មនុស្សយើងសុទ្ធតែធ្លាប់មានកំហុសខុសឆ្គងគ្រប់គ្នា គ្មានអ្នកណាដែលថាមិនចេះខុសនោះទេ មានតែមនុស្សដែលហ៊ានកែប្រែកំហុសឆ្គងប៉ុណ្ណោះ ទើបចាត់ទុកថាជាមនុស្សមានតម្លៃ សមគួរដល់ការគោរពលើកតម្កើង ។ យើងគួរសិក្សាពីមនុស្សប្រភេទនេះទើបសង្គមជាតិមានសុខសន្តិភាព
ពិតណាស់កំហុសគឺជាចំណុចដែលមិនល្អ តែកំហុសអាចកែប្រែមនុស្សយើងផ្លាស់ពីមនុស្សម្នាក់ក្លាយជាមនុស្សម្នាក់ទៀតបាន បើបុគ្គលនោះមានចេតនាចង់កែ ។ កំហុសនេះជួនកាលក៏អាចផ្លាស់ប្តូរពីមនុស្សល្អទៅជាមនុស្សអាក្រក់ ហើយជួនកាលក៏ផ្លាស់ពីមនុស្សអាក្រក់មកជាមនុស្សល្អវិញ ទាំងអស់នេះវាអាស្រ័យលើវិធីគិតរបស់មនុស្ស បើយើងជាមនុស្សចិត្តទូលាយ ព្រមបែរមកពិនិត្យត្រួតត្រាខ្លួនឯងពេលឃើញមានចំណុចខុសឆ្គង និងយកចិត្តទុកដាក់កែប្រែជីវិតក៏រមែងល្អប្រសើរឡើង ។
ផ្ទុយពីមនុស្សដែលទន់ខ្សោយ ចិត្តចង្អៀតចង្អល់ មិនព្រមទទួលស្គាល់ការណ៍ពិតជួបជាមួយភាពខុសបំណង គេក៏សោកសៅស្លុតចិត្តក្រៀមក្រំ មិនហ៊ានប្រឈមមុខជាមួយការណ៍ពិត បណ្តោយឲ្យចំណុចខ្សោយ កំហុសឆ្គងទាំងនោះនៅរ៉ាំរ៉ៃតទៅទៀត ទីបំផុតជីវិតក៏រុះរោយថយថោកគ្មានអនាគត ។
អង្គុលីមាល៍គឺជាឃាត.ករដ៏កំណា.ចប្រឈមនឹងទោសទណ្ឌដ៏ធ្ងន់ធ្ងរ តែអ្វីៗត្រូវបញ្ចប់ទាំងអស់នៅពេលដែលអង្គុលីមាល៍ដឹងខ្លួនថាខុស ហើយលះបង់ទោសកំហុសអស់ទាំងនោះ ដោយងាកមកបូជាកាយថ្វាយខ្លួនបួសក្នុងសំណាក់ព្រះសម្មាសម្ពុទ្ធ មិនយូរប៉ុន្មានអង្គុលីមាល៍បានក្លាយជាព្រះអរហន្តខីណាស្រពមួយអង្គដ៏ប្រសើរ រួចផុតអស់កម្មកិលេសទាំងអស់ក្នុងលោក ៕ សាន សារិន
ចែករំលែកព័តមាននេះ