អង់គ្លេស ៖ លោក Mikel Arteta អ្នកចាត់ការ​ក្រុម​កាំភ្លើង​ធំ Arsenal បាន​ចេញ​មុខ​សុំ​ទោស​ចំពោះ​ទម្រង់​លេង​មិនល្អ​របស់​ក្រុម​ខ្លួន បន្ទាប់​ពី​ត្រូវ​ក្រុម Nottingham Forest មក​ក្រប​ខណ្ឌ Championship ទម្លាក់​ចេញពី​ពានរង្វាន់ FA Cup ត្រឹម​ជុំ​ទី​៣ កាលពី​យប់មិញ​។

ជំនួប​ធ្វើ​ឡើង​នៅ​ឯ​កីឡដ្ឋាន City Ground បាន​បញ្ចប់​ទៅ​ដោយ​លទ្ធផល ១-០ ដែល​មួយ​គ្រាប់​នេះ​សម្រេច​បាន​ដោយ​ខ្សែប្រយុទ្ធ Lewis Grabban នៅ​នាទី​៨៣​។ ជាមួយ​ជ័យជម្នះ​នេះ Nottingham បន្ត​ឡើង​ទៅ​ជុំ​ទី​៤ ដោយ​ត្រូវ​ជួប Leicester City បន្ទាប់​ពី​ក្រុម​រហស្សនាម «​កញ្ជ្រោង​» បាន​យកឈ្នះ​លើ​ក្រុម Watford លទ្ធផល ៤-១ នៅ​ជុំ​ទី​៣​។

ជា​ការ​ខកចិត្ត​មួយ​សម្រាប់​អ្នកគាំទ្រ ក្រោយ Arsenal ដែល​ជា​ក្រុម​ឈ្នះ​ជើងឯក FA Cup ច្រើន​ជាងគេ​ក្នុង​ប្រវត្តិសាស្ត្រ (១៤​ដង​) បង្ហាញ​ទម្រង់​លេង​មិនល្អ​។ ជុំវិញ​បញ្ហា​នេះ លោក Mikel Arteta បាន​ថ្លែង​ក្រោយ​បញ្ចប់​ការ​ប្រកួត​ថា «​យើង​មិនល្អ​គ្រប់គ្រាន់ ហើយ​យើង​ត្រូវ​តែ​សុំ​ទោស​សម្រាប់​វា​។ យើង​ត្រូវការ​ការ​ជំរុញ​បន្ថែម​ទៀត ការ​ស្រែក​ឃ្លាន​ជ័យជម្នះ​ច្រើន​ជាង​នេះ​។ យើង​មិន​ស្ថិត​នៅ​ក្នុង​កម្រិត​របស់​យើង​ទេ ខ្ញុំ​ពិតជា​ខកចិត្ត​ណាស់ ដោយសារ​ការ​ប្រកួតប្រជែង​នេះ ទាក់ទង​យ៉ាង​ខ្លាំង​ទៅ​នឹង​ប្រវត្តិសាស្ត្រ​ក្លិប​យើង ហើយ​ការ​ចាកចេញ​នេះ គឺ​ពិតជា​ឈឺចាប់​ណាស់​»​។

សមាសភាព​ក្រុម​ត្រូវ​ជួប​គ្នា​នៅ​ការ​ប្រកួត​ជុំ​ទី​៤ ដែល​ចាប់ផ្តើម​ប្រកួត​ពី​ថ្ងៃ​ទី ៤-៧ ខែ​កុ​ម្ភៈ ឆ្នាំ​២០២២៖
-Crystal Palace ប៉ះ Hartlepool United
-Bournemouth ប៉ះ Boreham Wood
-Huddersfield ប៉ះ Barnsley
-Peterborough ប៉ះ QPR
-Cambridge United ប៉ះ Luton Town

-Southampton ប៉ះ Coventry City
-Chelsea ប៉ះ Plymouth Argyle
-Everton ប៉ះ Brentford
-Kidderminster Harriers ប៉ះ West Ham United
-Manchester United ឬ Aston Villa ប៉ះ Middlesbrough

Tottenham Hotspur ប៉ះ Brighton & Hove Albion
-Liverpool ប៉ះ Cardiff City
-Stoke City ប៉ះ Wigan Athletic
-Nottingham Forest ប៉ះ Leicester City
-Manchester City ប៉ះ​Fulham
-Wolverhampton ប៉ះ Norwich City

ដោយឡែក​ការ​ប្រកួត​ជុំ​ទី​៣​រវាង Manchester United នឹង Aston Villa នឹង​ត្រូវ​លេង​នៅ​វេលា​ម៉ោង ២:៥៥​នាទី​រំលង​អា​ធ្រា​ត្រ​ឈាន​ចូល​ថ្ងៃ​ទី​១១ ខែមករា ឆ្នាំ​២០២២ (​ម៉ោង​នៅ​កម្ពុជា​)៕ (​ដកស្រង់​ចេញពី BBC)