ខេត្តព្រៃវែង ៖ កាលពីវេលាម៉ោង១០ព្រឹកថ្ងៃទី២៤ ធ្នូ នេះ រដ្ឋបាលខេត្តព្រៃវែងបានចេញលិខិតកោះហៅអភិបាលស្រុកពោធិ៍រៀង មេឃុំ និងមេភូមិព្រៃកន្លោង ព្រមទាំងប្រជាពលរដ្ឋ២រូបតំណាងប្រជាពលរដ្ឋ១០៨គ្រួសារនៅឃុំព្រៃកន្លោងអោយចូលមកបំភ្លឺពាក់ពន្ធ័និងរឿងមន្ត្រីសុរិយោដីស្រុកពោធិ៍រៀង ចុះទៅវាស់វែងធ្វើប្លង់ដីជាលក្ខណៈប្រព័ន្ធជូនប្រជាពលរដ្ឋ…
ខេត្តព្រៃវែង ៖ កាលពីវេលាម៉ោង១០ព្រឹកថ្ងៃទី២៤ ធ្នូ នេះ រដ្ឋបាលខេត្តព្រៃវែងបានចេញលិខិតកោះហៅអភិបាលស្រុកពោធិ៍រៀង មេឃុំ និងមេភូមិព្រៃកន្លោង ព្រមទាំងប្រជាពលរដ្ឋ២រូបតំណាងប្រជាពលរដ្ឋ១០៨គ្រួសារនៅឃុំព្រៃកន្លោងអោយចូលមកបំភ្លឺពាក់ពន្ធ័និងរឿងមន្ត្រីសុរិយោដីស្រុកពោធិ៍រៀង ចុះទៅវាស់វែងធ្វើប្លង់ដីជាលក្ខណៈប្រព័ន្ធជូនប្រជាពលរដ្ឋ តែបែរជាបាត់ដីរបស់ប្រជាពលរដ្ឋរហូតដល់ទៅ១២៨ក្បាលដីទៅវិញនោះ។
គួររំលឹកផងដែរថា កាលពីថ្ងៃទី០៦ កញ្ញា ២០២១ ប្រជាពលរដ្ឋប្រមាណជាង៣០នាក់ តំណាងអោយប្រជាពលរដ្ឋ១០៨គ្រួសារ បានលើកគ្នាទៅសាលាស្រុកពោធិ៍រៀង ស្នើសុំអោយលោក យស់ ស៊ីណាត អភិបាលស្រុកជួយដោះស្រាយរឿងបាត់ដីស្រែរបស់ពួកគាត់១២៨ក្បាលដី មិនដឹងបាត់ទៅណា ។
ពលរដ្ឋទាំងនោះបាននិយាយថា ដីស្រែរបស់ពួកគាត់ គឺរដ្ឋអំណាចចែកឱ្យតាំងពីឆ្នាំ១៩៨០ ហើយបន្តកាន់កាប់តកូនតចៅរហូតមកដល់ពេលនេះ មិនដែលមានបញ្ហាអ្វីទេ ប៉ុន្តែនៅចុងឆ្នាំ២០២០ ក្រោយពីមន្ត្រីសុរិយោដីស្រុក ចុះវាស់វែងធ្វើប្លង់ជាលក្ខណៈ
ប្រព័ន្ធរួចមក គេបានបិទប្រកាសដើម្បីអោយប្រជាពលរដ្ឋទៅផ្ទៀងផ្ទាត់ ស្រាប់តែពួកគាត់ឃើញថា ដីស្រែរបស់ពួកគាត់ទាំង១០៨គ្រួសារ ស្មើនឹង១២៨ក្បាលដី បានបាត់មិនឃើញនៅក្នុងប្លង់ ដោយអ្នកខ្លះបាត់មួយជ្រុង ខ្លះបាត់ពាក់កណ្តាល ខ្លះដីតូច
បាត់ទាំងអស់តែម្តង មិនដឹងបាត់ទៅណា ហើយដីដែលនៅសល់ក៏ត្រូវបានគេប្តឹងជំទាស់មិនអោយចេញប្លង់ទៀត ទើបពួកគាត់នាំគ្នាប្តឹងទៅលោកមេឃុំ សុំអោយជួយដោះស្រាយ តែមេឃុំដោះស្រាយមិនបាន ទើបនាំគ្នាមកប្តឹងនៅសាលាស្រុកទៀត ដើម្បីអោយលោកអភិបាលស្រុកជួយដោះស្រាយរកដីមកអោយពួកគាត់វិញ។
ក្រោយពីមានប្រជាពលរដ្ឋលើកគ្នាមកសុំអោយជួយបែបនេះ លោកអភិបាលស្រុកក៏ចាត់អោយមន្ត្រីជំនាញចុះស្រាវជ្រាវរយៈពេល2ថ្ងៃ ទើបដឹងមូលហេតុ គឺដីទាំងនោះមិនបានបាត់ទៅណាទេ ប៉ុន្តែត្រូវបានមន្ទីរធនធានទឹកខេត្តព្រៃវែង កាត់បញ្ចូលទៅក្នុងប្លង់ដីបឹងក្រចាប់ ហើយអ្នកប្តឹងជំទាស់មិនអោយចេញប្លង់ដីដែលនីសល់នោះ ក៏ជាមន្ទីរធនធានទឹកដែរ។
ដោយសារដីទាំងនោះ ត្រូវបានគេកាត់បញ្ចូលទៅក្នុងប្លង់ដីបឹងក្រចាប់ តាំងពីឆ្នាំ២០០៩ទៅហើយនោះ អាជ្ញាធរស្រុកពុំមានលទ្ធភាពដោះស្រាយបាន ក៏បញ្ជូនរឿងនេះជូនអាជ្ញាធរខេត្តជាអ្នកដោះស្រាយវិញ ទើបមកដល់ថ្ងៃទី២៤ ធ្នូនេះ រដ្ឋបាលខេត្តបានកោះហៅ ទាំងអភិបាលស្រុក មេភូមិមេឃុំ មន្ត្រីសុរិយោដី និងតំណាងប្រជាពលរដ្ឋ មកកាន់សាលាខេត្ត ដើម្បីប្រជុំនិងដោះស្រាយ។
ក្រោយពេលចូលជួបប្រជុំរយៈពេលជិត២ម៉ោង ជាលទ្ធផល តំណាងប្រជាពលរដ្ឋបានអោយដឹងថា លោក ចាន់ រ៉ាន់ អភិបាលរងខេត្ត បានស្នើសុំអោយពួកគាត់រក្សាភាពស្ងប់ស្ងៀម និងរងចាំមួយរយៈពេលសិន ហើយត្រូវយកឯកសារពាក់ពន្ធ័ទាំងអស់( ថតចម្លង ) មកប្រគល់ជូនអាជ្ញាធរភូមិឃុំ ដើម្បីធ្វើជំរឿនពីសាវតាដីអោយបានច្បាស់ ងាយស្រួលដោះស្រាយ។
ចំពោះចំណាត់ការរបស់អាជ្ញាធរខេត្តបែបនេះ ត្រូវបានខាងតំណាងប្រជាពលរដ្ឋទាំងនោះលើកឡើងថា ជាការលំបាកទៅវិញ ព្រោះក្នុងចំណោមពួកគាត់ទាំងអស់នោះ ភាគតិចណាស់ដែលនៅមានឯកសារដី ដែលរដ្ឋអំណាចចែកអោយកាលពីឆ្នាំ១៩៨០នោះ ឯមួយភាគធំ គឺបាត់អស់ហើយ អ្នកខ្លះភ្លើងឆេះ អ្នកខ្លះវង្វេងបាត់មិនដឹងទៅដល់ណា ព្រោះរយៈពេល៤០ឆ្នាំទៅហើយ ដូច្នេះ ពួកគាត់បានសំណូមពរ សុំអោយខាងអាជ្ញាធរ និងមន្ត្រីជំនាញ ចុះវាស់វែងជាក់ស្តែង ដីគាត់កាន់កាប់ប៉ុណ្ណា វាស់វែងចេញប្លង់អោយគាត់ប៉ុណ្ណឹងទៅ ហើយសុំពន្លឿននិតិវិធីអោយបានលឿនផង។
ដោយឡែក លោក ចាន់ រ៉ាន់ អភិបាលរងខេត្តព្រៃវែង បានអោយដឹងនៅរសៀលថ្ងៃទី២៤ ធ្នូ នេះថា ក្នុងការកោះអញ្ជើញអាជ្ញាធរ មន្ត្រីសុរិយោដី និងតំណាងប្រជាពលរដ្ឋមកកាន់សាលាខេត្តនេះ គឺដើម្បីអោយភាគីទាំងអស់ ធ្វើការបំភ្លឺអោយបានច្បាស់អំពីប្រវត្តិដី សំខាន់គឺរកអោយឃើញថា តើដីទាំងអស់នោះ មានប៉ុន្មានហិកតា ជាដីដែលរដ្ឋអំណាចពីសម័យមុនចែកអោយពលរដ្ឋ ហើយមានប៉ុន្មានហិកតា ជាដីដែលពលរដ្ឋរុករានកាន់កាប់ដោយខ្លួនឯង នៅពេលដែលសិក្សាច្បាស់ហើយ ទើបលោករាយការណ៍ជូនអភិបាលខេត្ត និងសុំគោលការណ៍វាស់វែងធ្វើប្លង់ជូនពលរដ្ឋតែម្តង។
លោកចាន់ រ៉ាន់ បានបញ្ជាក់ថា ក្នុងនាមអាជ្ញាធរខេត្ត គឺលោកមិនអោយប្រជាពលរដ្ឋណាម្នាក់បាត់ដីនោះទេ ហើយក៏ត្រូវតែវាស់វែងចេញប្លង់អោយពួកគាត់ដូចៗគ្នា ប៉ុន្តែដីបឹងដីសាធារណៈរបស់រដ្ឋ យើងក៏ត្រូវតែរក្សាការពារដែរ។
ចែករំលែកព័តមាននេះ