ភ្នំពេញ៖ នៅថ្ងៃនេះ កម្ពុជាយើង រកឃើញអ្នកឆ្លងកូវីដ១៩ ប្រភេទបំប្លែងថ្មី អូមីក្រុង ចំនួន ១៥នាក់ សុទ្ធតែជាអ្នកធ្វើដំណើរ​ មកពីក្រៅប្រទេស​។ ជាសរុប នៅកម្ពុជាយើង មានអ្នកឆ្លងកូវីដ១៩ ជាប្រភេទអូមីក្រុង ចំនួន ៣១នាក់។ តែមកដល់​ពេលនេះ មាន ៣នាក់ បានជាសះស្បើយ។ នេះបើតាម​សម្តេចតេជោ ហ៊ុន សែន ប្រកាស​ក្នុងពេលទទួលវ៉ាក់សាំង Pfizer ដែលជា​ជំនួយ​របស់​អូស្ត្រាលី នាយប់ថ្ងៃទី២៦ ខែធ្នូ ឆ្នាំ២០២១​។

សម្តេចតេជោ នាយករដ្ឋមន្ត្រី ហ៊ុន សែន បានប្រកាសឲ្យ​ប្រជាពលរដ្ឋទាំងអស់ បន្តការប្រុងប្រយ័ត្ន តែមិនត្រូវស្លន់ស្លោនោះទេ​។ អ្នកជំងឺកូវីដ១៩ បំប្លែងថ្មី អូមីក្រុង ទាំង ៣១នាក់ ចូល​មកកម្ពុជា តាមអាកាសយានដ្ឋានអន្តរជាតិភ្នំពេញ និងនៅខេត្តសៀមរាប។ តែយើងអាចគ្រប់គ្រងបាន ដោយមិនធ្លាយចូលសហគមន៍​នៅឡើយទេ​។

ជាមួយគ្នានោះ សម្តេចតេជោ នាយករដ្ឋមន្ត្រី ហ៊ុន សែន បាន​ប្រកាសថា ក្នុងចំណោម​អ្នកឆ្លងកូវីដ១៩ ទើបរកឃើញ​ថ្មី ប្រភេទអូមីក្រុង ទាំង ១៥នាក់ នៅថ្ងៃនេះ ក៏មាន​កីឡាករជម្រើសជាតិកម្ពុជា ផ្នែក​ការ៉ាត់តេដូ ចំនួន ២នាក់ ដែលជាបេក្ខជន​ ត្រូវប្រឡងបាក់ឌុប នៅមណ្ឌលប្រឡង វិទ្យាល័យបាក់ទូក នៅថ្ងៃទី២៧ ខែធ្នូស្អែក។ តែសម្តេច​បានសម្រេច​ឲ្យ​បេក្ខជន​ទាំង ២នាក់ អាច​ប្រឡង​ពីមន្ទីរពេទ្យ ដែលកំពុងសម្រាកព្យាបាល​ ជំងឺកូវីដ១៩ តែម្តង​៕