រាជធានីភ្នំពេញ ៖ គណបក្សឯកភាពជាតិខ្មែរបានប្រកាសបណ្តេញអនុប្រធាន ទី១គណបក្សចេ ញពីបក្សបន្ទាប់ពីរកឃើញថា មានបំណងធ្វើបក្សប្រហារ និងធ្វើខុសបទបញ្ជាផ្ទៃក្នុងបក្ស ។ យោងតាមសេចក្តីប្រកាសរបស់លោកនៅ សំអាត…
រាជធានីភ្នំពេញ ៖ គណបក្សឯកភាពជាតិខ្មែរបានប្រកាសបណ្តេញអនុប្រធាន ទី១គណបក្សចេ ញពីបក្សបន្ទាប់ពីរកឃើញថា មានបំណងធ្វើបក្សប្រហារ និងធ្វើខុសបទបញ្ជាផ្ទៃក្នុងបក្ស ។
យោងតាមសេចក្តីប្រកាសរបស់លោកនៅ សំអាត ជាប្រធានគណបក្សឯកភាពជាតិខ្មែរ កាលពីពេលថ្មីៗកន្លងមក បានលើកឡើងថា យោងតាមការប្រជុំ សមាជិកគណៈកម្មាធិការអចិន្ត្រៃយ៍ និងការប្រជុំសម្រេចរបស់គណៈកម្មាធិការនាយកគណបក្សឯកភាពជាតិខ្មែរ បានឯកភាពបណ្ដេញឈ្មោះ អ៊ុន ជឹម ចេញពីគណបក្សឯកភាពជាតិខ្មែរ និងមិនទទួលស្គាល់ជាអនុប្រធានទី១ នៃគណបក្សឯកភាពជាតិខ្មែរទៀតឡើយ ។
ប្រធានគណបក្សក៏បានលើកឡើងថា មូលហេតុបុគ្គលឈ្មោះ អ៊ុន ជឹម បានប្រព្រឹត្តិ និងសាងកំហុសយ៉ាងធ្ងន់ធ្ងរនៅក្នុងគណបក្សនឹងបានធ្វើឲ្យប៉ះពាលដល់សេចក្ដីថ្លៃថ្នូររបស់គណបក្សឯកភាពជាតិខ្មែរ រួមមាន ៖ បានក្លែងសារសម្លេងសម្តេច តេជោ ហ៊ុន សែន ហើយចែកចាយដល់សមាជិកមូលដ្ឋាន និងនៅសហរដ្ឋអាមរិក ដែលធ្វើអោយប៉ះពាល់ដល់កិត្តិយសរបស់សម្តេចតេជោ ហ៊ុន សែន នាយករដ្ឋមន្ត្រី ។ ធ្វើបក្សប្រហារ ,កោះប្រជុំសមាជិកដោយគ្មានការអនុញាត្តពីប្រធានបក្ស និងប្រធានស្តីទីបង្កើតគណៈបក្សញុះញង់នាំអោយមានការបែកបាក់ផ្ទៃក្នុងបក្ស នៅតាមមូលដ្ឋាន,មានចេតនា ដណ្តើមតំណែងជាប្រធានបក្ស និងប្រធានស្តីទីដោយគ្មានការឯកភាពពីគណកម្មការអចិន្ត្រៃយ៍ និងគណៈកម្មការនាយក ។
ប្រភពបានលើកឡើងថា តាមហេតុផលខាងលើនេះ លោកនៅ សំអាត ជាប្រធាន គណបក្សឯកភាពជាតិខ្មែរ និងតំណាងអោយ សមាជិក (គណបក្សឯកភាពជាតិខ្មែរទាំងអស់ ឈប់ទទួលស្គាល់បុគ្គល អ៊ុន ជឹម ជាសមាជិកបក្ស និងបញ្ឈប់តួនាទីគ្រប់ផ្នែកនៅក្នុងបក្សចាប់ពីថ្ងៃចុះហត្ថលេខានេះតទៅ ។
ទាក់ទងករណីនេះដែរ លោក ស្រីឡាក់ សុភាពប្រធានស្តីទីគណបក្សថ្លែងក្នុងសន្នីសិទសារព័ត៌មាន កាលពីរសៀល ថ្ងៃទី១៦ ខែមករា ឆ្នាំ២០២២ បានស្នើដល់ក្រសួងមហាផ្ទៃ និងអគ្គស្នងការនគបាលធ្វើការស្រាវជ្រាវចាត់វិធានការផ្លូវច្បាប់ចំពោះបុគ្គល អ៊ុន ជឹម ដែលធ្វើឲ្យប៉ះ ពាល់គណបក្ស ឬធ្វើការវឹកវរដល់សង្គមជាតិ ។
លោកស្រីក៏បានលើកឡើងថា បើសិនលោក អ៊ុន ជឹមនៅតែរំលោភ និងធ្វើល្មើសមកលើគណបក្សទៀតនោះ គណបក្សនឹងរៀបចំឯកសារប្តឹងលោកអនុប្រធានទី១ ទៅតុលាការផងដែរ ។
សូមជម្រាបថា គណបក្សឯកភាពជាតិខ្មែរត្រូវបានក្រសួងមហាផ្ទៃសម្រេចប្រកាសចុះបញ្ជីគណបក្សនយោបាយ កាលពីខែតុលា ឆ្នាំ២០២១ ដោយក្រសួងបានឲ្យគណបក្សនេះត្រូវធ្វើសកម្មភាពស្របតាមច្បាប់គណបក្សនយោបាយ និងលិខិតបទដ្ឋានគតិយុត្តិនានាជាធរមាន និងលក្ខន្តិកៈរបស់គណបក្សដែលកម្កល់នៅក្រសួងមហាផ្ទៃ៕
ចែករំលែកព័តមាននេះ