រាជធានីភ្នំពេញ ៖ ធ្យូងនៅតែជាប្រភពថាមពលក្នុងការចម្អិនអាហាររបស់ពលរដ្ឋខ្មែរ ទោះបីជាមានការលើកទឹកចិត្តឲ្យកាត់បន្ថយ ដើម្បីបរិស្ថានក្តី ។ បច្ចុប្បន្នការលក់ធ្យូងជាមុខរបរមួយដែលអាចផ្គត់ផ្គង់ជីវភាពពលរដ្ឋមួយចំនួន ដូចជាលោក សំ ប៊ុនធឿន…
រាជធានីភ្នំពេញ ៖ ធ្យូងនៅតែជាប្រភពថាមពលក្នុងការចម្អិនអាហាររបស់ពលរដ្ឋខ្មែរ ទោះបីជាមានការលើកទឹកចិត្តឲ្យកាត់បន្ថយ ដើម្បីបរិស្ថានក្តី ។ បច្ចុប្បន្នការលក់ធ្យូងជាមុខរបរមួយដែលអាចផ្គត់ផ្គង់ជីវភាពពលរដ្ឋមួយចំនួន ដូចជាលោក សំ ប៊ុនធឿន ជាដើម ។
លោក សំ ប៊ុនធឿន អាយុ ៣៨ ឆ្នាំ ជាអ្នកលក់ធ្យូងអស់រយៈពេល ១២ ឆ្នាំហើយ ។ លោករស់ឃុំរលាំងគ្រើល ស្រុកសំរោងទង ខេត្តកំពង់ស្ពឺ ។ នៅរៀងរាល់ថ្ងៃលោកបានក្រោកពីយប់ដឹកធ្យូងតាមម៉ូតូសណ្ដោងរ៉ឺម៉ក ១ គ្រឿងតែម្នាក់ឯង ចេញពីផ្ទះដើរលក់គ្រប់ច្រកល្ហកនៅក្នុងភូមិសាស្ត្រ រាជធានីភ្នំពេញ ។
បុរសដែលមានកូន ២ រូបនេះនិយាយថា លោកលក់ធ្យូង ចំណែកប្រពន្ធធ្វើការរោងចក្ រ។ ការរកទទួលទានទាំងពីរនាក់ទើបអាចផ្គត់ផ្គង់ជីវភាពគ្រួសារបាន ពិសេសឲ្យកូនៗបានទៅរៀនសូត្រដូចគេដូចឯង ។ លោកបានរៀបរាប់ថា កាលពី ១២ ឆ្នាំមុន កាលណោះលោកមានអាយុ ២៦ ឆ្នាំ លោកធ្វើជាកម្មករសំណង់ ប៉ុន្តែដោយសារតែយ៉ាប់កម្លាំងពេក និងទទួលបានប្រាក់ឈ្នួលមិនសមនឹងកម្លាំង ទើបលោកឈប់ពីគារងារសំណង់ មកចាប់យកមុខរបរលក់ធ្យូងនេះវិញ ។
ធ្យូងដែលលោក ប៊ុនធឿន ដឹកលក់នេះបានទិញពីម៉ូយយកពីខេត្តក្រចេះមក ។ ម៉ូយបានដឹកយកមកឲ្យលោកដល់ម្ដុំភ្នំត្មាតពងព្រំប្រទលខេត្តកណ្ដាល និងខេត្តកំពង់ស្ពឺ ។ លោកទិញធ្យូងម្ដង ១ រ៉ឺម៉ក ទម្ងន់ ១ តោន សម្រាប់ដឹកលក់ ។ ក្នុងបរិមានធ្យូងមួយតោននេះ ជួនកាលលោកលក់តែមួយថ្ងៃអស់ ជូនកាលលក់បីថ្ងៃទើបអស់ ។
អ្នកលក់ធ្យូងខាងលើបានរៀបរាប់ថា រាល់ថ្ងៃខ្ញុំក្រោកពីយប់ដឹកចេញពីផ្ទះទៅដើរលក់ធ្យូងនៅភ្នំពេញ ។ ខ្ញុំដឹកលក់រាយតាមផ្ទះពលរដ្ឋ និងបោះដុំឲ្យម៉ូយលក់បន្តមួយចំណែក ។ បើលក់អស់ ១ តោនអាចរកប្រាក់ចំណេញបានពី ១០ ទៅ ១៥ ម៉ឺនរៀល ។
បុរសអាយុ ៣៨ ឆ្នាំនោះបានរៀបរាប់ទៀតថា មុខរបរនេះពុំស្រួលប៉ុន្មាននោះទេ ត្រូវប្រើកម្លាំងទប់ម៉ូតូសណ្ដោងរ៉ឺម៉កដែលដឹកធ្ងន់ដល់ទៅ ១ តោន ហើយធ្វើដំណើរមួយថ្ងៃៗរាប់រយគីឡូ មានទាំងផ្លូវស្រួល និងលំបាក ។ ពេលខ្លះដើម្បីចូលដល់ផ្ទះអ្នកទិញ ត្រូវបើកចូលផ្លូវតូចចង្អៀតទៀតផង ។ ទោះយ៉ាងណាលោក សំ ប៊ុនធឿន មិនរួញរាលនៅក្នុងរបរចិញ្ចឹមជីវិតនោះទេ ។ លោកថា ជីវិតជាការតស៊ូ បើគិតជាវិជ្ជមាននោះ លោកថា របរបច្ចុប្បន្នេះ ស្រួលជាងការងារសំណង់ដែលលោកធ្លាប់ឆ្លងកាត់ឆ្ងាយណាស់ ៕
ចែករំលែកព័តមាននេះ