SME ជាង ៤០ ម៉ឺន ភាគច្រើនមិនទាន់បានចុះបញ្ជីនាំឱ្យពិបាកខ្ចីលុយពីធនាគារ
- ភ្នំពេញ
រាជធានីភ្នំពេញ ៖ នៅប្រទេសកម្ពុជា ត្រូវគេដឹងថា មានសហគ្រាសធន់តូច និងធម្យម SME ប្រមាណ ៤០ ម៉ឺន…
រាជធានីភ្នំពេញ ៖ នៅប្រទេសកម្ពុជា ត្រូវគេដឹងថា មានសហគ្រាសធន់តូច និងធម្យម SME ប្រមាណ ៤០ ម៉ឺន តែស្ថាប័នដែលបានចុះបញ្ជីជាផ្លូវការមានតិចតូចបំផុត ប្រការនេះត្រូវគេមើលឃើញថា ជាផលលំបាកនៅក្នុងការអភិវឌ្ឍវិស័យនេះ មានដូចជាការទទួលបានឥណទានពីធនាគារជាដើម ។
លោក លឹម អូន អគ្គនាយកធនាគារសហគ្រាសធុនតូច និងមធ្យមកម្ពុជាលើកឡើងថា សហគ្រាសធុនតូច និងមធ្យមជាឆ្អឺងខ្នងសេដ្ឋកិច្ចនៅក្នុងប្រទេសកំពុងអភិវឌ្ឍន៍ដូចជា កម្ពុជា ។ អាជីវកម្មជាង ៩០% ជា SME ហើយសហគ្រាសទាំងនោះបានចូលរួមនៅក្នុងការអភិវឌ្ឍសេដ្ឋកិច្ច តាមរយៈការផ្តល់ធាតុចូលនៅក្នុងកំណើនសេដ្ឋកិច្ច និងថែមទាំងចូលរួមផ្តល់នូវឱកាសការងារជាច្រើន ។ តែ SME នៅមានផលលំបាកមួយចំនួននៅក្នុងស្វែងរកឱកាសសម្រាប់អភិវឌ្ឍខ្លួន ។ ផលវិបាកដែលមួយដែលយើងបានដឹងទាំងអស់គ្នា និងសំខាន់ជាងគេនោះ គឺរឿងលទ្ធភាពនៃការទទួលបានហិរញ្ញប្បទានដើម្បីទ្រទ្រង់អាជីវកម្មរបស់គាត់ ។ នេះជាការបញ្ជាករបស់លោក លឹម អូន ។
លោកបានចោទសួរថា ដើម្បីឱ្យ SME ទទួលបានហិរញ្ញប្បទានពីស្ថាប័ននានានៅតាមគ្រឹះស្ថានធនាគារនិងហិរញ្ញវត្ថុតើ SME ត្រូវធ្វើដូចម្តេច ? ។ សួរហើយមន្ត្រីខាងលើឆ្លើយថា «យើងឃើញថា បញ្ហាប្រឈមទីមួយហើយសំខាន់នោះ គឺទាក់ទងការទុកដាក់នូវព័ត៌មានអាជីវកម្ម ។ SME ភាគច្រើនជាអាជីវកម្មលក្ខណៈគ្រួសារ អ៉ីចឹងមិនបានទុកដាក់ព័ត៌មានឱ្យបានសមស្រប ពិសេសព័ត៌មានទាក់ទងការសិក្សាពីលទ្ធភាពសង ពោលគឺព័ត៌មានហិរញ្ញវត្ថុមានដូចជារបាយការណ៍ស្តីពីការកត់ត្រាចំណូល និងចំណាយរួមនិងរបាយការណ៍សាមញ្ញៗមួយចំនួនផ្សេងទៀត ដើម្បីឱ្យខាងធនាគារធ្វើការសិក្សាពីលទ្ធភាពសងមុននឹងផ្តល់ហិរញ្ញប្បទានជូន ។
បន្ថែមពីនេះសហគ្រិន ឬ SME ត្រូវជាបុគ្គលមានការទទួលខុសត្រូវ ពិសេសមានការឆ្លើយតបជាមួយខាងធនាគារ ជាមួយអាជ្ញាធរក្នុងការបង់ពន្ធ និងចុះបញ្ជីជាដើម ។ ទាំងនេះ គឺជាមូលដ្ឋានគ្រឹះដើម្បីផ្តល់លទ្ធភាពឱ្យពួកគាត់ទទួលបាននូវហិរញ្ញវត្ថុពីខាងធនាគារនិងហិរញ្ញវត្ថុ ។
លោក លឹម អូន បានបន្តថា ការមិនទាន់បានបញ្ជីត្រឹមត្រូវរបស់សហគ្រាសទាំងនោះជាឧបសគ្គនៅក្នុងការអភិវឌ្ឍន៍ខ្លួនផងដែរ ។ លោកបានជំរុញឱ្យ SME នៅក្រៅប្រព័ន្ធឱ្យមកចូលមកក្នុងប្រពន្ធ័ស្របច្បាប់ ។ លោកថា រាជរដ្ឋាភិបាលមានយន្តការច្រើនដើម្បីសម្រួលដល់ការងារនេះ ។ ខ្ញុំគិតថា គាត់គួរតែចូលរួមក្នុងការចុះបញ្ជីនេះហើយការងារចុះបញ្ជីរបស់ SME វាក៏សំខាន់ដែរនៅពេលគាត់ចង់អភិវឌ្ឍអាជីវកម្មរបស់គាត់ឱ្យកាន់តែធំហើយបើគាត់ទៅធនាគារក៏គេសួចំណុចនេះដែរថាអាជីវកម្មនេះពិតជារបស់អ្នកខ្ចីមែន ។ ចំណុចទាំងនេះគឺចំណុចសំខាន់មុនគាត់ឈានទៅដល់ការទទួលបានការគាំំទ្រផ្នែកហិរញ្ញវត្ថុពីស្ថាប័ននានា ៕
ចែករំលែកព័តមាននេះ