កូវីដ-១៩ ៖ យោងតាមទីភ្នាក់ងារឱសថអឹរ៉ុប EMA បានឱ្យដឹងថា រលកនៃការឆ្លងវីរុសប្រភេទ «ដែលតា» នៅតែមាន ហើយការឆ្លងវីរុសប្រភេទ «អូមីក្រុង» នៅមិនទាន់ដល់កម្រិតកំពូលនៃការឆ្លងនៅឡើយ ដែលលើពិភពលោក រួចសភាពការណ៍នឹងអាចមានការកែលម្អនាបណ្ដាខែខាងមុខ។ តើមកពីអ្វីទៅបានជាយល់បែបនោះ? ព្រោះបើតាម EMA ថា ទោះបីជំងឺនោះនៅតែស្ថិតក្នុងដំណាក់កាលឆ្លងខ្លាំងក៏ដោយ តែការឆ្លង «អូមីក្រុង» នឹងត្រូវប្រែក្លាយកូវីដ-១៩ ឲ្យទៅជាជំងឺមួយដែលនឹងលែងឆ្លង ដែលជាមួយគ្នានេះ មនុស្សជាតិអាចរៀនសូត្រពីវិធីរស់នៅ។
EMA ក៏បានសម្ដែងផងដែរ ពីការសង្ស័យនានា ចំពោះការចាក់វ៉ាក់សាំងដូសទី៤ ដល់ប្រជាជន ដោយអះអាងថា ការចាក់វ៉ាក់សាំងដូសជាបន្តបន្ទាប់មិនមែនជាយុទ្ធសាស្ត្រយូរអង្វែងមួយឡើយ។ លោក MARCO CAVALERI ប្រមុខផ្នែកយុទ្ធសាស្ត្រចាក់វ៉ាក់សាំងរបស់ EMA មានមូលដ្ឋាននៅក្រុងអាមស្ទ័រដាម បានថ្លែងថា គ្មានមនុស្សណាម្នាក់អាចនិយាយឲ្យប្រាកដថា ពេលណា យើងចាកចេញផុតពីវិបត្តិកូវីដនេះនោះទេ។
លោកបន្តថា ជាមួយការកើនឡើងនៃភាពស៊ាំរបស់ប្រជាជន និងជាមួយ «អូមីក្រុង» នឹងនាំឲ្យមានភាពស៊ាំធម្មជាតិកាន់តែច្រើនបន្ថែមលើការចាក់វ៉ាក់សាំង។ យើងកំពុងឈានទៅមុខដោយរហ័សឆ្ពោះទៅរកសេណារីយ៉ូមួយ ដែលនឹងខិតកាន់តែជិតដល់ការឈប់ឆ្លង។ ក្នុងសន្និសីទសារព័ត៌មានមួយលោកគូសបញ្ជាក់ថា តែយើងមិនត្រូវភ្លេចថាយើងកំពុងស្ថិតក្នុងដំណាក់កាលនៃការឆ្លងនៅឡើយ។
ចំណែកអង្គការសុខភាពពិភពលោក WHO វិញ កាលពីថៃ្ងទី១១ ខែមករា បានអំពាវនាវឲ្យមានការកែប្រែសមាសភាពនៃបណ្ដាវ៉ាក់សាំង ដើម្បីធានាថាវ៉ាក់សាំងទាំងនេះ ជួយថែមទៀតប្រឆាំងកូវីដ។
បណ្ដាអ្នកជំនាញការរបស់ WHO បានព្រមានថា ការប្រយុទ្ធប្រឆាំងការឆ្លងកូវីដដោយចាក់វ៉ាក់សាំងដូសជំរុញនាពេលបច្ចុប្បន្ន មិនមែនជាយុទ្ធសាស្ត្រគត់មត់មួយឡើយ។ អ្នកជំនាញការទាំងនោះចាត់ទុកថា បណ្ដាវ៉ាក់សាំងប្រឆាំងកូវីដពិតជាមានប្រសិទ្ធភាពខ្ពស់ ទប់ការឆ្លង និងបង្ការការឆ្លង ហើយលើសពីនេះអាចបង្ការករណីធ្លាក់ខ្លួនឈឺធ្ងន់ និងការស្លា.ប់ ដែលយើងត្រូវការចាំបាច់ហើយត្រូវតែផលិត។ បែបនោះអាចកម្រិតផលប៉ះពាល់នៃកូវីដ តែក៏ចាំបាច់មានវិធានការសុខាភិបាលនិងសង្កមកិច្ចហ្មត់ចត់នានានិងក្នុងទ្រង់ទ្រាយធំ។
WHO ទាមទារឲ្យមានវ៉ាក់សាំងកាន់តែល្អ ដើម្បីបញ្ឈប់ការឆ្លង។ ការទាមទារបែបនោះកើតមានខណៈយុទ្ធនាការចាក់វ៉ាក់សាំងដូសជម្រុញកំពុងតែបង្កើន ជាពិសេសនៅក្នុងបណ្ដាប្រទេសលោកខាងលិច។ WHO បានព្រមានដល់រដ្ឋាភិបាលប្រទេសទាំងនះថា ការចាក់ដូសរំឭកដូចបច្ចុប្បន្នតែមួយមុខគត់ នឹងមិនគ្រប់គ្រាន់ក្នុងការប្រយុទ្ធនឹងការឆ្លងកូវីដឡើយ។ បណ្ដាអ្នកជំនាញការWHO ទាមទារបណ្ដាវ៉ាក់សាំងដែលអាចបង្ការបានល្អចំពោះការឆ្លង៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ