រាជធានីភ្នំពេញ៖ ប្រទេសកម្ពុជាបានបញ្ជូនពលករទៅធ្វើការប្រទេសកូរ៉េខាងត្បូងតាមប្រព័ន្ធអនុញ្ញាតមុខរបរ (EPS) របស់សាធារណរដ្ឋកូរ៉េពីចុងឆ្នាំ ២០០៦ មក ។ នៅដើមឆ្នាំ២០២២នេះ មានពលករកម្ពុជាប្រមាណ ៥…
រាជធានីភ្នំពេញ៖ ប្រទេសកម្ពុជាបានបញ្ជូនពលករទៅធ្វើការប្រទេសកូរ៉េខាងត្បូងតាមប្រព័ន្ធអនុញ្ញាតមុខរបរ (EPS) របស់សាធារណរដ្ឋកូរ៉េពីចុងឆ្នាំ ២០០៦ មក ។ នៅដើមឆ្នាំ២០២២នេះ មានពលករកម្ពុជាប្រមាណ ៥ ម៉ឺននាក់បានកំពុងធ្វើការនៅក្នុងប្រទេសកូរ៉េ ។
ប្រមុខរាជរដ្ឋាភិបាលកម្ពុជា ក្នុងពិធីបើកការដ្ឋានសាងសង់ និងលើកកម្រិតគុណភាពផ្លូវជាតិលេខ៤៨ តភ្ជាប់ខេត្តព្រះសីហនុ ទៅកាន់ខេត្តកោះកុងប្រវែង ១៤៨ គីឡូម៉ែត្រ ដែលប្រើប្រាស់ថវិកាសរុបប្រមាណ ៦៥.១៤ លានដុល្លារអាមេរិក ក្រោមឥណទានសម្បទាន ពីរដ្ឋាភិបាលសាធារណរដ្ឋកូរ៉េនោះ បានបញ្ជាក់ថាប្រទេសកូរ៉េបានចូលរួមចំណែកផ្តល់ការងារឱ្យពលរដ្ឋខ្មែរ ។ សម្តេចបានបញ្ជាក់ថា ពលករខ្មែរដែលបានធ្វើការនៅប្រទេសកូរ៉េទាំងនោះ បានបញ្ជូនប្រាក់ចំណូលរបស់ខ្លួនឱ្យគ្រួសារ នៅក្នុងប្រទេស ។
ក្រៅពីបានផ្តល់ជំនួយជាច្រើនដល់កម្ពុជា ទំហំពាណិជ្ជកម្មរបស់កម្ពុជា-កូរ៉េ បានកើនលើស ១០ ពាន់លានដុល្លារ មកដល់ចុងឆ្នាំ២០២១នេះ ។ មានការរំពឹងថាពាណិជ្ជកម្មប្រទេសទាំងពីរនឹងស្ទុះកាន់តែខ្លាំង ក្រោយពិកិច្ចព្រមព្រៀងពាណិជ្ជកម្មសេរីកម្ពុជាកូរ៉េនឹង ចូលជាធរមាននាពេលខាងមុខនោះ ។
ចាប់តាំងពីឆ្នាំ ២០០៧ មកប្រទេសកម្ពុជាបានបញ្ជូនពលករសរុបចំនួន ៦៨,២៩៤ នាក់ ក្នុងនោះស្រី ១៤,២៥៥ នាក់ ទៅធ្វើការក្នុងវិស័យឧស្សាហកម្ម កសិកម្ម និងសំណង់នៅក្នុងប្រទេសកូរ៉េខាងត្បូង ។ យុវជនខ្មែរម្នាក់ឈ្មោះ សាម៉េត អាយុ ៣០ ឆ្នាំ មានស្រុកកំណើតនៅស្រុករលាប្អៀ ខេត្តកំពង់ឆ្នាំង បានមកធ្វើការនៅប្រទេសកូរ៉េជាង ៧ ឆ្នាំ ។
យុវជន សាម៉េត បានប្រាប់អ្នកសារព័ត៌មាន នាពេលកន្លងមកថា មុនទៅកូរ៉េជីវភាពគ្រួសារ លោកមានការលំបាកជាខ្លាំង ដែលមិនអាចឱ្យលោកសិក្សាបានខ្ពង់ខ្ពស់នោះទេ តែការងារនៅកូរ៉េ បានជួយគ្រួសារឱ្យមានជីវភាពប្រសើរ និងបានជួយប្អូនឱ្យរៀនដល់មហាវិទ្យាល័យផងដែរ ។ សាម៉េត ចាត់ទុកការទទួលបានការងារនៅកូរ៉េ ជាកិត្តិយសមួយសម្រាប់គ្រួសារ ក្នុងភូមិមួយដែលមិនសូវមានអ្នករៀនដល់មហាវិទ្យាល័យ ។ លោកបាននិយាយថាទៅធ្វើការនៅប្រទេសកូរ៉េជារឿងល្អមួយ ដោយសារបានបានរៀនសូត្រការងារពីប្រទេសគេ និងទី២ ទីផ្សារនៅកូរ៉េមានតម្លៃខ្ពស់ ដែលអាចឱ្យលោកជួយគ្រួសារនិងខ្លួនបាន ។
ពលរដ្ឋដែលបានទៅធ្វើការនៅសាធារណកូរ៉េឱ្យដឹងថា ប្រាក់ខែពួកគាត់ទទួលបានចន្លោះ ពី ១,៨០០ដុល្លារ ទៅ ២,០០០ ដុល្លារ ។
ស្រីមុំ ដែលបានធ្វើការនៅប្រទេសកូរ៉េម្នាក់ទៀត គាត់បានធ្វើការនៅក្នុងប្រទេសជឿនលឿននេះប្រមាណ ៦ ឆ្នាំ និងបានសន្សំលុយបានប្រមាណជា ៨ ម៉ឺនដុល្លារ ជួយសង់ផ្ទះឱ្យឪពុកម្តាយ និងបានបង្កើតមុខរបរខ្លួនឯងបាន ក្រោយត្រឡប់មកកម្ពុជា ៕
ចែករំលែកព័តមាននេះ