ខេត្តស្វាយរៀង៖ សមត្ថកិច្ច បានចុះបង្ក្រាបសង្វៀនបញ្ជល់មាន់មួយកន្លែង តែចាប់បានតែម្ចាស់ផ្ទះ និងស៊ុមជ័រ ១ដុំ សម្រាប់ព័ទ្ធធ្វើសង្វៀន។ មហាជន បានលើកឡើងថា នេះគ្រាន់តែបង្អើលយកមុខ ពេលមានអ្នកយកព័ត៌មាន ចុះផ្សាយប៉ុណ្ណោះ។ តាមពិត គឺសង្វៀននេះ បានបើកល្បែងជល់មាន់យូរខែមកហើយ ហើយសមត្ថកិច្ចមូលដ្ឋាន មិនខ្ចីដឹងលឺឡើយ។
ករណីបង្ក្រាបនេះ កើតឡើង កាលពីវេលាម៉ោង ១១ និង ២៥នាទី ព្រឹកថ្ងែទី១៩ ខែធ្នូ ឆ្នាំ២០២១ ក្រោយពីមានការចុះផ្សាយព័ត៌មានពីការបើកវង់ល្បែងជល់មាន់ នៅភូមិតាប៉ោ ឃុំសំឡី ស្រុកកំពង់រោទ៍។ ១ម៉ោងក្រោយមក លោកអភិបាលស្រុក សុច ពិសី បញ្ជាឱ្យកម្លាំងសមត្ថកិច្ចបង្ក្រាបភ្លាមៗ ដោយមិនបង្អង់យូរឡើយ។
បន្ទាប់មក សមត្ថកិច្ចបង្ហើបឲ្យដឹងថា ករណីបង្ក្រាបនេះ គឺដោយមានការចង្អុលបង្ហាញពីលោក សុច ពិសី អភិបាលនៃគណៈអភិបាលស្រុក និងជាប្រធានគណ:បញ្ជាការឯកភាពរដ្ឋបាលស្រុក បានបញ្ជាឱ្យកម្លាំងនគរបាលស្រុកកំពង់រោទ៍ រួមនឹងកម្លាំងប៉ុស្តិ៍នគរបាលរដ្ឋបាលឃុំសំឡី ចុះទៅបង្ក្រាបទីតាំងជល់មាន់មួយកន្លែងនេះ នៅផ្ទះរបស់ឈ្មោះ គាំ ថាវី ភេទស្រី អាយុ៥៦ឆ្នាំ ស្ថិតនៅភូមិតាប៉ោ ឃុំសំឡី ស្រុកកំពង់រោទ៍។
ក៏ប៉ុន្តែពេលកម្លាំងជំនាញ ចុះទៅដល់ ក្រុមអ្នកញៀនល្បែងជល់មាន់ បាននាំគ្នាទៅណា បាត់អស់ទៅហើយ។ សង្ស័យតែ មានអ្នកមើលផ្លូវ ប្រាប់មុន។ ពេលសមត្ថកិច្ច ទៅដល់ ពុំមានឃើញអ្នកជល់មាន់ទេ ឃើញតែស្ត្រីម្ចាស់ផ្ទះ និងសង្វៀនបញ្ជល់មាន់ ដែលរុះមិនទាន់ប៉ុណ្ណោះសូម្បីស្បែកជើង ក៏មិនទុកផង។
ប្រភពបន្តថា កម្លាំងនគរបាល ប្រមូលបានភស្តុតាង រួមមាន ស៊ុមជ័រ ស្នោពណ៌ខ្មៅ សម្រាប់រុំ ធ្វើជារង្វង់មូល សម្រាប់ជល់មាន់មួយដុំប៉ុណ្ណោះ។
កម្លាំងជំនាញនៃអធិការដ្ឋាននគរបាលស្រុកកំពង់រោទិ៍ និងកម្លាំងប៉ុស្តិ៍រដ្ឋបាលឃុំសំឡី បានយកស៊ុមជ័រពណ៌ខ្មៅទាំងនោះ ទៅរក្សាទុកនៅប៉ុស្តិ៍រដ្ឋបាលឃុំសំឡី។
ចំណែកម្ចាស់ផ្ទះបើកសង្វៀនជល់មាន់ ត្រូវកម្លាំងជំនាញ អប់រំ និងឱ្យធ្វើកិច្ចសន្យា ឈប់ឲ្យប្រព្រឹត្តបើកលេងល្បែងជល់មាន់តទៀត ហើយដោះលែងវិញ។
មហាជន លើកឡើងថា ការបើកលេងល្បែងបញ្ជល់មាន់ខុសច្បាប់នេះ គឺដុះស្លែទៅហើយ។ ទីបញ្ចប់ គ្រាន់តែអប់រំ។ គេនៅចាំមើលថ សង្វៀនបញ្ជល់មាន់នេះ ឈប់បានប៉ុន្មានដង្ហើមចង្រឹត៕ វ៉ាន់ ប៊ុនធឿន
ចែករំលែកព័តមាននេះ