ក្រោយផ្ទុះការភ្ញាក់ផ្អើលរឿងចោរមិនស្គាល់មុខមួយក្រុម បានចូលប្លន់ផ្ទះលោកស្រី អ៊ាន សៀវម៉ី នៅលំនៅឋានមួយកន្លែងក្នុងរាជធានីភ្នំពេញ និងមានការផ្សព្វផ្សាយថា
រាជធានីភ្នំពេញ ៖ ក្រោយផ្ទុះការភ្ញាក់ផ្អើលរឿងចោរមិនស្គាល់មុខមួយក្រុម បានចូលប្លន់ផ្ទះលោកស្រី អ៊ាន សៀវម៉ី នៅលំនៅឋានមួយកន្លែងក្នុងរាជធានីភ្នំពេញ និងមានការផ្សព្វផ្សាយថា ក្រុមចោរបានយកលុយកាក់អស់រាប់សិបលានដុល្លារនោះ សមត្ថកិច្ចប៉ូលិសស្នងការនគរបាលរាជធានីភ្នំពេញ បានចេញសេចក្តីប្រកាសថា ចោរមិនបានយកអស់ច្រើនសន្ធឹកសន្ធាប់ដូចការផ្សព្វផ្សាយព័ត៌មាននោះទេ ។
អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានចេញសេចក្តីបកស្រាយបំភ្លឺព័ត៌មានថា ជុំវិញរឿងរ៉ាវដែលមានមិនស្គាល់មុខមួយក្រុម បានចូលប្លន់ផ្ទះលោកស្រី អ៊ាន សៀវម៉ី កាលព្រឹកថ្ងៃទី ១៩ ខែធ្នូ ម្សិមិញនេះថា តាមចម្លើយរបស់ជនរងគ្រោះបានបញ្ជាក់យ៉ាងច្បាស់ថា មិនមានការបាត់បង់លុយឡើយ គឺបាត់តែខ្សែ.កពេជ្រចំនួន៣ខ្សែតែប៉ុណ្ណោះ ខណៈព័ត៌មានបឋមដែលសារព័ត៌មានក្នុងស្រុកផ្សព្វផ្សាយ គឺថា ក្រុមចោរបានយកលុយជាង១០លានដុល្លារ និងគ្រឿងពេជ្រជាច្រើននោះ ។
អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានបន្តថា «មិនមានការបាត់បង់លុយរហូតដល់ ៩ ឬ ១០លានដុល្លារ ដូចសារព័ត៌មានមួយចំនួនបានចុះផ្សាយនោះទេ» ។ ស្នងការនគរបាលរាជធានីភ្នំពេញ ក៏បានលើកឡើងផងដែរថា ខណៈពេលមានសារព័ត៌មានមួយចំនួនបានចុះផ្សាយទាក់ទងករណីមានមនុស្សមួយក្រុម បានចូលប្លន់ទ្រព្យសម្បត្តិ នៅផ្ទះលោកស្រី អ៊ាន សៀវម៉ី ដោយបានប្លន់យកលុយ និងគ្រឿងអលង្កការ សរុប ចំនួន ១០លានដុល្លារ ស្នងការដ្ឋាននគរបាលរាជធានីភ្នំពេញ សូមធ្វើការបដិសេធចំពោះការចុះផ្សាយពីការបាត់ដ៏ច្រើនលើសលុបនេះ ។
ទន្ទឹមនឹងនោះ អ្នកនាំពាក្យស្នងការនគរបាលរាជធានីភ្នំពេញ បានអះអាងថា ពេលនេះសមត្ថកិច្ចកំពុងតែធ្វើការស្រាវជ្រាវយ៉ាងយកចិត្តទុកដាក់លើករណីនេះ ។
សូមបញ្ជាក់ថា កន្លងមក មហាជន ជាពិសេសអ្នកលេងបណ្តាញសង្គមតែងតែបានឃើញ លោកស្រី អ៊ាន សៀវម៉ី ដែលមានងារជាឧកញ្ញា និងជាស្រីស្អាតសាច់សខ្ចី ដូចម៉ែសំឡី ផ្សព្វផ្សាយលក់ឡេស្បែក តែងតែបង្ហាញនូវឈុតគ្រឿងអលង្ការពេជ្រពាក់ស្រោចខ្លួន និងធ្លាប់បានផ្លែផ្កាជាមួយសេដ្ឋិនីលក់ឡេធំមួយទៀតនៅស្រុកខ្មែរ រឿងអួតបង្ហាញតម្លៃគ្រឿងពេជ្រតម្លៃរាប់សិបម៉ឺន និងរាប់សែនដុល្លារកន្លងមក ៕
ចែករំលែកព័តមាននេះ