ភ្នំពេញ៖ យ៉ាងហោចណាស់ មានមនុស្ស ៥នាក់ នៅខេត្តកំពត បានឆ្លងកូវីដ១៩ ប្រភេទអូមីក្រុង ពីបុរសទី១ ដែលឆ្លងអូមីក្រុង នៅក្នុងសហគមន៍។ នេះបើតាមលោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ថ្លែងទៅកាន់ក្រុមអ្នកកាសែត ក្នុងពេលលោកស្រី ពិនិត្យដំណើរការចាក់វ៉ាក់សាំងបង្ការជំងឺកូវីដ១៩ នៅក្នុងខេត្តបាត់ដំបង នាថ្ងៃទី១១ ខែមករានេះ។
សូមរម្លឹកថា បុរសអាយុ ២៣ឆ្នាំ ដែលឆ្លងអូមីក្រុង ត្រូវបានក្រសួងសុខាភិបាល ប្រកាសកាលពីថ្ងៃទី៨ ខែមករា ឆ្នាំ២០២២។ បុរសនោះ មានស្រុកកំណើតនៅតានីទូកមាស ខេត្តកំពត។
បុរសជនជាតិខ្មែរ អាយុ ២៣ឆ្នាំ ដែលឆ្លងអូមីក្រុងក្នុងសហគមន៍ដំបូងនេះ ស្នាក់នៅទួលសង្កែ ខណ្ឌឫស្សីកេវ រាជធានីភ្នំពេញ។ បុរសរូបនេះ បានទៅកំដរអ្នកជំងឺ ដែលជាបងប្អូនជីដូនមួយ នៅមន្ទីរពេទ្យមួយ ក្នុងរាជធានីភ្នំពេញ ដែលមន្ទីរពេទ្យនោះ បានយកវត្ថុសំណាករបស់គាត់ ទៅពិនិត្យ នៅមន្ទីរពិសោធន៍ ឃើញវិជ្ជមានអូមីក្រុង។ បុរសរូបនោះ ត្រូវបានដាក់ឲ្យសម្រាកព្យាបាល នៅមណ្ឌលព្យាបាលអូឡាំពិក រាជធានីភ្នំពេញ។
ក្រសួងសុខាភិបាល ប្រកាសថា តាំងពីថ្ងៃទី២៧ ខែធ្នូ ឆ្នាំ២០២១ ដល់ថ្ងៃទី៥ ខែមករា ឆ្នាំ២០២២ បុរសរូបនេះ បានធ្វើដំណើរទៅជាច្រើនកន្លែង ដូចជា នៅរាជធានីភ្នំពេញ ខេត្តកំពង់ធំ ខេត្តសៀមរាប និងទៅលេងទីតាំងមួយចំនួន នៅតានីទូកមាស ខេត្តកំពត ដោយបានធ្វើដំណើរជាមួយបងប្អូនជីដូនមួយ មកពីប្រទេសអូស្ត្រាលី មកដល់រាជធានីភ្នំពេញ នៅថ្ងៃទី២៧ ខែធ្នូ ឆ្នាំ២០២១ ហើយនៅថ្ងៃទី៥ ខែមករា ឆ្នាំ២០២២ គាត់បានទៅកំដរអ្នកជំងឺ ដែលជាបងប្អូនជីដូនមួយ នៅមន្ទីរពេទ្យមួយ ដែលក្រោយមក ក៏បានរកឃើញមានវិជ្ជមានវីរុសកូវីដ១៩ អូមីក្រុង។
ជាមួយគ្នានោះ លោកស្រី ឱ វណ្ណឌីន លើកឡើងថា អ្នកជំងឺកូវីដ១៩ ប្រភេទអូមីក្រុង ត្រូវបានដាក់ឲ្យសម្រាកព្យាបាល នៅស្តាតអូឡាំពិក នៅមណ្ឌលសុខភាពចាក់អង្រែ នៅមន្ទីរពេទ្យមិត្តភាពខ្មែរសូវៀត និងនៅមន្ទីរពេទ្យហ្លួងម៉ែ។
លោកស្រី ឱ វណ្ណឌីន បញ្ជាក់ថា រោគសញ្ញាអ្នកឆ្លងអូមីក្រុងទាំងនោះ ភាគតិច បានចេញរោគសញ្ញា ហើយក៏រោគសញ្ញានោះ មិនធ្ងន់ធ្ងរទេ។ អ្នកឆ្លងអូមីក្រុង មានតិចណាស់ ដែលមានបញ្ហា តែបញ្ហានោះ បង្កដោយផ្លូវអារម្មណ៍ប៉ុណ្ណោះ។
លោកស្រី ឱ វណ្ណឌីន បានបន្ថែមថា អ្នកឆ្លងអូមីក្រុង ដែលយើងរកឃើញទាំងនោះ ខ្លះចាក់វ៉ាក់សាំង ដូសទី១ ខ្លះចាក់ដូសទី២ និងមួយចំនួនទៀត ចាក់ដូសទី៣។ តែអ្នកចាក់ដូសទី៣ មានតិចណាស់។ អ្នកឆ្លងអូមីក្រុង ភាគច្រើនជាអ្នកដំណើរ ចូលមកកម្ពុជា។
មកដល់ពេលនេះ លោកស្រីវេជ្ជបណ្ឌិត ឱ វណ្ណឌីន បន្ថែមថា អ្នកឆ្លងអូមីក្រុងមួយចំនួន បានជាសះស្បើយ។ ក្នុងនោះ វ៉ាក់សាំង នៅតែជាឧបករណ៍ចាំបាច់ណាស់ ក្នុងការប្រយុទ្ធប្រឆាំងនឹងកូវីដ១៩។
លោកស្រី ឱ វណ្ណឌីន ក៏បានប្រកាសអំពាវនាវដល់បងប្អូនប្រជាពលរដ្ឋទាំងអស់ សូមបន្តអនុវត្តវិធានការការពារខ្លួនដោយហ្មត់ចត់ ជាពិសេសវិធានការ “៣ការពារ និង៣កុំ” និងអញ្ជើញទៅចាក់វ៉ាក់សាំងកូវីដ១៩ នៅពេលដល់វេនលោកអ្នក ឲ្យបានគ្រប់ៗគ្នា ដើម្បីរួមគ្នាទប់ស្កាត់ការចម្លងវីរុសកូវីដ១៩ នៅតាមសហគមន៍របស់យើង។
សូមរម្លឹកថា សេចក្តីប្រកាសរបស់ក្រសួងសុខាភិបាល បង្ហាញថា ចាប់ពីថ្ងៃទី១៤ ខែធ្នូ ឆ្នាំ២០២១ រហូតដល់ថ្ងៃទី១០ ខែមករា ឆ្នាំ២០២២ នៅកម្ពុជា រកឃើញអ្នកឆ្លងកូវីដ១៩ ប្រភេទអូមីក្រុង សរុបចំនួន ២២៩នាក់។ ក្នុងនោះ មាន ២១៥នាក់ ជាករណីនាំចូលពីក្រៅប្រទេស និងឆ្លងក្នុងសហគមន៍ ចំនួន ១៤នាក់ (គិតចាប់ពីថ្ងៃទី៨មករា ដល់ថ្ងៃទី១០មករា)៕
ចែករំលែកព័តមាននេះ