី១០ តំណាងឱ្យទឹកភ្លៀងខេត្តតាកែវ, ទៀនទី១១ តំណាងឱ្យទឹកភ្លៀងខេត្តបាត់ដំបង, ទៀនទី១២ តំណាងឱ្យទឹកភ្លៀងខេត្តបន្ទាយមានជ័យ, ទៀនទី១៣ តំណាងឱ្យទឹកភ្លៀងខេត្តប៉ៃលិន, ទៀនទី១៤ តំណាងឱ្យទឹកភ្លៀងខេត្តពោធិ៍សាត់, ទៀនទី១៥ តំណាងឱ្យទឹកភ្លៀងខេត្តព្រៃវែង, ទៀនទី១៦ តំណាងឱ្យទឹកភ្លៀងខេត្តព្រះវិហារ, ទៀនទី១៧ តំណាងឱ្យទឹកភ្លៀងរាជធានីភ្នំពេញ, ទៀនទី១៨ តំណាងឱ្យទឹកភ្លៀងខេត្តមណ្ឌលគីរី, ទៀនទី១៩ តំណាងឱ្យទឹកភ្លៀងខេត្តរតនគីរី, ទៀនទី២០ តំណាងឱ្យទឹកភ្លៀងខេត្តស្វាយរៀង, ទៀនទី២១ តំណាងឱ្យទឹកភ្លៀងខេត្តសៀមរាប, ទៀនទី២២ តំណាងឱ្យទឹកភ្លៀងខេត្តស្ទឹងត្រែង, ទៀនទី២៣ តំណាងឱ្យទឹកភ្លៀងខេត្តព្រះសីហនុ និងទៀនទី២៤ តំណាងឱ្យទឹកភ្លៀងខេត្តឧត្តរមានជ័យ។
ចំពោះលទ្ធផលនៃការព្យាករណ៍ដំណើរទឹកភ្លៀងទាំង២៤រាជធានី និងខេត្តនេះ ព្រះជយាធិបតីកងកេន បារគូព្រះបរមរាជវាំងបានទូលថ្វាយ និងជំរាបជូនដូចតទៅ៖
១-ខេត្តកណ្តាល ដើមឆ្នាំ និងកណ្តាលឆ្នាំមានទឹកភ្លៀងធ្លាក់មធ្យម ចុងឆ្នាំមានទឹកភ្លៀងធ្លាក់ច្រើន ។
២-ខេត្តកំពត ដើមឆ្នាំ មានទឹកភ្លៀងធ្លាក់តិច កណ្តាលឆ្នាំ និងចុងឆ្នាំមានទឹកភ្លៀងធ្លាក់ច្រើន ។
៣-ខេត្តកំពង់ចាម ដើមឆ្នាំមានទឹកភ្លៀងធ្លាក់មធ្យម កណ្តាលឆ្នាំនិងចុងឆ្នាំមានទឹកភ្លៀងធ្លាក់ច្រើន។
៤-ខេត្តកំពង់ធំ ដើមឆ្នាំមានទឹកភ្លៀងធ្លាក់មធ្យម កណ្តាលឆ្នាំមានទឹកភ្លៀងធ្លាក់ច្រើន និងចុងឆ្នាំមានទឹកភ្លៀងធ្លាក់មធ្យម ។
៥-ខេត្តកំពង់ឆ្នាំង ដើមឆ្នាំមានទឹកភ្លៀងធ្លាក់មធ្យម កណ្តាលឆ្នាំ និងចុងឆ្នាំមានទឹកភ្លៀងធ្លាក់ច្រើន ។
៦-ខេត្តកំពង់ស្ពឺ ដើមឆ្នាំមានទឹកភ្លៀងធ្លាក់តិច កណ្តាលឆ្នាំនិងចុងឆ្នាំមានទឹកភ្លៀងធ្លាក់មធ្យម ។
៧-ខេត្តកែប ដើមឆ្នាំនិងកណ្តាលឆ្នាំមានទឹកភ្លៀងធ្លាក់មធ្យម ចុងឆ្នាំមានទឹកភ្លៀងធ្លាក់ច្រើន ។
៨-ខេត្តកោះកុង ដើមឆ្នាំមានទឹកភ្លៀងធ្លាក់មធ្យម កណ្តាលឆ្នាំនិងចុងឆ្នាំមានទឹកភ្លៀងធ្លាក់ច្រើន ។
៩-ខេត្តក្រចេះ ដើមឆ្នាំនិងកណ្តាលឆ្នាំមានទឹកភ្លៀងធ្លាក់មធ្យម ចុងឆ្នាំមានទឹកភ្លៀងធ្លាក់ច្រើន ។
១០-ខេត្តតាកែវ ដើមឆ្នាំមានទឹកភ្លៀងធ្លាក់តិច កណ្តាលឆ្នាំនិងចុងឆ្នាំមានទឹកភ្លៀងធ្លាក់មធ្យម ។
១១-ខេត្តបាត់ដំបង ដើមឆ្នាំមានទឹកភ្លៀងធ្លាក់មធ្យម កណ្តាលឆ្នាំនិងចុងឆ្នាំមានទឹកភ្លៀងធ្លាក់ច្រើន ។
១២-ខេត្តបន្ទាយមានជ័យ ដើមឆ្នាំមានទឹកភ្លៀងធ្លាក់មធ្យម កណ្តាលឆ្នាំនិងចុងឆ្នាំមានទឹកភ្លៀងធ្លាក់ច្រើន ។
១៣-ខេត្តប៉ៃលិន ដើមឆ្នាំមានទឹកភ្លៀងធ្លាក់មធ្យម កណ្តាលឆ្នាំនិងចុងឆ្នាំមានទឹកភ្លៀងធ្លាក់ច្រើន ។
១៤-ខេត្តពោធិ៍សាត់ ដើមឆ្នាំនិងកណ្តាលឆ្នាំមានទឹកភ្លៀងធ្លាក់មធ្យម និងចុងឆ្នាំមានទឹកភ្លៀងធ្លាក់ច្រើន ។
១៥-ខេត្តព្រៃវែង ដើមឆ្នាំមានទឹកភ្លៀងធ្លាក់តិច កណ្តាលឆ្នាំនិងចុងឆ្នាំមានទឹកភ្លៀងធ្លាក់ច្រើន។
១៦-ខេត្តព្រះវិហារ ដើមឆ្នាំមានទឹកភ្លៀងធ្លាក់មធ្យម កណ្តាលឆ្នាំនិងចុងឆ្នាំមានទឹកភ្លៀងធ្លាក់ច្រើន ។
១៧-រាជធានីភ្នំពេញ ដើមឆ្នាំនិងកណ្តាលឆ្នាំមានទឹកភ្លៀងធ្លាក់មធ្យម និងចុងឆ្នាំមានទឹកភ្លៀងធ្លាក់ច្រើន ។
១៨-ខេត្តមណ្ឌលគីរី ដើមឆ្នាំមានទឹកភ្លៀងធ្លាក់តិច កណ្តាលឆ្នាំមានទឹកភ្លៀងធ្លាក់មធ្យម និងចុងឆ្នាំមានទឹកភ្លៀងធ្លាក់ច្រើន ។
១៩-ខេត្តរតនគិរី ដើមឆ្នាំនិងកណ្តាលឆ្នាំមានទឹកភ្លៀងធ្លាក់មធ្យម និងចុងឆ្នាំមានទឹកភ្លៀងធ្លាក់ច្រើន ។
២០-ខេត្តស្វាយរៀង ដើមឆ្នាំមានទឹកភ្លៀងធ្លាក់តិច កណ្តាលឆ្នាំនិងចុងឆ្នាំមានទឹកភ្លៀងធ្លាក់មធ្យម ។
២១-ខេត្តសៀមរាប ដើមឆ្នាំនិងកណ្តាលឆ្នាំមានទឹកភ្លៀងធ្លាក់មធ្យម និងចុងឆ្នាំមានទឹកភ្លៀងធ្លាក់ច្រើន ។
២២-ខេត្តស្ទឹងត្រែង ដើមឆ្នាំមានទឹកភ្លៀងធ្លាក់តិច កណ្តាលឆ្នាំនិងចុងឆ្នាំមានទឹកភ្លៀងធ្លាក់មធ្យម ។
២៣-ខេត្តព្រះសីហនុ ដើមឆ្នាំមានទឹកភ្លៀងធ្លាក់មធ្យម កណ្តាលឆ្នាំនិងចុងឆ្នាំមានទឹកភ្លៀងធ្លាក់ច្រើន ។
២៤-ខេត្តឧត្តរមានជ័យ ដើមឆ្នាំមានទឹកភ្លៀងធ្លាក់មធ្យម កណ្តាលឆ្នាំមានទឹកភ្លៀងធ្លាក់ច្រើន និងចុងឆ្នាំមានទឹកភ្លៀងធ្លាក់មធ្យម ។
នៅក្នុងរាត្រីដ៏មនោរម្យនៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ក្នុងថ្ងៃទី២ នោះ គណៈកម្មាធិការអចិន្ត្រៃយ៍រៀបចំបុណ្យជាតិ និងអន្តរជាតិបានប្រារព្ធឡើងនូវការបាញ់កាំជ្រួចនៅក្នុងដងទន្លេខាងមុខព្រះបរមរាជវាំងជាលើកទី២ បន្ទាប់ពីព្រះរាជពិធីសំរក់ទៀន ដើម្បីអបអរ និងញ៉ាំងឱ្យព្រះរាជពិធីបុណ្យតាមប្រពៃណីជាតិ និងតាមគន្លងព្រះពុទ្ធសាសនាដ៏ថ្កើងថ្កាននៃយើង កាន់តែទទួលបាននូវភាពដ៏មហោឡារិកអធិកអធមទ្វេឡើងថែមទៀត ៕
ចែករំលែកព័តមាននេះ