ខេត្តសៀមរាប ៖ ដើម្បីបង្កើនចំណូលក្នុងគ្រួសារ ប្រជាសហគមន៍ព្រៃធំ អន្លង់ធំ ក្នុងភូមិសាស្ត្រឧទ្យានជាតិព្រះជ័យវរ្ម័ននរោត្តម «ភ្នំគូលែន» ខេត្តសៀមរាបមួយចំនួនបានងាកមកចិញ្ចឹមមាន់ស្រែ ក្រៅពីការចិញ្ចឹមជ្រូកកណ្តុរ ។ កសិករនិយាយថា របរចិញ្ចឹមមាន់ស្រែមានលក្ខណៈងាយស្រួលក្រៅពីចំណាយដើមទុនតិច មិនចាំបាច់ថែទាំច្រើន ចំណែកចំណូលទទួលបានវិញសមរម្យ និងមិនពិបាករកទីផ្សារទៀត ។
អ្នកស្រី និម ទុំ ប្រជាពលរដ្ឋក្នុងភូមិអន្លង់ធំ ឃុំខ្នងភ្នំ ស្រុកស្វាយលើ និយាយថា ការចិញ្ចឹមមាន់ស្រែរបស់គាត់មានលក្ខណៈសាមញ្ញដោយគាត់ធ្វើទ្រុងសម្រាប់ឱ្យមាន់ដេក និងពង ព័ទ្ធដោយសំណាញ់ ។ អ្នកស្រីថា ចំពោះការផ្តល់ចំណីវិញ ក្នុងមួយថ្ងៃ ៣ ពេលជាទៀតទាត់ ។ មាន់ស្រែលក់បានមួយគីឡូក្រាមថ្លៃ ១៨ ០០០ រៀល ។ ភាគច្រើនគេទិញយកទៅអាំងប្រឡាក់អំបិលម្ទេស ពីព្រោះថា មាន់ស្រែធម្មជាតិឆ្ងាញ់ណាស់ ។
លោក ស៊ឹម សុខ អ្នកភូមិរស់នៅលើខ្នងភ្នំគូលែន បាននិយាយថា ក្រៅពីចិញ្ចឹមជ្រូកកណ្តុរ លោកចិញ្ចឹមមាន់ ដែលក្នុងមួយៗឆ្នាំទាំងមាន់ទាំងជ្រូក ផ្តល់ចំណូលឲ្យគ្រួសារលោក ពី ៤០០០ ដុល្លារដល់ជាង ៥០០០ ដុល្លារ ។
លោក ផាន់ ផុន ប្រធានសហគមន៍ព្រៃធំអន្លង់ធំបានឱ្យដឹងថា កន្លងមកសហគមន៍របស់លោកបានជំរុញឱ្យប្រជាពលរដ្ឋចូលរៀនវគ្គបណ្តុះបណ្តាលក្នុងការចិញ្ចឹមសត្វ ដែលធ្វើឱ្យការចិញ្ចឹមរបស់ពួកគាត់ទទួលនូវភាពជោគជ័យមិនថាចិញ្ចឹមមាន់ ឬជ្រូកកណ្តុរនោះទេ ។ លោកប្រធានសហគមន៍ថា បច្ចុប្បន្នមានប្រជាពលរដ្ឋជាង ៧០ ភាគរយហើយនៅក្នុងសហគមន៍ បានជ្រើសររើសយកមុខរបរចិញ្ចឹមជ្រូកកណ្តុរ និងមាន់ ក្នុងការលើកស្ទួយជីវភាពគ្រួសារខ្លួន ។
អភិបាលស្រុកស្វាយលើ ខេត្តសៀមរាប លោក អៀង ពិសិដ្ឋ បានឱ្យដឹងថា គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា បានគាំទ្រសហគមន៍តំបន់ការពារធម្មជាតិចំនួនពីរគឺសហគមន៍ព្រៃធំពពេល និងសហគមន៍ព្រៃធំអន្លង់ធំនៅលើឧទ្យានជាតិ ព្រះជ័យវរ្ម័ន-នរោត្តមភ្នំគូលែនដោយគម្រោងបានយកចិត្តទុកដាក់ពង្រឹងលើផ្នែកទេសចរណ៍ធម្មជាតិ មានទាំងកិច្ចការងារបដិសណ្ឋារកិច្ច ការនាំភ្ញៀវនិងការអភិរក្សជាដើម ។ លើសពីនេះគម្រោងក៏ជួយឲ្យមានកំណើនជីវភាពប្រជាសហគមន៍តាមរយ:បង្កើនរចិញ្វឹមសត្វជ្រូកកណ្តុរ ការចិញ្ចឹម មាន់និងឃ្មុំព្រៃ ដែលបានចូឡរួមចំណែកសំខាន់ក្នុងការលើកកម្ពស់ជីវភាពពលរដ្ឋ ៕
ចែករំលែកព័តមាននេះ