រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា កម្លាំងនគរបាលមន្ទីរប្រឆាំងគ្រឿង.ញៀន បានចុះទៅបង្ក្រាបក្រុមជនជួញដូរគ្រឿង.ញៀន ហើយក៏បានចាប់ខ្លួនជនសង្ស័យម្នាក់ ប៉ុន្តែត្រូវជនសង្ស័យរូបនោះធ្វើការប្រវាយប្រតប់តបតមកវិញ ហើយក៏ដណ្ដើមបានកាំភ្លើងខ្លី១ដើមពីកម្លាំងនគរបាល រួចក៏បាញ់រះជាច្រើនគ្រាប់ បណ្ដាលឲ្យនគរបាលម្នាក់ និងអ្នកភូមិចំនួន២នាក់ផ្សេងទៀតរងរបួសធ្ងន់-ស្រាល ហើយនៅទីបំផុត ជនសង្ស័យរូបនោះក៏ត្រូវបាននគរបាលឃាត់ខ្លួនបាន រួចនាំយកទៅសាកសួរ និងចាត់ការតាមច្បាប់។
សេចក្តីរាយការណ៍បន្តថា ហេតុការណ៍បង្ក្រាបខាងលើនេះ បានកើតឡើងកាលពីវេលាម៉ោង១០ព្រឹក ថ្ងៃទី៤ ខែមករា ឆ្នាំ២០២២ នេះ ស្ថិតនៅក្នុងភូមិថ្មគោល១ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
សេចក្តីរាយការណ៍បន្តទៀតថា ជនរងគ្រោះ២នាក់ដែលជាអ្នកភូមិនៅក្នុងហេតុការណ៍ខាងលើនេះ គឺ១-ឈ្មោះ នេប សាវឿន ភេទស្រី អាយុ៦៧ឆ្នាំ របួសស្មាខាងស្ដាំ១គ្រាប់ ២-ឈ្មោះ វ៉ា ចាន់សេរីរ័ត្ន អាយុ១៨ឆ្នាំ ចំណែកអ្នករងរបួសម្នាក់ទៀត គឺជាមន្ត្រីនគរបាល ដែលចុះបង្ក្រាបគ្រឿង.ញៀននោះ។
បើតាមអ្នកភូមិបាននិយាយថា នៅមុនពេលកើតហេតុ នគរបាលមួយក្រុមប្រាប់ពួកគាត់ថា គឺជាកម្លាំងនគរបាលមន្ទីរប្រឆាំងគ្រឿង.ញៀនអគ្គស្នងការនគរបាលជាតិ ក្រសួងមហាផ្ទៃ បានចុះទៅបង្ក្រាបក្រុមជនជួញដូរគ្រឿង.ញៀន។ ខណៈពេលនោះ បានធ្វើការឃាត់ខ្លួនជនសង្ស័យម្នាក់ឈ្មោះ ជី វ៉ា អាយុ៣៥ឆ្នាំ ប៉ុន្តែជននេះពុំនៅស្ងៀមឲ្យចាប់ខ្លួនស្រួលៗនោះទេ គឺបានវាយត.ដៃដណ្ដើមយកកាំភ្លើងខ្លី១ដើមពីនគរបាល។
ប្រភពដដែលបានបន្តទៀតថា ភ្លាមៗនោះ ជនសង្ស័យខាងលើ ក៏បានបាញ់១គ្រាប់ បណ្ដាលឲ្យត្រូវនគរបាលម្នាក់របួសដៃស្ដាំ រួចព្យាយាមរត់គេចខ្លួន។ ចំណែកកម្លាំងនគរបាលវិញ ក៏បានរត់ដេញតាមចាប់ខ្លួន និងយកកាំភ្លើងខ្លីមកវិញ តែជនសង្ស័យក៏បានឈប់ និងឈរអែបនៅនឹងសសររបងផ្ទះមួយកន្លែង រួចបាញ់រះជាច្រើនគ្រាប់ទៀត បណ្ដាលឲ្យត្រូវស្ត្រីរងគ្រោះទាំង២នាក់ដែលកំពុងស្ថិតនៅក្នុងផ្ទះ ធ្វើឱ្យរងរបួសធ្ងន់ធ្ងរតែម្តង ក្រោយមកនគរបាលក៏បានធ្វើការឡោមព័ទ្ធចាប់ខ្លួនជនសង្ស័យនោះបាន ព្រមទាំងដកហូតយកបានអាវុធខ្លីនោះមកវិញផងដែរ។
ប្រភពដដែលខាងលើបានប្រាប់ឲ្យដឹងបន្តថា បន្ទាប់មក នគរបាលក៏បានរុញជនសង្ស័យឈ្មោះជី វ៉ា នោះចូលទៅក្នុងរថយន្ត រួចបើករថយន្តចាកចេញទៅបាត់អស់ ដោយពុំទទួលខុសត្រូវដល់អ្នកភូមិដែលរងរបួសនោះឡើយ ។
ក្រោយពេលស្ងប់ស្ងាត់ការផ្ទុះអាវុធរួច ជនរងគ្រោះក៏ត្រូវបានក្រុមគ្រួសារនាំគ្នាដឹកយកទៅកាន់មន្ទីរកាល់ម៉ែត ដើម្បីសង្គ្រោះបន្ទាន់។
ដោយឡែកកម្លាំនគរបាលប៉ុស្តិ៍ចោមចៅ និងនគរបាលខណ្ឌពោធិ៍សែនជ័យ ក៏បានចុះទៅកាន់កន្លែងកើតហេតុនោះដែរ ហើយបាននិយាយថា «អត់ដឹងថាកម្លាំងនគរបាលដែលចុះបង្ក្រាបគ្រឿង.ញៀននោះ គឺជាកម្លាំងខាងណានោះទេ ។ ព្រោះអត់បានសហការ ឬជូនដំណឹងឲ្យកម្លាំងមូលដ្ឋានបានដឹងឡើយ រហូតមានរឿងបែបនេះកើតឡើងទើបដឹង»៕
ចែករំលែកព័តមាននេះ