ខេត្តសៀមរាប ៖ អ្នកភូមិរស់នៅលើផ្ទះបណ្តែតទឹក មាននៅតាមខេត្តដែលស្ថិតនៅជាប់បឹងទន្លេសាប មានខេត្តសៀមរាប ខេត្តកំពង់ឆ្នាំង ខេត្តកំពង់ធំ ខេត្តពោធិ៍សាត់ និងខេត្តបាត់ដំបង ។…
ខេត្តសៀមរាប ៖ អ្នកភូមិរស់នៅលើផ្ទះបណ្តែតទឹក មាននៅតាមខេត្តដែលស្ថិតនៅជាប់បឹងទន្លេសាប មានខេត្តសៀមរាប ខេត្តកំពង់ឆ្នាំង ខេត្តកំពង់ធំ ខេត្តពោធិ៍សាត់ និងខេត្តបាត់ដំបង ។ ដោយឡែក នៅក្នុងភូមិសាស្ត្រខេត្តសៀមរាប គឺនៅសង្កាត់ចុងឃ្នៀស មានពលរដ្ឋខ្មែរនិងវៀតណាមជាច្រើនគ្រួសាររស់នៅលើផ្ទះបណ្តែតទឹក។
អ្វីដែលមានការខុសប្លែកគ្នានោះ គឺជនជាតិវៀតណាមដែលប្រកបមុខរបរនេសាទជាប្រចាំកំពុងរស់នៅលើផ្ទះបណ្តែតទឹកក្នុងទន្លេទាំងរដូវវស្សា និងរដូវប្រាំង។ ចំណែកពលរដ្ឋខ្មែរដែលប្រកបរបរនេសាទដែរនោះរស់នៅតែរដូវវស្សាប៉ុណ្ណោះ រីឯរដូវប្រាំងបាននាំគ្នាអូសផ្ទះបណ្តែតទឹកមកនៅអែបដីគោក ។
លោកប៊ុន យ៉ាំងហាយ អាយុ៤៦ឆ្នាំ ជនជាតិវៀតណាម ដែលមានមុខរបរទិញ-លក់ត្រី និងជាប្រធានសមាគមវៀតណាម រស់នៅលើផ្ទះបណ្តែតទឹកក្នុងភូមិ៧ សង្កាត់ចុងឃ្នៀស ក្រុងសៀមរាប និយាយថា បងប្អូនវៀតណាមដែលរស់នៅលើផ្ទះបណ្តែតទឹកមានចំនួន៣៤៧គ្រួសារ ស្មើនឹងចំនួន១៦៤៤នាក់(ប្រុស ៨៤៩នាក់) ។ គាត់មានកូន ៤នាក់(ស្រីម្នាក់)នៅក្នុងបន្ទុក រៀននៅសាលាភូមិ៧បណ្តែតទឹក សព្វថ្ងៃគឺរៀនភាសាវៀតណាមនិងខ្មែរ ។
ចំពោះបងប្អូនវៀតណាមខ្លះប្រកបរបរនេសាទនៅកណ្តាលទន្លេ ខ្លះធ្វើជាកម្មករ ខ្លះលក់ដូរតាមផ្ទះ
បណ្តែតទឹកខ្លះលក់ដូរតាមទូកបម្រើសេចក្តីត្រូវការរបស់អ្នកភូមិ ។ លោកហេង លាងហួត អាយុ៤៥ឆ្នាំ មុខរបរលក់-ទិញត្រី រស់នៅលើផ្ទះបណ្តែតទឹក ក្នុងភូមិ៧ សង្កាត់ចុងឃ្នៀសដែរ និយាយថា គាត់សព្វថ្ងៃរកចំណូលបានត្រឹមតែរស់មួយគ្រាៗប៉ុណ្ណោះ ។
ចំណែកបងប្អូនខ្មែរដែលរស់នៅលើគោក ពួកគាត់មានស្រែចម្ការ ហើយក្រៅពីស្រែចម្ការពួកគាត់ឆ្លៀតចុះទន្លេ ធ្វើនេសាទបានប៉ុនណារស់ប៉ុណ្ណឹង ។ ប៉ុន្តែ ចំពោះបងប្អូនជនជាតិវៀតណាមប្រកបតែរបរនេសាទ បើក្រៅពីនេសាទគឺចប់ ។ បើរកស៊ីជាលក្ខណៈគ្រួសារចេញទៅរកនៅកណ្ដាលទន្លេសមត្ថកិច្ចអាចចាប់ដោសារខុសច្បាប់ទម្លាប់។
លោក អ៊ុំ ណារី ចៅសង្កាត់ចុងឃ្នៀស មានប្រសាសន៍ប្រាប់ភ្នាក់ងារកោះសន្តិភាពថា ផ្ទះបណ្តែតទឹកជនជាតិវៀតណាមមានចំនួន៣៤៧គ្រួសារ ស្មើនឹង១៦៤៤នាក់ (ប្រុស៨៤៩នាក់) ។ ជនជាតិវៀតណាមមានសហគមន៍ពួកគេប្រកបរបរនេសាទ មានវិហារមួយសម្រាប់ការគោរពបូជា ហៅថា សាលាមាស ។
សាលារៀនភាសាវៀតណាមបណ្តែតទឹក មាន២ខ្នង និង៤បន្ទប់ និងមានវិហារយេស៊ូមួយ និងវត្តខ្មែរមួយ គឺវត្តសុវណ្ណសាគរ ហៅវត្តខ្សាច់ ។ លោកបន្តថា សម្រាប់បងប្អូនរស់នៅលើទឹកបើមានអ្នកស្លាប់ នៅរដូវខែវស្សាដែលមានតែផ្ទៃទឹកល្ហល្ហេវ គេអូសក្បូនផែបណ្តែតទឹកមកធ្វើបុណ្យ ហើយគេហែយកទៅបញ្ចុះនៅទីលានឈ្មោះ«ត្រពាំងឡាងគោ ឡាងកាម» ក្នុងភូមិភ្នំក្រោម សង្កាត់សៀមរាប ក្រុងសៀមរាប ឬនៅមុខវត្តខ្សាច់ នៅលើគោកខាងលិចម្ខាងទន្លេ ។
ចំពោះការរៀបអាពាហ៍ពិពាហ៍ ក៏មានក្បូនផែបណ្តែតទឹកសម្រាប់ធ្វើរោងការដូចនៅលើគោកដែរ ។ ពេលមានបញ្ហាសុខភាព ឈឺ ថ្កាត់ ពួកគាត់ជិះទូកឡើងមកលើគោក ចូលទៅព្យាបាលនៅមណ្ឌលសុខភាពចុងឃ្នៀស បើឈឺធ្ងន់បន្តទៅព្យាបាលនៅមន្ទីរពេទ្យបង្អែកខេត្ត ។
ដោយឡែក បងប្អូនខ្មែរ ដែលទៅប្រកបរបរនេសាទនៅកណ្តាលទន្លេ បណ្តែតផ្ទះលើទឹក សម្រាប់តែខែវស្សាបើខែប្រាំងពួកគាត់អូសផ្ទះបណ្តែតទឹកយកមកលើគោក ។ ពួកគាត់មានដី ដែលរាជរដ្ឋាភិបាលបានចែកជូនក្នុង១គ្រួសារៗទំហំ៧ម៉ែត្រ គុណនឹង១៥ម៉ែត្រ ព្រមទាំងមានប័ណ្ណក្រីក្រផ្តល់ជូនដែរ ដោយគ្មានការរើសអើងពូជសាសន៍នោះទេ ៕
ចែករំលែកព័តមាននេះ