ការកម្រិតបរិមាណនៃការបរិភោគប្រចាំថ្ងៃឱ្យបានត្រឹមត្រូវ នាំលោកអ្នកឱ្យមានសុខភាពល្អរស់នៅបានយូរអង្វែង ។ នេះជាការសន្និដ្ឋានយ៉ាងប្រាកដប្រជាមួយនៃការស្រាវជ្រាវចុងក្រោយធ្វើឡើងដោយមជ្ឈមណ្ឌល
ការកម្រិតបរិមាណនៃការបរិភោគប្រចាំថ្ងៃឱ្យបានត្រឹមត្រូវ នាំលោកអ្នកឱ្យមានសុខភាពល្អរស់នៅបានយូរអង្វែង ។ នេះជាការសន្និដ្ឋានយ៉ាងប្រាកដប្រជាមួយនៃការស្រាវជ្រាវចុងក្រោយធ្វើឡើងដោយមជ្ឈមណ្ឌលវេជ្ជសាស្ត្រអាមេរិក NYU Langone ។ ក្រុមអ្នកវិទ្យាសាស្ត្រទាំងនេះបានអះអាងថា របបអាហារដែលផ្ទុកកាឡូរីកម្រិតទាប មានប្រសិទ្ធភាពទៅលើហ្សែនដែលពាក់ព័ន្ធនឹងវ័យចាស់ អាយុកាលមធ្យម និងការចងចាំ ។
ការសិក្សាដែលគេគ្រោងយកទៅធ្វើបទបង្ហាញក្នុងកិច្ចប្រជុំប្រចាំឆ្នាំមួយដែលរៀបចំនៅទីក្រុងវ៉ាស៊ីនតោននាពេលឆាប់ៗនេះបានពន្យល់ថា របបអាហារដែលផ្ទុកកាឡូរីទាបអាចជួយបញ្ឈប់ការកើនឡើងនិងការធ្លាក់ចុះជាធម្មតាទៅលើកម្រិតសកម្មភាពដែលពាក់ព័ន្ធហ្សែនអាយុវែង ។ នេះមានន័យថា របបអាហារផ្ទុកកាឡូរីតិចដែលបានមកពីកាបូអីុដ្រាតទំនងជាបង្អាក់សកម្មភាពដំណើរវិវឌ្ឍទៅរកវ័យចំណាស់តាមអាយុកាល ក៏ដូចជាបង្អាក់ដំណើរកើតមានបណ្តាជំងឺរ៉ាំរ៉ៃលើពពួកសត្វចិញ្ចឹមកូនដោយទឹកដោះក្នុងនោះក៏មានមនុស្សយើងផងដែរ ។
ទោះជាយ៉ាងណា សាស្ត្រាចារ្យ Stephen D. Ginsberg អ្នកដឹកនាំការស្រាវជ្រាវបានព្រមានថា លទ្ធផលនៃការសិក្សាលើកនេះមិនមែនមានន័យថា ការកំណត់បរិមាណកាឡូរីគឺជាហេតុផលចម្បងនៃយុវវ័យភាពនោះទេ ។ ប៉ុន្តែ ផ្ទុយមកវិញ វាគ្រាន់តែជាការបន្ថែមភស្តុតាងពីតួនាទីរបបអាហារប្រចាំថ្ងៃដែលជួយពន្យារភាពចាស់ទៅតាមអាយុ និងផលប៉ះពាល់ពីជំងឺផ្សេងៗប៉ុណ្ណោះ ។
ការសិក្សាមួយចំនួនក្នុងពេលកន្លងមកបានរកឃើញថា របបអាហារផ្ទុកកាឡូរីទាបអាចកាត់បន្ថយហានិភ័យពីជំងឺបេះដូង ការលើសឈាម និងជំងឺដាច់សរសៃឈាមខួរក្បាលជាដើម ។ ប៉ុន្តែផលប៉ះពាល់របស់ហ្សែនដែលកំពុងរីករាលដាលទៅលើផ្នែកអង្គចងចាំនិងផ្នែកទទួលចំណេះដឹងនៃខួរក្បាលវ័យចំណាស់មិនត្រូវបានបង្ហាញពីមុនមកទេ៕
ចែករំលែកព័តមាននេះ