ផ្ទះល្វែង ខុនដូ និងអគារការិយាល័យ អាចងើបសន្សឹមៗ
- ភ្នំពេញ
រាជធានីភ្នំពេញ ៖ អ្នករកស៊ីក្នុងវិស័យអចលនទ្រព្យមើលឃើញថា សំណង់ផ្ទះល្វែង ខុនដូ និងអគារការិយាល័យ អាចនឹងងើបឡើងវិញនៅឆ្នាំក្រោយនេះ ។ លោក វ៉ា…
រាជធានីភ្នំពេញ ៖ អ្នករកស៊ីក្នុងវិស័យអចលនទ្រព្យមើលឃើញថា សំណង់ផ្ទះល្វែង ខុនដូ និងអគារការិយាល័យ អាចនឹងងើបឡើងវិញនៅឆ្នាំក្រោយនេះ ។ លោក វ៉ា វីរៈ នាយកក្រុមហ៊ុន Century 21 Fortuna Investment និយាយថា នៅឆ្នាំ ២០២១ បើទោះបីកម្ពុជារងផលប៉ះពាល់ខ្លាំង តែបើគិតពីចំនួនគម្រោងសំណង់ និងទំហំនៃទុនវិនិយោគក្នុងវិស័យសំណង់បង្ហាញថា នៅមានការកើន ។
សម្រាប់ឆ្នាំ ២០២២ លោកជឿជាក់ថា វិស័យសំណង់ និងអចលនទ្រព្យកាន់តែមានភាពខ្លាំងក្លាថែមទៀត ព្រោះនៅពេលថ្មីៗនេះប្រមុខរាដ្ឋាភិបាលបានប្រកាសបិទបញ្ចប់នូវព្រឹត្តិការណ៍ ២០ កុម្ភៈ ឆ្នាំ ២០២០ ដែលជាដំណឹងល្អមួយ ។ ខ្ញុំគិតថា បន្ទាប់ពីចូលឆ្នាំសកល និងចូលឆ្នាំថ្មីប្រពៃណីចិន វៀតណាម ហើយនោះអ្នកវិនិយោគនៅខាងក្រៅនឹងចូលមកកាន់កម្ពុជាថែមទៀត ។ លោក វ៉ា វីរៈ មានក្តីសង្ឃឹមដូច្នេះ ។
តែទោះយ៉ាងណា បើតាមអ្នកជំនាញវិស័យសំណង់ និងអចលនទ្រព្យថា នៅដើមឆ្នាំ ២០២២ វាមិនអាចស្ទុះឡើងដោយកំហុកនោះទេ តែស្ថានភាពវានឹងដំណើរការឡើងជាសន្សឹមៗស្ថិតក្នុងរយៈពេលយូរវាមានភាពកាន់តែប្រសើរឡើង អាចចាប់ពីពាក់កណ្តាលឆ្នាំនិងនៅជិតដល់ចុងឆ្នាំ ២០២២ ។
លោក ឡៅ ទិព្វសីហា រដ្ឋលេខាធិការក្រសួងដែនដី នគរូបនីយកម្ម និងសំណង់បានឱ្យដឹងថា គិតត្រឹមរយៈពេល ១១ ខែឆ្នាំ ២០២១ក្រសួងរៀបចំដែនដី នគរូបនីយកម្ម និងសំណង់ និងរដ្ឋបាលរាជធានី ខេត្ត ក្រុងស្រុក ខណ្ឌ បានផ្តល់លិខិតអនុញ្ញាតសាងសង់ចំនួន ៣.៩២៥ គម្រោង មានផ្ទៃក្រឡាសំណង់ ១២ លានម៉ែត្រការ៉េ កើនឡើង ៣២៧ គម្រោងបើធៀបនឹងកាលពី ឆ្នាំមុនដែលមានចំនួន ៣.៥៩៨ គម្រោងហើយនៅក្នុងរយៈពេល ១១ ខែកន្លងទៅនេះវិស័យសំណង់មានទុនវិនិយោគជាង ៥.២១០ លានដុល្លារអាមេរិក ។
លោកលើកឡើងថា គម្រោងដែលបានស្នើសុំសាងសង់រួមមាន ៖ អគារពាណិជ្ជកម្ម អគារផ្សារ សណ្ឋាគារ សំណង់អគារលំនៅឋានលក្ខណៈបុរី ប្រភេទផ្ទះល្វែង សំណង់អគារ សំណង់គារពហុមុខងារ សំណង់រោងចក្រឧស្សាហកម្មនានា ។ មន្ត្រីបញ្ជាក់ថា វិបត្តិជំងឺកូវីដ ១៩ មិនបានធ្វើឱ្យវិស័យអចលទ្រព្យរងផលប៉ះពាល់ខ្លាំងនោះទេក្នុងឆ្នាំ ២០២១ នេះ ដោយវិស័យនេះនៅតែមានដំណើរល្អប្រសើរ ៕
ចែករំលែកព័តមាននេះ