រាជធានីភ្នំពេញ ៖ នៅទីបំផុតផ្លែមៀនប៉ៃលិនរបស់កម្ពុជាត្រូវបានមហាមិត្តចិនសម្រេចចុះមកធ្វើការវាយតម្លៃវិភាគហានិភ័យនៅសប្តាហ៍ទី ១ នៃខែមករា ឆ្នាំ ២០២២ ខាងមុខនេះហើយ មុនធ្វើការនាំចូលទៅទីផ្សាររបស់ខ្លួន ។ ក្រសួងកសិកម្ម រុក្ខាប្រមាញ់និងនេសាទ បានឲ្យដឹងថា ការចរចារបើកទីផ្សារផ្លែមៀនប៉ៃលិនកម្ពុជាទៅកាន់សាធរណរដ្ឋប្រជាមានិចិនកាលពីថ្ងៃទី ២២ ធ្នូ២០២១ ទទួលលទ្ធផលល្អ បានឈានដល់ដំណាក់កាលវាយតម្លៃហានិភ័យដោយចុះពិនិត្យផ្ទាល់នៅចម្ការនិងរោងចក្រវេចខ្ចប់សម្លាប់សមាសភាពចង្រៃ ។
ក្រសួងប្រកាសថា ដើម្បីមានលទ្ធភាពចរចារបើកទីផ្សារឱ្យបានលឿនឈានដល់ការអនុញ្ញាតនាំចូលទៅប្រទេសចិន ចាំបាច់ត្រូវបំពេលក្ខខណ្ឌតម្រូវភូតគាមអនាម័យស្តង់ដារគុណភាព និងសុវត្ថិភាពឱ្យបានពេញលេញដែលទាមទារឱ្យម្ចាស់ចម្ការត្រូវអនុវត្តបច្ចេកទេសដាំដុះ តាមគោលការណ៍នៃការអនុវត្តកសិកម្មល្អ និងត្រូវមានការវិនិយោគសាងសង់រោងចក្រវេចខ្ចប់សម្លាប់សមាសភាពចង្រៃតាមស្តង់ដារ កំណត់ឱ្យបានគ្រប់គ្រាន់ ។ ជាការឆ្លើយតប អគ្គរដ្ឋបាលគយនៃសាធារណរដ្ឋប្រជាមានិតចិនបានយល់ព្រមអនុវត្តដំណើរការវាយតម្លៃវិភាគហានិភ័យលើផ្លែមៀនប៉ៃលិនពីចម្ងាយតាមរយៈប្រព័ន្ធវីដេអូ តាមការស្នើសុំរបស់ក្រសួងកសិកម្មរុក្ខាប្រមាញ់ និងនេសាទដោយមានការចូលរួមចុះត្រួតពិនិត្យផ្ទាល់ពីតំណាងស្ថានទូតនៃសាធារណរដ្ឋប្រជាមានិតចិនប្រចាំនៅកម្ពុជា ។
«ដំណើរការវាយតម្លៃវិភាគហានិភ័យលើផ្លែមៀនប៉ៃលិន គ្រោងនឹងប្រព្រឹត្តិនៅក្នុងសប្តាហ៍ទី ១ នៃខែមករាឆ្នាំ ២០២២ ខាងមុខនេះ ដោយធ្វើការជ្រើសរើសសម្រិតសម្រាំងយកចម្ការមួយចំនួនជាតំណាង និងរោងចក្រវេចខ្ចប់សម្លាប់សមាសភាពចង្រៃដែលបច្ចុប្បន្ននេះមានរោងចក្រតែមួយបានសាងសង់រួចមានទីតាំងនៅក្នុងខេត្តប៉ៃលិន ដើម្បីវាយតម្លៃបញ្ចប់ដំណាក់កាលវិភាគហានិភ័យមុននឹងបន្តនីតិវិធីរៀបចំចុះហត្ថលេខាលើពិធីសារបច្ចេកទេស» ។
លោក ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មធ្លាប់បានឱ្យដឹងថា មៀនប៉ៃលិន ជាដំណាំអាទិ ភាពមួយដែលកន្លមកធ្លាប់នាំទៅទីផ្សារចិនរួចហើយ ប៉ុន្តែនាំចេញដោយប្រយោលតាមរយៈប្រទេសជិតខាងកម្ពជា ។ ដូចនេះបន្ទាប់ពីផ្លែចេក និងផ្លែស្វាយដែលថ្មីនេះទើបទទួលការទទួលស្គាល់ពីទីផ្សារចិន ដូចនេះគោលដៅបន្ទាប់អាចជាមៀនប៉ៃលិននេះហើយ ។
លោកបន្តថា «មៀនប៉ៃលិនជាដំណាំយុទ្ធសាស្ត្រដែលយើងត្រូវសម្លឹងរកទីផ្សាដែលគេចង់បាន គឺទីផ្សារប្រទេសចិន ។ យើងសង្ឃឹម ថានឹងអាចរៀបចំត្រៀមខ្លួនសម្រាប់ករណីនេះ ក៏ប៉ុន្តែការទទួលបានចូលទៅក្នុងទីផ្សារចិន ឆាប់ឬយូរវាអាស្រ័យលើការចរចារអនាម័យ និងភូតគាមអនាម័យដែលក្រសួងកសិកម្មត្រូវធ្វើជាមួយភាគីចិន» ៕
ចែករំលែកព័តមាននេះ