រាជធានីភ្នំពេញ ៖ រដ្ឋមន្ត្រីក្រសួងកសិកម្ម ឲ្យដឹងថា ផលិតកម្មដំណាំកសិកម្មឆ្នាំ ២០២១ សរុបមានចំនួនប្រមាណ ១០ ៥៦៧ លានដុល្លារអាមេរិក…
រាជធានីភ្នំពេញ ៖ រដ្ឋមន្ត្រីក្រសួងកសិកម្ម ឲ្យដឹងថា ផលិតកម្មដំណាំកសិកម្មឆ្នាំ ២០២១ សរុបមានចំនួនប្រមាណ ១០ ៥៦៧ លានដុល្លារអាមេរិក កើនលើសឆ្នាំ ២០២០ ចំនួន ៣៣,១៥% ។ ក្នុងចំណោមផលពីវិស័យកសិកម្មខាងលើនេះ មានតម្លៃទទួលបានពីការនាំចេញកសិផលមានវិញ្ញាបនបត្រ មានចំនួន ៣ ៩៥៨ លានដុល្លារអាមេរិក កើនលើសឆ្នាំ ២០២០ ចំនួន ១០៥,៤៣% តម្លៃទទួលបានពីការនាំចេញកសិផលគ្មានវិញ្ញាបនបត្រ មានចំនួន ៩៥៩ លានដុល្លារអាមេរិកថយចុះចំនួន ៣៦,២៩% ធៀបឆ្នាំ ២០២០ និងតម្លៃទទួលបានពីកសិផលដែលសល់សម្រាប់ប្រើប្រាស់ក្នុងស្រុក មានចំនួន ៥ ៦៤៨ លានដុល្លារអាមេរិក កើនលើសឆ្នាំ ២០២០ ចំនួន ២៥,៤៥% ។
លោក វេង សាខុន បានលើកឡើងថា នៅឆ្នាំ ២០២១ កន្លងទៅនេះ កម្ពុជាសម្រេចផលិតកម្មដំណាំកសិកម្មនៅទូទាំងប្រទេសទទួលបានសរុបចំនួន ៣៥ ៩៧៤ ១៣៨ តោន កើនឡើងចំនួន ២៣% ធៀបនឹងឆ្នាំ ២០២០ ក្នុងនោមានដំណាំស្រូវ មានចំនួន ១២ ២០៦ ៩១១ តោន កើនឡើងចំនួន ១១,៦៣% ធៀបនឹងឆ្នាំ ២០២០ ដែលមានបរិមាណចំនួន ១០ ៩៣៥ ៦១៨ តោន ។
ទោះយ៉ាងនេះកសិករជាច្រើននៅឆ្នាំនេះត្អូញថាការចំណាយលើការដាំដុះឆ្នាំនេះកើនឡើងដោយសារ ជីកសិកម្ម ថ្នាំកសិកម្ម បានឡើងថ្លៃពី ៣ ទៅដង ៤ ចំណែកផលិតផលពិសេសនៅតំបន់ខ្លះបានធ្លាក់ថ្លៃ ។ លោក មឿន រស់នៅក្នុងស្រុកភ្នំស្រុក ខេត្តបន្ទាយមានជ័យ ជាប់អាងទឹកត្រពាំងថ្ម និយាយថា នៅពេលនេះលោកបានទុកដីស្រែជាង ២ ហិកតាចោលមិនដាំដុះដោយសារជីឡើងថ្លៃពេកចំណែកស្រូវបើចុះថោកទៅវិញ នាំការធ្វើស្រែឆ្នាំនេះលោកគិតថា មិនចំណេញនោះឡើយ ។ កសិកររូបនេះ អះអាងថា កសិករជាច្រើនក្នុងមូលដ្ឋានរបស់គាត់បានទុកដីចោលមិនដាំដុះដូចលោកដែរ ។
អ្នកស្រី សុខ សុផល កសិករក្នុងស្រុកសូត្រនិគម ខេត្តសៀមរាប បានមានប្រសាសន៍តាមទូរស័ព្ទថា ការបង្កបង្កើនផលកសិកម្មរបស់កសិករក្នុងសហគមន៍អ្នកស្រីបានទទួលកំណើនទិន្នផល ប៉ុន្តែក៏មានបញ្ហាប្រឈម បញ្ហាតម្លៃជី និងថ្នាំកសិកម្មដូចកសិករនៅតំបន់ផ្សេងដែរ ។
នៅក្នុងរបាយការណ៍របស់លោក វេង សាខុន ក្រៅពីដំណាំស្រូវ ដែលមានទិន្នផលកើននោះ ដំណាំសាកវប្បកម្ម និងដំណាំឧស្សាហកម្ម ក៍ទទួលកំណើនផងដែរ បើធៀបឆ្នាំ ២០២០ ៕
ចែករំលែកព័តមាននេះ