រាជធានីភ្នំពេញ ៖ ការដាំដុះប្រភេទស្រូវសរីរាង្គនៅក្នុងខេត្តព្រះវិហារ កំពុងមានសន្ទុះកើនឡើង និងទទួលបានជោគជ័យរយៈពេល ៦ ឆ្នាំចុងក្រោយនេះ ។ គិតមកដល់ឆ្នាំ ២០២១…
រាជធានីភ្នំពេញ ៖ ការដាំដុះប្រភេទស្រូវសរីរាង្គនៅក្នុងខេត្តព្រះវិហារ កំពុងមានសន្ទុះកើនឡើង និងទទួលបានជោគជ័យរយៈពេល ៦ ឆ្នាំចុងក្រោយនេះ ។ គិតមកដល់ឆ្នាំ ២០២១ នេះ ការដាំដុះស្រូវសរីរាង្គក្នុងខេត្តមានកសិករសរុបមាន ៦០០០ នាក់ ស្ថិតក្នុងសហ គមន៍ចំនួន ៣២ ។
លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ បានឱ្យដឹងថា សហគមន៍ដាំដុះស្រូវសរីរាង្គចំនួនទាំង ៣២ បានចុះកិច្ចសន្យាជាមួយក្រុមហ៊ុនចំនួន ៣ ដែលប្រមូលទិញស្រូវសរីរាង្គពីកសិករ ។ បច្ចុប្បន្ននេះក្រុមហ៊ុនទាំងនេះបាននិងកំពុងប្រមូលដឹកជញ្ជូនយកទៅក្រុមហ៊ុនរបស់គេធ្វើការកែច្នៃវេចខ្ចប់ធ្វើការនាំចេញ ។
«ការដាំដុះស្រូវសរីរាង្គបានកំពុងធ្វើឡើងនៅលើផ្ទៃដីសរុប ២៣.០០០ ហិកតា ។ លោក ពឹង ទ្រីដា ឱ្យដឹងបន្តថា ផ្ទៃដីដាំដុះស្រូវធម្មតានៅមានច្រើនជាងផ្ទៃដីដាំដុះស្រូវសេរីរាង្គ ។ ប៉ុន្តែយើងកំពុងជំរុញកសិករធ្វើយ៉ាងម៉េឱ្យប្រជាពលរដ្ឋងាកមកផលិតស្រូវសរីរាង្គដើម្បីចូលរួមថែរក្សាប្រព័ន្ធក្សេតបរិស្ថាននៅក្នុងខេត្តព្រះវិហារ នេះបានល្អ ឱ្យផលិតកម្មកសិកម្មចេញទៅបានស្អាត មានគុណភាព និងបានតម្លៃបន្ថែម ។ នេះបើតាមការបញ្ជាក់របស់លោកប្រធានមន្ទីរកសិកម្មខេត្ត ។
ខេត្តព្រះវិហារ ត្រូវគេដឹងថា ឈានមុខគេក្នុងការដាំដុះស្រូវសរីរាង្គ ដែលមានទីផ្សារល្អនៅបរទេស ។ ស្រូវសរីរាង្គដាំដុះមិនប្រើជីគីមី ដែលធ្វើឲ្យស្រូវមានតម្លៃខ្ពស់ ជាងស្រូវធម្មតា និងអាចរក្សាគុណភាពដីបានល្អទៀតផង ។ លោក ពឹង ទ្រីដា បន្តថា ស្រូវសេរីរាង្គនាំចេញត្រូវឆ្លងកាត់ការវាយតម្លៃយ៉ាងហ្មត់ចត់ លុះណាមានក្រុមហ៊ុនវាយតម្លៃមកពីខាងក្រៅហើយ បើយើងចង់នាំចេញទៅទីផ្សារអឺរ៉ុបទាល់តែមានក្រុមហ៊ុនមានការទទួលស្គាល់ថា ស្រូវរបស់យើងបានធ្វើតាមស្តង់ដាររបស់គេទើបយើងអាចនាំចេញបាន ។
មកដល់ពេលនេះយើងផលិតស្រូវសរីរាង្គទទួលបានជោគជ័យមានរយៈពេល ៦ ឆ្នាំមកហើយ ដោយយើងចាប់ផ្តើមពីដំបូងមានប្រជាពលរដ្ឋ ១០០ គ្រួសារឡើងមកដល់ ៦០០០ គ្រួសារនាពេលសព្វថ្ងៃនេះ ។ ផ្នែកតាមតួលេខប្រជាពលរដ្ឋនេះបង្ហាញបានថា ការដាំដុះស្រូវសេរីរាង្គនៅក្នុងខេត្តមានសន្ទុះកើនឡើងជាលំដាប់ពីមួយឆ្នាំទៅមួយឆ្នាំ ។
លោកឧកញ៉ា សុង សារ៉ន អគ្គនាយកក្រុមហ៊ុន អេមរុរាយស៍ ដែលជាក្រុមហ៊ុនមួយបានចុះកិច្ចសន្យាក្នុងការទទួលទិញស្រូវសរីរាង្គពីកសិករនៅខេត្តព្រះវិហារ សម្រាប់នាំចេញនោះបានបញ្ជាក់ថា រដូវកាលប្រមូលផលស្រូវសរីរាង្គជិតចប់សព្វគ្រប់ហើយ ។ បរិមាណស្រូវដែលក្រុមហ៊ុនលោកទិញពីកសិករបានជិត ១២.០០០ តោន ។ លោកបញ្ជាក់ថា ដូច្នេះការទិញស្រូវសរីរាង្គក្រោមកិច្ចសន្យាកសិកម្មនៅខេត្តព្រះវិហារ នេះសម្រេចបានទៅតាមផែនការរបស់យើង ។ យើងនៅតែបន្តធ្វើការជាមួយគ្នា ថ្វីត្បិតមានការផ្ទុះជំងឺកូវីដ ១៩ មានការអាក់ខានលើការនាំចេញអង្ករខ្លះៗក៏ដោយ គឺយើងនៅតែទិញពីពួកគាត់ទៅតាមការសន្យារបស់យើង ៕
ចែករំលែកព័តមាននេះ