ស្វែងរកជំហរថ្មីសម្រាប់យុទ្ធនាការឃោសនារបស់ខ្លួន លោក DONALD TRUMP កាលពីថ្ងៃទី២២ មិថុនា បានប្រើវោហាសាស្ត្រគ្រប់ក្បាច់ប្រឆាំងគូប្រជែងលោកស្រីហ៊ីលឡារី គ្លីនតុន ដោយចោទលោកស្រីថា ជាមេភូតលេខមួយ ហើយគ្មានសមត្ថភាពសម្រាប់ដឹកនាំសហរដ្ឋអាមេរិក ។
ចំណែកលោកស្រីគ្លីនតុន គូប្រជែងនៃគណបក្សប្រជាធិបតេយ្យវិញបានតបតវិញ ដោយបរិហារពីពាក្យភូតកុហកផ្តេសផ្តាស និងទ្រឹស្តីលាក់ពុតរបស់មហាសេដ្ឋីសាធារណរដ្ឋរូបនេះ ដែលលោកស្រីថា មិនដឹងប្រើពាក្យអីឱ្យចំបាន ។
ក្នុងសុន្ទរកថាមួយនៃអគារខ្ពស់ TRUMP SOHO នៅម៉ាន់ហាតាន់ លោក DONALD TRUMP ដែលខើចហិរញ្ញវត្ថុសម្រាប់ការឃោសនា ហើយក្នុងការស្ទាបស្ទង់មតិនានាហាក់ចាញ់ប្រៀបលោកស្រីគ្លីនតុន នោះ មិនឱបដៃនៅស្ងៀមឡើយ ដោយលោកបរិហារលោកស្រីគ្លីនតុន ថា អាចជាមនុស្សមហាពុករលួយមិនគួរឈរឈ្មោះជាបេក្ខជនប្រធានាធិបតីឡើយ ។ ពាក្យពេចន៍របស់លោក TRUMP វាយប្រហារគូប្រជែងពិតជាខ្លាំងក្លាជាពិសេស ។ លោកថា លោកស្រីគ្លីនតុន ជាមេភូតលេខមួយ ។
លោក TRUMP តាំងខ្លួនជាអ្នកការពារពលករអាេមរិកប្រឈមមុខនឹងពួកអ្នកនយោបាយប្រពៃណី ពួកការិយាធិបតេយ្យ និងពួកឡុបប៊ី LOBBYS ហើយលោកស្នើដល់ពួកអ្នកគាំទ្រអ្នកប្រជាធិបតេយ្យលោក BERNIE SANDERS គូប្រជែងលោកស្រីគ្លីនតុន ក្នុងការបោះឆ្នោតសម្រាំងបេក្ខជនគណបក្សប្រជាធិបតេយ្យឱ្យចូលរួមជាមួយលោក ដើម្បីតស៊ូប្រឆាំងប្រព័ន្ធនយោបាយ និងសេដ្ឋកិច្ចបោកប្រាស់ ។
លោក TRUMP ពេលនេះកាត់បន្ថយវោហាសាស្ត្រលើពួកអ៊ិស្លាម ហើយក៏ពុំនិយាយពីការកសាងជញ្ជាំងជាមួយម៉ិចស៊ិកដែរ ។ ក៏ប៉ុន្តែលោកចោទលោកស្រីគ្លីនតុនថា ដឹកនាំក្រសួងការបរទេសរវាងឆ្នាំ២០០៩ ទៅ២០១៣ ដូចជាមូលនិធិសម្រាប់ដើរកម្សាន្តផ្ទាល់ខ្លួន ដោយមានទំនោរទន់ទៅរកបណ្តារបបគាបសង្កត់ និងមនុស្សច្រើនទៀត ដើម្បីបានប្រាក់ធ្វើមានបានលើខ្នងពលរដ្ឋអាមេរិក ។
លោក TRUMP ក៏ចោទប្រកាន់អតីតរដ្ឋមន្ត្រីការបរទេសរបស់លោកបារ៉ាក់ អូបាម៉ា ថា រយៈពេល៤ឆ្នាំតែម្នាក់ឯងអាចធ្វើឱ្យមានអស្ថេរភាពតំបន់មជ្ឈិមបូព៌៌ាទាំងមូល ។ លោកថា ក្រុមរដ្ឋអ៊ិស្លាមពេលនេះគំរាមកំហែងយើង ដោយសារតែការសម្រេចចិត្តនានាដែលលោកស្រីគ្លីនតុន បានធ្វើជាមួយលោកប្រធានាធិបតីបារ៉ាក់ អូបាម៉ា ។
លោក TRUMP ក៏វាយប្រហារគូប្រជែងលើជំហរចំពោះអន្តោប្រវេសន៍ និងបណ្តាកិច្ចព្រមព្រៀងពាណិជ្ជកម្មដែលលោកស្រីគាំទ្រថា ជាគ្រោះមហន្តរាយទាំងស្រុងសម្រាប់ពលករអាមេរិក ព្រមទាំងអំណោយនានា ដែលលោកថា បានទទួលពីបណ្តាប្រទេសដែលមានការសង្ស័យរំលោភបំពានខាងសិទ្ធិមនុស្ស ។ លោកថា ដូច្នេះលោកស្រីគ្លីនតុន គ្មានសមត្ថភាពដើម្បីដឹកនាំសហរដ្ឋអាមេរិកឡើយ ។
ទោះបីយ៉ាងណាក្នុងសុន្ទរកថានេះ លោក TRUMP ចៀសវាងមិននិយាយពីការខើចថវិកាសម្រាប់ឃោសនារបស់លោកឡើយ ដែលអាចនៅសល់ក្នុងកេសត្រឹម១លានដុល្លារនាដំណាច់ខែឧសភា ទល់នឹង៤២,៥លានដុល្លារ សម្រាប់លោកស្រីគ្លីនតុន ៕
ចែករំលែកព័តមាននេះ