ខេត្តមណ្ឌលគិរី ៖ បើទោះជាខេត្តមណ្ឌលគិរីសម្បូរភ្នំនិងតំបន់ព្រៃឈើ តែវិស័យកសិកម្មដើរតួនាទីយ៉ាងសំខាន់ ដោយបានទ្រទ្រង់សេដ្ឋកិច្ចប្រជាពលរដ្ឋក្នុងមូលដ្ឋានយ៉ាងល្អប្រសើរ ។ ជាក់ស្តែង ការប្រមូលផលច្រូតកាត់ស្រូវរបស់កសិករនៅខេត្តមណ្ឌលគិរីសម្រេចបានស្ទើរតែ១០០%ហើយ នេះបើយោងតាមការឲ្យដឹងរបស់មន្រ្តីជំនាញ ។…
ខេត្តមណ្ឌលគិរី ៖ បើទោះជាខេត្តមណ្ឌលគិរីសម្បូរភ្នំនិងតំបន់ព្រៃឈើ តែវិស័យកសិកម្មដើរតួនាទីយ៉ាងសំខាន់ ដោយបាន
ទ្រទ្រង់សេដ្ឋកិច្ចប្រជាពលរដ្ឋក្នុងមូលដ្ឋានយ៉ាងល្អប្រសើរ ។ ជាក់ស្តែង ការប្រមូលផលច្រូតកាត់ស្រូវរបស់កសិករនៅខេត្តមណ្ឌលគិរីសម្រេចបានស្ទើរតែ១០០%ហើយ នេះបើយោងតាមការឲ្យដឹងរបស់មន្រ្តីជំនាញ ។ ចំណែកស្រូវនៅសេសសល់មិនទាន់ប្រមូលផល មានស្រូវកណ្ដាលមួយចំនួន និងស្រូវស្រាលតិចតួចបំផុត ដែលគេហៅថាស្រូវបង្កើនរដូវ ជាទូទៅមានរយៈពេលប្រមូលផលយូរជាងស្រូវវស្សាធម្មតា ។
ប្រធានមន្ទីរកសិកម្មរុក្ខាប្រមាញ់និងនេសាទខេត្តមណ្ឌលគិរី លោក សុង ឃាង បានឱ្យដឹងថា នៅសប្ដាហ៍ចុងក្រោយនេះ ផ្ទៃដីដំណាំស្រូវដែលបានប្រមូលផលមាន១៨៩ ហិកតា ដូចនេះសរុបផ្ទៃដីប្រមូលផលរួចហើយក្នុងឆ្នាំនេះ មានជាង២៧.០០០ហិកតា ស្មើនិង៩៧,១៤% ទទួលបានបរិមាណទិន្នផលសរុបជាង៨៦.០០០តោន ដែលមានទិន្នផលជាធម្យមជាង៣តោនក្នុង១ហិកតា ។ លោកបន្តថា ស្រូវស្រាលអនុវត្តការប្រមូលផលបាន៩៨,៦៤% ស្រូវកណ្ដាល៩៥,៥៩% ស្រូវធ្ងន់១០០% និងស្រូវចម្ការរបស់ជនជាតិភាគតិច អនុវត្តការប្រមូលផលបាន១០០%ដូចគ្នា ។
លោក លឹម ស្រេង ប្រធានមន្ទីរពាណិជ្ជកម្មខេត្តមណ្ឌលគិរីបានឲ្យដឹងថា ឆ្នាំ២០២០កន្លងទៅ តម្លៃស្រូវ ចន្លោះពី 800រៀល-980រៀល/1kg តែឆ្នាំ២០២១ តម្លៃស្រូវបានធ្លាក់ចុះនៅត្រឹមចន្លោះពី 785-800រៀល/kg នឹងទើបកើនឡើងបន្តិចថែមទៀតនៅចុងឆ្នាំ គឺបាន800-820រៀល/kg ។ មូលហេតុដែលធ្វើឲ្យតម្លៃស្រូវធ្លាក់ចុះព្រោះក្នុងឆ្នាំ២០២០ មានឈ្មួញប្រមូលទិញមកពីតាមបណ្តា
ខេត្តផ្សេងៗច្រើន ដូច្នេះ តម្លៃមានការប្រគួតប្រជែងខ្លាំង តម្រូវការច្រើន តម្លៃក៏មានការកើនឡើងខ្ពស់ ប៉ុន្តែនៅក្នុងឆ្នាំ២០២១នេះ ព្រោះតែជំងឺកូវីដ១៩ មានឈ្មួញប្រមូលទិញតែ២ក្រុមប៉ុណ្ណោះ ទី១ គឺឈ្មួ្មញពីខេត្តរតនគិរី មានការប្រមូលតិចតិចតួច លុះត្រាតែមានការបញ្ជាទិញពីរោងម៉ាស៊ីនដៃគូររបស់គាត់ ទើបគាត់ចុះមកបញ្ជាទិញស្រូវនៅស្រុកកោះញែក ទី២ ឈ្មួញក្នុងស្រុកកោះញែក (រោងម៉ាស៊ីនហៃវ៉ា) ៕
ចែករំលែកព័តមាននេះ