រាជធានីភ្នំពេញ ៖ កម្ពុជា-អាមេរិក គ្រោងចុះហត្ថលេខាលើកិច្ចព្រមព្រៀង លើគម្រោងផ្តល់ហិរញ្ញប្បទានឥតសំណងប្រមាណ ៣០០ លានដុល្លារអាមេរិក នៅក្នុងត្រីមាសទី ១ ឆ្នាំ ២០២២ សម្រាប់គាំទ្រដល់វិស័យអាទិភាពរបស់កម្ពុជាដែលមានរយៈពេល ៥ ឆ្នាំ ។ជំនួយនេះប្រកាសពេលដែលលោក ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា បានជួបជាមួយ លោក w. Patrick Murphy ឯកអគ្គរដ្ឋទូតអាមេរិក ប្រចាំកម្ពុជា នៅថ្ងៃទី ១៦ ខែធ្នូ ឆ្នាំ ២០២១ ។
ភាគីទាំងពីរបានពិភាក្សាលើវឌ្ឍនភាពសម្រេចបាននៃកិច្ចសហប្រតិបត្តិការអភិវឌ្ឍន៍ទ្វេភាគី និងសេចក្តីព្រាងកិច្ចព្រមព្រៀង ស្តីពីហិរញ្ញប្បទានសហប្រតិបត្តិការអភិវឌ្ឍន៍ឆ្នាំ ២០២១-២០២៥ រវាងកម្ពុជា និងអាមេរិក ដែលគ្រោងនឹងបញ្ចប់ការចរចា នឹងត្រៀមចុះហត្ថលេខាក្នុងអំឡុងត្រីមាសទី ១ ឆ្នាំ ២០២២ ខាងមុខ ។
តាមសេចក្តីប្រកាសរបស់ក្រុមប្រឹក្សាអភិវឌ្ឍន៍កម្ពុជា «កិច្ចព្រមព្រៀមនេះ រដ្ឋាភិបាលនៃសហរដ្ឋអាមេរិក គ្រោងផ្តល់ហិរញ្ញប្បទានឥតសំណងប្រមាណ ៣០០ លានដុល្លារអាមេរិក សម្រាប់គាំទ្រដល់វិស័យសុខាភិបាល, អប់រំ, កសិកម្ម និងបរិស្ថាន ក្នុងរយៈពេល ៥ ឆ្នាំ ។ បន្ថែមលើនេះ ភាគីទាំងពីរ ក៏បានពិភាក្សា និងផ្លាស់ប្តូរយោបល់លើប្រធានបទពាក់ព័ន្ធមួយចំនួនដូចជា ផលប៉ះពាល់នៃជំងឺកូវីដ-១៩, ការជំរុញវិស័យពាណិជ្ជកម្ម និងការនាំចេញ-នាំចូល រវាងប្រទេសទាំងពីរ បរិស្ថាន, កសិកម្ម, សន្តិសុខស្បៀង និងអាហារូបត្ថម្ភ និងការធ្វើជាប្រធានប្តូរវេនអាស៊ានរបស់កម្ពុជាក្នុងឆ្នាំ ២០២២» ។
លោក w. Patrick Murphy ឯកអគ្គរដ្ឋទូត បានវាយតម្លៃខ្ពស់ ចំពោះកិច្ចប្រឹងប្រែងរបស់រាជរដ្ឋាភិបាលកម្ពុជា និងវឌ្ឍនភាពសម្រេចបានក្នុងកិច្ចអភិវឌ្ឍន៍កម្ពុជា ពិសេសការគ្រប់គ្រងបានល្អប្រសើរនៃការឆ្លងរាលដាលជំងឺកូវីដ-១៩ នៅកម្ពុជា និងការសម្រេចតាមផែនការក្នុងការចាក់វ៉ាក់សាំងកូវីដ-១៩ ជូនដល់ប្រជាជនកម្ពុជា និងជនបរទេសដែលកំពុងរស់នៅ និងធ្វើការងារក្នុងប្រទេសកម្ពុជា ។
សូមជម្រាបថា នៅកំលុងពេលនៃការរាលត្បាតជំងឺកូវីដ ១៩ នេះ អាមេរិក បានផ្តល់ការគាំទ្រទាំងផ្នែកបច្ចេកទេស និងហិរញ្ញវត្ថុ សម្រាប់វិស័យសុខាភិបាល និងផ្នែកផ្សេងទៀតប្រមាណ ១៥ លានដុល្លារ និងវ៉ាក់សាំងកូវីដ-១៩ (Johnson & Johnson) ចំនួនប្រមាណ ១,០៦ លានដូស ដល់កម្ពុជា សម្រាប់គាំទ្រដល់វិធានការឆ្លើយតបនឹងជំងឺកូវីដ-១៩ និងវិធានការស្តារសង្គម-សេដ្ឋកិច្ចរបស់រាជរដ្ឋាភិបាលកម្ពុជា ៕
ចែករំលែកព័តមាននេះ