អភិវឌ្ឍ SME មានន័យថា ជំរុញផលិតផលក្នុងស្រុក និងបង្កើតការងារឱ្យពលរដ្ឋ
- ភ្នំពេញ
រាជធានីភ្នំពេញ ៖ មន្ត្រីជាន់ខ្ពស់ធនាគារជាតិ បានលើកឡើងថា សហគ្រាសធុនតូច និងមធ្យម នៅកម្ពុជា (SME) ត្រូវបានប៉ាន់ប្រមាណថា មានប្រមាណ…
រាជធានីភ្នំពេញ ៖ មន្ត្រីជាន់ខ្ពស់ធនាគារជាតិ បានលើកឡើងថា សហគ្រាសធុនតូច និងមធ្យម នៅកម្ពុជា (SME) ត្រូវបានប៉ាន់ប្រមាណថា មានប្រមាណ ៩៩% នៃ SME សរុបបានចូលរួមចំណែកជិត ៦០% នៃផលិតផលក្នុងស្រុកសរុប និងបង្កើតការងារជាង៧០% នៃកម្លាំងពលកម្ម ។
លោកស្រី ជា សិរី ឧបការីទេសាភិបាល និងជាអគ្គនាយកបច្ចេកទេសធនាគារជាតិនៃកម្ពុជា ក្នុងពិធីបើកសន្និសីទម៉ាក្រូសេដ្ឋកិច្ចប្រចាំឆ្នាំលើកទី ៨ ស្តីពី «បញ្ហាប្រឈម និងគោលនយោបាយអភិវឌ្ឍន៍សហគ្រាសធុនតូច និងមធ្យមនៅកម្ពុជា» ដែលធ្វើឡើងតាមអនឡាញ នៅថ្ងៃទី ២២ ធ្នូ ឆ្នាំ ២០២១ បានលើកឡើងថា យោងតាមធនាគារអភិវឌ្ឍន៍អាស៊ី (ADB) សហគ្រាសធុនតូច និងមធ្យមនៅកម្ពុជា ត្រូវបានប៉ាន់ស្មានថា មានប្រមាណ ៩៩% នៃសហគ្រាសសរុប ដែលបានរួមចំណែកជិត ៦០% នៃផលិតផលក្នុងស្រុក និងបង្កើតការងារជាង ៧០% នៃកម្លាំងពលកម្ម ។ SME បានរួមចំណែកយ៉ាងសំខាន់ក្នុងការគាំទ្រកំណើនសេដ្ឋកិច្ចប្រកប ដោយបរិយាបន្ន ព្រមទាំងបានលើកកម្ពស់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋ ជាពិសេសក្នុងចំណោមប្រជាពលរដ្ឋរស់នៅតាមទីជនបទ ។
លោកស្រីបានសង្កត់ធ្ងន់ថា ការអភិវឌ្ឍ SME នឹងរួមចំណែកផងដែរដល់ការពង្រឹងភាពធន់នៃសេដ្ឋកិច្ច តាមរយៈការបង្កើនការផ្គត់ផ្គង់ដើម្បីបំពេញតម្រូវការក្នុងស្រុក ដែលនឹងបន្ថយលើការពឹងផ្អែកលើការនាំចូលទំនិញប្រើប្រាស់មួយចំនួនពីបរទេស និងបានបង្កើតការងារក្នុងស្រុកបន្ថែម ។ មន្ត្រីដដែលអះអាងថា កត្តាទាំងអស់នេះ នឹងគាំទ្រដល់ការធ្វើពិពិធកម្មសេដ្ឋកិច្ចជាតិ ដែលនឹងជំរុញការប្រែក្លាយប្រទេសកម្ពុជាទៅជាប្រទេសចំណូលមធ្យមកម្រិតខ្ពស់នាពេលខាងមុខ ។
ការសិក្សាស្រាវជ្រាវកន្លងមកបានបង្ហាញថា SME នៅកម្ពុជាប្រឈមនឹងបញ្ហាជាច្រើននៅក្នុងអាជីវកម្មដែលជាឧបសគ្គក្នុងការអភិវឌ្ឍប្រកបដោយចីរភាព រួមមានដូចជា ការខ្វះខាតជំនាញគ្រប់គ្រងនិងពលកម្មជំនាញ, ការខ្វះខាតប្រភពទុន និងលទ្ធភាពទទួលបានហិរញ្ញវត្ថុផ្លូវការ, ការខ្វះខាតផ្នែកព័ត៌មានទីផ្សារទាំងក្នុងស្រុកនិងទីផ្សារនាំចេញ, ការប្រកួតប្រជែងពីសហគ្រាសធំៗ និងពីការនាំចូលទំនិញពីបរទេស ជាដើម ។ ក្រៅពីនេះ ការរាលដាលនៃជំងឺកូវីដ-១៩ ចាប់តាំងពីឆ្នាំ ២០២០ មក បានបង្កផលប៉ះពាល់យ៉ាងខ្លាំងដល់ការធ្វើអាជីវកម្មរបស់ SME ទៀតផង ៕
ចែករំលែកព័តមាននេះ