បាក់មែកឈើគគីរ បណ្តាលឲ្យមនុស្សពីរនាក់រងរបួស
ខេត្តក្រចេះ ៖ បុរសពីរនាក់ជាយោធា និងមេព្រៃនៅស្រុកឆ្លុង បានរងរបួសធ្ងន់ធ្ងរក្នុង ហេតុការណ៍បាក់មែកគគីរសង្កត់ពីលើរោងយាម កាលពីពាក់កណ្តាលយប់ថ្ងៃទី១៤
ខេត្តក្រចេះ ៖ បុរសពីរនាក់ជាយោធា និងមេព្រៃនៅស្រុកឆ្លុង បានរងរបួសធ្ងន់ធ្ងរក្នុង ហេតុការណ៍បាក់មែកគគីរសង្កត់ពីលើរោងយាម កាលពីពាក់កណ្តាលយប់ថ្ងៃទី១៤ ខែមិថុនា ឆ្នាំ២០១៦នេះ។ សេចក្តីរាយការណ៍បានឲ្យដឹងថា ហេតុការណ៍បាក់មែកគគីរចំពីលើរោងយាមរបស់មេព្រៃសង្កាត់ឆ្លូង បានបង្កឲ្យមនុស្សពីរនាក់រងរបួសនេះ មិនមែនជាករណីខ្យល់កន្ត្រាក់នោះទេ។ គឺដោយសារតែដើមគគីរធំមួយដើមនោះចាស់ ទើបបណ្តាលឲ្យមែកធំៗមានសភាពពុកផុយ។ សេចក្តីរាយការណ៍បានឲ្យដឹងថាកាលពីយប់ថ្ងៃកើតហេតុ ក្នុងរោងយាមរបស់មេព្រៃ សង្កាត់និងផ្នែករដ្ឋបាលព្រៃឈើឆ្លូង ដែលធ្វើពីឈើប្រក់ស័ង្កសី មានមនុស្សពីរនាក់បានចងអង្រឹងដេកក្នុងនោះ។
ហើយក៏ត្រូវមែកគគីរធំមួយបានបាក់ធ្លាក់មកសង្កត់ពីលើបណ្តាលឲ្យ បាក់រោងយាម និងបង្កឲ្យមនុស្សពីរនាក់ដែលដេកក្នុងនោះបានរងរបួសធ្ងន់។ បុរសពីរនាក់ដែលជួបហេតុការណ៍នេះត្រូវបានគេស្គាល់ថាឈ្មោះ ច័ន្ទ មូយូជិះ ជាមន្ត្រីរដ្ឋបាលព្រៃឈើសង្កាត់ឆ្លូង និងម្នាក់ទៀតឈ្មោះ លី ម៉េង ជាមន្ត្រីយោធាស្រុកឆ្លូង។
យ៉ាងណាក៏ដោយជាមួយនឹងហេតុការណ៍នេះ ជនរងគ្រោះទាំងពីរនាក់មិនបានរងគ្រោះថ្នាក់ដល់អាយុជីវិតនោះទេ ដោយជនរងគ្រោះទាំងពីរត្រូវសមត្ថកិច្ច បានគាស់ចេញពីក្នុងរោងស័ង្កសីដែលត្រូវបាក់ និងបានបញ្ជូនទៅសង្គ្រោះនៅមន្ទីរពេទ្យឆ្លូងភ្លាមៗ។
ជាមួយនឹងហេតុការណ៍បាក់មែកឈើចំពីលើរោងសង្កត់មនុស្សបណ្តាលឲ្យរងរបួសនេះ បានធ្វើឲ្យមនុស្សមួយចំនួនមានសភាពភ័យតក់ស្លុត តែបើចំពោះអ្នករកស៊ីដឹកឈើវិញ បានសម្តែងការសប្បាយចិត្តទៅវិញ ដោយពួកគេបានលើកឡើងថា រោងឈើដែលរងការធ្លាក់មែកឈើបាក់សង្កត់មនុស្សនេះជារោងកុងត្រូលជជុះ ហើយការបាក់សង្កត់ ក៏ដោយសារតែរងការជេបណ្តាសាពីអ្នកស្រុក និងអ្នករកស៊ីដឹកឈើដែរ៕
ចែករំលែកព័តមាននេះ