ខេត្តឈុនបុរី, ថៃ ៖ ស្នេហាឆ្លងទ្វីបរបស់បុរសជនជាតិន័រវែសម្នាក់ បានលួចស្រលាញ់នារីខ្មែរម្នាក់ ដែលកំពុងធ្វើការក្នងប្រទេសថៃ នៅឆ្នេរបាងសារ៉ាយ ក្នុងទីក្រុងប៉ាតាយ៉ា ខេត្តឈុនបុរី ដោយពួកគេមានទំនាក់ទំនងជាមួយគ្នាជិត៣ឆ្នាំមកហើយ…
ខេត្តឈុនបុរី, ថៃ ៖ ស្នេហាឆ្លងទ្វីបរបស់បុរសជនជាតិន័រវែសម្នាក់ បានលួចស្រលាញ់នារីខ្មែរម្នាក់ ដែលកំពុងធ្វើការក្នងប្រទេសថៃ នៅឆ្នេរបាងសារ៉ាយ ក្នុងទីក្រុងប៉ាតាយ៉ា ខេត្តឈុនបុរី ដោយពួកគេមានទំនាក់ទំនងជាមួយគ្នាជិត៣ឆ្នាំមកហើយ ថែមទាំងបានផ្ញើប្រាក់ជិត ២០ម៉ឺនបាត ដើម្បីរៀបចំឯកសាររៀបការ ចុងក្រោយទើបដឹងថា នាងមានបុរសបរទេសម្នាក់ទៀតបាត់ទៅហើយ បុរសន័រវេស ក៏ទៅប្តឹងប៉ូលិសថៃ ឲ្យជួយរកយុត្តិធម៌ នេះបើយោងតាមសារព័ត៌មាន Sanook ចេញផ្សាយនៅថ្ងៃទី៩ ខែមករា ឆ្នាំ២០២២ ។
លោក Kyre Vigdahe ជាជនជាតិន័រវេស អាយុ៥៥ឆ្នាំ បានទាក់ទងទៅលោក វីន ឆៃណែត ជាសហគ្រិនភោជនីយដ្ឋានមួយនៅឆ្នេរបាងសារ៉ាយ ។ ហើយបានទៅជួបលោក Prateep Nakbangkerd ជាមេធាវីនៃមជ្ឈមណ្ឌលជំនួយផ្នែកច្បាប់ក្នុងខេត្តឈុនបុរី ស្នើសុំជំនួយ ដើម្បីនាំគ្នាទៅដាក់ពាក្យបណ្ដឹងនៅប៉ុស្តិ៍នគរបាលស្រុកសាធីប នៃខេត្តឈុនបុរី ប្ដឹងស្ត្រីខ្មែរម្នាក់ ឈ្មោះ ស្រី មុំ អាយុ២៩ឆ្នាំ ដោយចោទប្រកាន់ពីបទឆបោកប្រាក់ជិត ២០ម៉ឺនបាត (ជាង៥ពាន់ដុល្លារអាមេរិក) ដោយសន្យាថានឹងរៀបការ តែទីបំផុត យកលុយ គេចខ្លួន ។
លោក Kyre មានប្រសាសន៍ថា លោកបានជួបកញ្ញា ស្រីមុំ និងសាងទំនាក់ទំនងស្នេហា តាមបណ្ដាញសង្គមហ្វេសប៊ុក ហើយបានជួបគ្នាជាលើកដំបូង នៅដើមឆ្នាំ២០១៩ ក្នុងឃុំបាងសារ៉ាយ ស្រុកសាធីប ខេត្តឈុនបុរី ។ ពេលដែលពួកយើងបានជួបគ្នា លោកក៏ពេញចិត្តកញ្ញា ស្រី មុំ ដូច្នេះហើយក៏បានយល់ព្រមក្នុងទំនាក់ទំនងជាគូស្នេហ៍ នឹងយល់ព្រមទទួលយកកញ្ញា ស្រីមុំ នាំទៅរៀបការនៅឯប្រទេសន័រវេស ។ បន្ទាប់មក លោកក៏ជិះយន្តហោះត្រឡប់ទៅប្រទេសកំណើតវិញ ។ ដោយសារតែ នៅអំឡុងពេលមានការរាតត្បាតនៃជំងឺកូវីដ-១៩ យ៉ាងធ្ងន់ធ្ងរ ទើបលោកមិនបានមកជួប ប៉ុន្តែទំនាក់ទំនងគ្នាគឺមាននិយាយតាមវីដេអូទូរសព្ទ ។ ក្នុងរយៈពេលជាងមួយឆ្នាំ កញ្ញា ស្រី មុំ ប្រាប់លោកឲ្យផ្ទេរប្រាក់ប្រហែល ១.០០០ដុល្លារ ក្នុងមួយលើកៗ ដោយ ស្រី មុំ អះអាងថា ត្រូវការប្រើប្រាស់ដើម្បីធ្វើឯកសាររៀបការនៅស្ថានទូតន័រវេស សរុបជាប្រាក់ថៃ ជិត ២០ម៉ឺនបាត (ជាង៥ពាន់ដុល្លារ) ។
ក្រោយមក ប្រហែលខែធ្នូ ឆ្នាំ២០២១ មុនបុណ្យណូអែល លោកបានទាក់ទងទៅ ស្រី មុំ ណាត់ជួបគ្នានៅឆ្នេរបាងសារ៉ាយ ជាចំណុចដែលពួកគេធ្លាក់ក្នុងអន្លង់ស្នេហ៍ដំបូង ប៉ុន្តែដល់ពេលណាត់ជួប កញ្ញា ស្រី មុំ មិនបានបង្ហាញខ្លួនទេ ទើបលោកមានការសង្ស័យថា តើមានរឿងអ្វីកើតឡើង ? ដូច្នេះហើយលោកបានចេញទៅតាមស្វែងរកនាង ក៏ឃើញនាងមកធ្វើការជាជំនួយការចុងភៅ នៅក្នុងភោជនីយដ្ឋានមួយ ក្នុងសង្កាត់បាងសារ៉ាយ ហើយក៏ដឹងដែរថា កញ្ញា ស្រី មុំ មានទំនាក់ទំនងស្នេហាយ៉ាងស៊ីជម្រៅជាមួយបុរសបរទេសម្នាក់ទៀត (ជាប្តីប្រពន្ធទៅហើយ) ។ អ៊ីចឹងហើយ លោកក៏បានទៅនិយាយសួរនាំរឿងសន្យា និងរឿងប្រាក់ដែលបានផ្ញើមក ដើម្បីធ្វើឯកសាររៀបការទៅស្ថានទូតន័រវេសនោះ ប៉ុន្តែ ស្រី មុំ បដិសេធមិននិយាយជាមួយនិងគេចពីលោកទៀត ។
លោក Kyre មានអារម្មណ៍មិនសប្បាយចិត្តទេ ដែលត្រូវគេក្បត់ ។ ថ្វីត្បិតតែនឹងរៀបចំពិធីមង្គលការនៅប្រទេសន័រវេស ក៏ដោយ តែលោកនឹងទិញឡានថ្មី ក្នុងក្តីសង្ឃឹមថា បានរស់នៅជាមួយកញ្ញា ស្រី មុំ ប៉ុន្តែនៅទីបំផុត កញ្ញាក្លាយទៅជាលោកស្រី ។ លោកសោកស្តាយយ៉ាងខ្លាំង ហេតុដូច្នេះហើយ ទើបមកដាក់ពាក្យបណ្តឹងទៅមន្ត្រីប៉ូលិសថៃ ដើម្បីរកយុត្តិធម៌ដល់ទីបញ្ចប់ ។
លោកមេធាវី Prateep ក៏បានមានប្រសាសន៍ដែរថា ដើម្បីឲ្យមានយុត្តិធម៌ ចំពោះជនបរទេស ដែលត្រូវបានគេបោកបញ្ឆោតតាមរយៈការផ្ទេរប្រាក់ រឿងរៀបការនេះ មិនថាតែចំពោះបុរសន័រវេសរូបនេះទេ សូម្បីតែស្ត្រីថៃ ក៏ចាញ់បោកគេដូចគ្នាដែរ ដូច្នេះលោកនឹងជួយផ្នែកច្បាប់លើរឿងមួយនេះ ៕
ចែករំលែកព័តមាននេះ