ADផ្ទាំងផ្សព្វផ្សាយពាណិជ្ជកម្ម

Picture

ជួយ​កម្ពុជា​ប្រមាណ​ ៣១៦ លាន​ដុល្លារ​អា​មេ​រិ​កមក​ហើយ កូរ៉េ​រៀបចំ​គម្រោង​បន្ត​ជួយ​ទៀត

6 ខែ មុន
  • ភ្នំពេញ

រាជធានី​ភ្នំពេញ​ ៖​ ទីភ្នាក់ងារ​សហប្រតិបត្តិការ​អន្តរជាតិ​កូរ៉េ ​ហៅ​កាត់​ថា ​KOICA និង​គណៈកម្មាធិការ​នីតិសម្បទា និង​អភិវឌ្ឍន៍​កម្ពុជា ​នៃ​ក្រុមប្រឹក្សា​អភិវឌ្ឍន៍​កម្ពុជា បាន​បើក​កិច្ច​សន្ទនា​គោលនយោបាយ​ស្តី​អំពី​កិច្ច​សហប្រតិបត្តិការ​អភិវឌ្ឍន៍​សម្រាប់​ឆ្នាំ​២០២២​ និង​…

រាជធានី​ភ្នំពេញ​ ៖​ ទីភ្នាក់ងារ​សហប្រតិបត្តិការ​អន្តរជាតិ​កូរ៉េ ​ហៅ​កាត់​ថា ​KOICA និង​គណៈកម្មាធិការ​នីតិសម្បទា និង​អភិវឌ្ឍន៍​កម្ពុជា ​នៃ​ក្រុមប្រឹក្សា​អភិវឌ្ឍន៍​កម្ពុជា បាន​បើក​កិច្ច​សន្ទនា​គោលនយោបាយ​ស្តី​អំពី​កិច្ច​សហប្រតិបត្តិការ​អភិវឌ្ឍន៍​សម្រាប់​ឆ្នាំ​២០២២​ និង​ ២០២៣ កាល​ថ្ងៃ​ទី​ ១១​ ខែមក​រា​ ឆ្នាំ​ ២០២២ ​នេះ ​។

Picture

កិច្ច​សន្ទនា​នេះ​បាន​ផ្តោត​លើ​គោលនយោបាយ​អំពី​ដំណើរការ​សម្រាប់​ការ​រៀបចំ​សកម្មភាព​រប​ស់ KOICA ​នៅ​កម្ពុជា ដូច​ជា​សមិទ្ធិ​ផល​មួយ​ចំនួន​ដែល​បាន​ធ្វើ​ក្នុង​ឆ្នាំ​ ២០២១ និង​ផែនការ​សកម្មភាព​សម្រាប់​ឆ្នាំ ​២០២២ គម្រោង​បន្ត​របស់ ​KOICA គម្រោង​ថ្មី​សម្រាប់​ឆ្នាំ​ ២០២២ និង ២០២៣ កម្មវិធី​បណ្តុះបណ្តាល​ប្រចាំ​ប្រទេស​សម្រាប់​កម្ពុជា​នៅ​ឆ្នាំ​ ២០២២​ និង​រហូត​ដល់​ឆ្នាំ​ ២០២៥ ការ​ស្នើ​សុំ​សំណើរ​គម្រោង​ថ្មី​សម្រាប់​ឆ្នាំ ​២០២៤ និងដើម្បី​ពិភាក្សា​អំពី​ការ​រៀបចំ​ពិធី​សម្ពោធ​មជ្ឈមណ្ឌលត្រចៀក ច្រមុះ បំពង់ក​ ក្នុង​មន្ទីរពេទ្យ​ព្រះ​អង្គឌួង​ ។

Picture

ចាប់តាំងពី​ឆ្នាំ​ ១៩៩១-២០២១ KOICA បាន​ផ្តល់​ហិរញ្ញប្បទាន​ឥត​សំណង​ប្រមាណ ៣១៦ លាន​ដុល្លារ​អា​មេ​រិ​ក ដើម្បី​ចូលរួម​ចំណែក​ដល់​រាជរដ្ឋាភិបាល​កម្ពុជា​ក្នុង​ការ​អភិវឌ្ឍ​សេដ្ឋកិច្ច​សង្គម ដោយ​ផ្តោត​លើ​វិស័យ​អាទិភាព​ចំនួន ​៤ រួម​មាន ១)- ​វិស័យ​គ្រប់គ្រង​ទឹក និង​សុខភាព​សាធារណៈ ២)- ​វិស័យ​អប់រំ ៣)-​ វិស័យ​កសិកម្ម​ និង​អភិវឌ្ឍ​ជនបទ និង ៤)-​ វិស័យ​ដឹក​ជញ្ជូន ​។ ដោយឡែកសម្រាប់​ឆ្នាំ​២០២២ ​នេះ ជំនួយ​ឥត​សំណងរបស់ KOICA ​ដល់​កម្ពុជា​មាន​ចំនួន​សរុប ២០,៧ ​លាន​ដុល្លារ​អា​មេ​រិ​ក ​។

នៅ​ក្នុង​បរិបទ​នៃ​ការ​រីក​រាលដាល​នៃ​ជំងឺ​កូ​វី​ដ​-១៩ KOICA បាន​និង​កំពុង​គាំទ្រ​យ៉ាង​សកម្ម​ដល់​រាជរដ្ឋាភិបាល​កម្ពុជា​ក្នុង​ការ​ប្រយុទ្ធ​ប្រឆាំង​នឹង​ជំងឺ​កូ​វី​ដ​-១៩ ក៏​ដូច​ជាការ​ដោះស្រាយ​ផល​ប៉ះពាល់​នៃ​ជំងឺ​ជំងឺ​-១៩ ចាប់តាំងពី​ឆ្នាំ ​២០២០ ​មក ​។ ដោយឡែក​សម្រាប់​ឆ្នាំ​ ២០២២ នេះ​ KOICA នឹង​ផ្តល់​រថយន្ត​សង្គ្រោះ​បន្ថែមចំនួន ១០ ​គ្រឿង និង​ឧបករណ៍​ធ្វើតេស្ត​រហ័ស​ចំនួន ៨៣,៣២៥ ​តេស្ត​ដល់​ក្រសួងសុខាភិបាល​កម្ពុជា ​។​ បន្ថែម​ពីលើ​នេះ ​KOICA កំពុង​ពិចារណា​ផ្តល់​រថយន្ត​សង្គ្រោះ​បន្ថែម​ទៀត​ដល់​កម្ពុជា​នៅ​ឆ្នាំ​២០២២ ។

Picture

លោក ឈៀង យ៉ា​ណា​រ៉ា អគ្គលេខាធិការ​គណៈកម្មាធិការ​នីតិសម្បទា និង​អភិវឌ្ឍន៍​កម្ពុជា​ នៃ​ក្រុមប្រឹក្សា​អភិវឌ្ឍន៍​កម្ពុជា បាន​លើក​ឡើង​ក្នុង​កិច្ច​ពិភាក្សា​តាម​រយៈ​ប្រព័ន្ធ​វី​ដេ​អូ​ពី​ចម្ងាយ​នោះ​ថា សមិទ្ធិ​ផល​ជា​ច្រើន​ដែល KOICA សម្រេច​បាន និង​បាន​ថ្លែងអំណរគុណ​ចំពោះប្រជាជន ព្រមទាំង​រដ្ឋាភិបាល​កូរ៉េ ដែល​តែងតែ​គាំទ្រ​ដល់​ការ​អភិវឌ្ឍ​សេដ្ឋកិច្ច​សង្គម​របស់​ប្រទេស​កម្ពុជា តាម​រយៈ​ការ​អនុវត្ត​គម្រោង និង​កម្មវិធី​នានា ដែល​គាំទ្រ​យ៉ាង​សកម្ម​ដល់​ប្រទេស​កម្ពុជា ក្នុង​ការ​ប្រយុទ្ធ​ប្រឆាំង​នឹងកូ​វី​ដ​-១៩ និង​សម្រប​សម្រួលការ​ស្តារ​សេដ្ឋកិច្ច​ឡើង​វិញ​ ៕