ទុនវិនិយោគលើវិស័យសំណង់ក្នុងឆ្នាំនេះមានជាង ៥ ពាន់លានដុល្លារ ធ្លាក់ចុះជាង ៣១% ពីឆ្នាំ ២០២០
- ភ្នំពេញ
រាជធានីភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី ៣០ ធ្នូ ឆ្នាំ ២០២១…
រាជធានីភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី ៣០ ធ្នូ ឆ្នាំ ២០២១ នេះ បានបង្ហាញពីទិន្នន័យសំណង់ទូទាំងប្រទេសមានចំនួន ៤ ៣០៣ គម្រោងមានផ្ទៃក្រឡាកម្រាលសំណង់សរុបជាង ១២ លានម៉ែត្រការ៉េ និងមានតម្លៃប៉ាន់ស្មាន ជាង ៥.៣៣៣ លានដុល្លារអាមេរិក បើប្រៀបធៀបនឹងឆ្នាំ ២០២០ ថយចុះជាង ៣១% ។
របាយការណ៍បានបញ្ជាក់ថា នៅក្នុងគម្រោងវិនិយោគសរុបខាងលើ មានចំនួន ៣៨៨ គម្រោងផ្ទៃក្រឡាកម្រាលសំណង់ចំនួនជាង១០ លានម៉ែត្រការ៉េ ស្ថិតនៅក្រោមសមត្ថកិច្ចក្រសួងរៀបចំដែនដី ដែលមានតម្លៃប៉ាន់ស្មានប្រមាណ ៤.២១៨ លានដុល្លារអាមេរិក បើប្រៀបធៀបនឹងឆ្នាំ ២០២០ ថយចុះជាង ៣៦% ។ ចំណែកសមត្ថកិច្ចរដ្ឋបាលរាធានី ខេត្ត មានចំនួន ៣.៩១៥ គម្រោងមានផ្ទៃក្រឡាកម្រាលសំណង់សរុបជាង ២,៥ លានម៉ែត្រការ៉េ និងមានតម្លៃប៉ាន់ស្មានទុនវិនិយោគជាង ១.១១៤ លានដុល្លារអាមេរិក បើប្រៀបៀបនិងឆ្នាំ ២០២០ កើនឡើងជាង ១% ។
អ្នកអភិវឌ្ឍន៍វិស័យសំណង់ និងអចលនទ្រព្យនៅក្នុងស្រុក ថា ការធ្លាក់ចុះនៅគម្រោងសាងសង់ និងទុនវិនិយោគក្នុងវិស័យសំណង់មានជាង ៣១% នៅឆ្នាំ ២០២១ នេះមិនបានប៉ះពាល់ទៅដល់ការសម្រេចចិត្តរបស់អ្នកវិនិយោគក្នុងបោះទុនបន្តទៀតនៅក្នុងវិស័យនេះឡើយ ។ ឆ្នាំ ២០២២ ខាងមុខអ្នកពាក់ព័ន្ធបានសង្ឃឹមថា វិស័យអចលនទ្រព្យនឹងងើបឡើងវិញបើប្រៀបធៀបនិងឆ្នាំ ២០២១ នោះ ។
លោក វ៉ា វីរៈ នាយកក្រុមហ៊ុន Century 21 Fortuna Investment មានប្រសាសន៍ថា ទោះបីគម្រោងវិនិយោគនៅក្នុងវិស័យសំណង់ធ្លាក់ចុះជាង ៣១% ក៍ដោយ វាមិនបានធ្វើឱ្យប៉ះពាល់ទៅដល់ការសម្រេចចិត្តរបស់អ្នកវិនិយោគក្នុងវិស័យសំណង់នៅឆ្នាំ ២០២២នោះទេ ។ លោកថា សំខាន់ឱ្យតែសេដ្ឋកិច្ចបើកឡើងវិញការវិនិយោគនៅលើវិស័យសំណង់ និងអចលនទ្រព្យនឹងមានការកើនឡើងវិញ ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បាននិយាយថា ចំនួនការចុះបញ្ជីគម្រោងថ្មីនឹងមានការកើនឡើងនៅឆ្នាំ ២០២២ នៅពេលដែលស្ថានភាពល្អ អ៊ីចឹងការសុំច្បាប់ចុះគម្រោងវិនិយោគលើវិស័យសំណង់ និងអចលនទ្រព្យនឹងមានការកើនឡើងនាពេលខាងមុខ ។ លោកថា នៅពេលណាដែលស្ថានភាពកូវីដ ១៩ ស្ងប់នោះ វិស័យសំណង់ និងអចលនទ្រព្យនឹងងើបឡើងវិញ ៕
ចែករំលែកព័តមាននេះ