ខេត្តកំពង់ឆ្នាំង៖ រថយន្ដ ៣គ្រឿង រួមទាំងម៉ូតូ ១គ្រឿង បានបុកគ្នាជាបន្តបន្ទាប់ បណ្ដាលឱ្យជាប់គ្នាស្ទះចរាចរណ៍ជាច្រើនម៉ោង។ ហេតុការណ៍នេះ បានកើតឡើង នៅវេលាម៉ោង…
ខេត្តកំពង់ឆ្នាំង៖ រថយន្ដ ៣គ្រឿង រួមទាំងម៉ូតូ ១គ្រឿង បានបុកគ្នាជាបន្តបន្ទាប់ បណ្ដាលឱ្យជាប់គ្នាស្ទះចរាចរណ៍ជាច្រើនម៉ោង។ ហេតុការណ៍នេះ បានកើតឡើង នៅវេលាម៉ោង ៤ និង ១០នាទីរសៀលថ្ងៃទី១១ ខែមករា ឆ្នាំ២០២២ លើកំណាត់ផ្លូវជាតិលេខ៥ នៅចំណុចស្ពានខ្សាម ស្ថិតក្នុងភូមិទី៣ សង្កាត់ខ្សាម ក្រុងកំពង់ឆ្នាំង។
របាយការណ៍របស់សមត្ថកិច្ចនគរបាលចរាចរណ៍ក្រុងកំពង់ឆ្នាំង បានអោយដឹងថា មុនពេលកើតហេតុ មានរថយន្តមួយគ្រឿង ដែលជារថយន្តបង្ក ម៉ាកតូយ៉ូតាពណ៌ស ពាក់ស្លាកលេខ កំពង់ឆ្នាំង 2C-7070 បើកបរដោយឈ្មោះ ភា ផាត អាយុ ៦៧ឆ្នាំ ជាមន្ត្រីចូលនិវត្តន៍ មានទីលំនៅភូមិស្វាយគយ ឃុំពន្លៃ ស្រុកបរិបូណ៌ បានបើកបររថយន្ត ក្នុងទិសដៅពីទិសខាងលិច ទៅកើត លុះមកដល់ចំណុចកើតហេតុ បានបើកវ៉ាជែងរថយន្ត ១គ្រឿង បណ្ដាលឲ្យជ្រុលទៅបុកនឹងរថយន្ត ២គ្រឿង និងម៉ូតូមួយគ្រឿងទៀត ក្នុងដំណើរច្រាស់ទិសគ្នា រួចជ្រុលបុកនឹងបង្កាន់ដៃស្ពាន បណ្ដាលឱ្យជាប់គាំង និងស្ទះចរាចរណ៍ជាច្រើនម៉ោង។
ក្នុងរបាយការណ៍ដដែលបានបញ្ជាក់ថា រថយន្ត ២គ្រឿង ដែលបើកច្រាសទិសជាមួយរថយន្តបង្ក មានទី១ម៉ាក លុចស៊ីស ពណ៌ស ពាក់ស្លាកលេខ កំពង់ឆ្នាំង 2B-3839 បើកបរដោយឈ្មោះ ស៊ុត ឆាយនី អាយុ ៣៥ឆ្នាំ មុខរបរ គ្រូពេទ្យ មានទីលំនៅ ក្នុងភូមិទី៣ សង្កាត់ខ្សាម ក្រុងកំពង់ឆ្នាំង និងរថយន្តទី២ ម៉ាក Toyota Prius ពណ៌ស ពាក់ស្លាកលេខ ភ្នំពេញ 2BG-5012 បើកបរដោយឈ្មោះ មាស ភារ៉ា អាយុ ៣៥ឆ្នាំមានទីលំនៅ ក្នុងខណ្ឌដង្កោ រាជធានីភ្នំពេញ។ ចំណែកម៉ូតូមួយគ្រឿងទៀត ដែលរងគ្រោះ សមត្ថកិច្ចមិនទាន់ស្គាល់អត្តសញ្ញាណនៅឡើយ។
នៅក្នុងហេតុការណ៍នោះ បានបង្កឲ្យខូចខាតរថយន្ត ៣គ្រឿង និងម៉ូតូ ១គ្រឿង បាក់បង្កាន់ដៃស្ពានប្រមាណ ៣ម៉ែត្រ។ ចំណែកមនុស្សរងរបួសធ្ងន់ម្នាក់ ស្រាលម្នាក់ និងឃាត់ខ្លួនអ្នក បើកបរបង្កម្នាក់។
ក្រោយពេលកើតហេតុ សមត្ថកិច្ច បានប្រមូលយកមធ្យោបាយធ្វើដំណើរទាំង ៤គ្រឿង ទៅរក្សាទុក ដើម្បីរង់ចាំការដោះស្រាយតាមនីតិវិធី។ ក្នុងករណីគ្រោះថ្នាក់ចរាចរណ៍ខាងលើ សមត្ថកិច្ចបញ្ជាក់ថា បើកវ៉ាជែងក្នុងស្ថានភាពគ្រោះថ្នាក់ ទើបបណ្តាលឲ្យស្ទះចរាចរណ៍ជាច្រើនម៉ោងបែបនេះ៕ ពៅ សុខហ៊ាន
ចែករំលែកព័តមាននេះ