ជំរុញវិស័យទេសចរណ៍ ៖ កម្ពុជា-ឥណ្ឌូណេស៊ី នឹងភ្ជាប់ជើងហោះហើរត្រង់ ជាមួយគ្នា
- ព្រះសីហនុ
ខេត្តព្រះសីហនុ ៖ កំលុងពេលចូលរួមវេទិកាទេសចរណ៍អាស៊ានលើកទី ៤០ នៅខេត្តព្រះសីហនុ លោក ថោង ខុន រដ្ឋមន្ត្រីទេសចរណ៍កម្ពុជា និងលោក…
ខេត្តព្រះសីហនុ ៖ កំលុងពេលចូលរួមវេទិកាទេសចរណ៍អាស៊ានលើកទី ៤០ នៅខេត្តព្រះសីហនុ លោក ថោង ខុន រដ្ឋមន្ត្រីទេសចរណ៍កម្ពុជា និងលោក សេនឌីយ៉ាហ្កា សាលាហ៊ូឌីន អ៊ូណូ (Sandiaga Salahudin Uno) រដ្ឋមន្ត្រីទេសចរណ៍ និងសេដ្ឋកិច្ចច្នៃប្រឌិតឥណ្ឌូណេស៊ី បានចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការទេសចរណ៍ ពិសេសគឺដើម្បីជំរុញការតភ្ជាប់ជើង ហោះហើរត្រង់រវាងប្រទេសទាំងពីរ ។
អនុស្សារណៈយោគយល់គ្នាស្តីពីកិច្ចសហប្រតិបត្តិការទេសចរណ៍កម្ពុជា-ឥណ្ឌូណេស៊ី នេះ មានគោលបំណងក្នុងការពង្រឹងកិច្ចសហប្រតិបត្តិការទេសចរណ៍រវាងប្រទេសទាំងពីរឲ្យកាន់តែស៊ីជម្រៅ និងរួមគ្នាស្តារវិស័យទេសចរណ៍រវាងប្រទេសទាំងពីរឲ្យបានឆាប់រហ័ស នៅក្នុងនោះមានសកម្មភាពរួមគ្នាផ្សព្វផ្សាយ និងទីផ្សារនៅពិព័រណ៌ទេសចរណ៍ថ្នាក់តំបន់ និងអន្តរជាតិ ផ្លាស់ប្តូរបទពិសោធន៍លើការរៀបចំផែនការ និងគ្រប់គ្រងគោលដៅទេសចរណ៍ ។
កិច្ចព្រមព្រៀមលើវិស័យទេសចរណ៍ប្រទេសក្នុងអាស៊ានទាំងពីរនេះក៍នឹងជំរុញ និងលើកទឹកចិត្តផ្នែកឯកជន ដើម្បីវិនិយោគក្នុងឧស្សាហកម្មទេសចរណ៍ ជួយគ្នាទៅវិញទៅមកលើការអភិវឌ្ឍធនធានមនុស្ស និងកសាងសមត្ថភាពដល់អ្នកជំនាញ ជំរុញកិច្ចសហប្រតិបត្តិការលើការរៀបចំព្រឹត្តិការណ៍ទេសចរណ៍ សន្និសីទ ពិព័រណ៍ទេសចរណ៍ និងកិច្ចប្រជុំផ្សេងៗ និងជំរុញការតភ្ជាប់ជើងហោះហើរត្រង់រវាងប្រទេសទាំងពីរ ។
លោករដ្ឋមន្ត្រីឥណ្ឌូណេស៉ី សេនឌីយ៉ាហ្កា សាលាហ៊ូឌីន អ៊ូណូ ក៏បានកោតសរសើរកម្ពុជាដែលបានដាក់ចេញ និងអនុវត្តនីតិវិធីស្តង់ដា (SOP) និងវិធានសុវត្ថិភាពរបស់កម្ពុជាប្រកបដោយប្រសិទ្ធភាព និងឈានមុខគេក្នុងចំណោមប្រទេសសមាជិកអាស៊ានទាំងអស់ ។
សូមបញ្ជាក់ថា ក្នុងនាមជាម្ចាស់ផ្ទះរៀបចំវេទិកាទេសចរណ៍អាស៊ាននៅឆ្នាំក្រោយ ឥណ្ឌូណេស៊ីនឹងរៀបចំព្រឹត្តិការណ៍រាត្រីឥណ្ឌូណេស៊ីនៅយប់ថ្ងៃទី ១៩ ខែមករា ឆ្នាំ ២០២២ នៅសណ្ឋាគារព្រីនស៍ ថាម ខេត្តព្រះសីហនុ ដោយនឹងមានអ្នកចូលរួមប្រមាណ ២៥០ នាក់ ៕
ចែករំលែកព័តមាននេះ