រាជធានីភ្នំពេញ ៖ ផ្ទះល្វែងស្តុកទំនិញមួយកន្លែងត្រូវបានឆាបឆេះសន្ធោសន្ធៅដែលសង្ស័យបង្កឡើងដោយឆ្លងចរន្តអគ្គិសនី ហើយពុំបានបណ្ដាលឲ្យមានមនុស្សស្លា.ប់ ឬរងរបួសនោះទេ ។
ខណៈនោះកម្លាំងអាជ្ញាធរ និងសមត្ថកិច្ចខណ្ឌពោធិ៍សែនជ័យព្រមទាំងរថយន្តពន្លត់អគ្គិភ័យជាច្រើនគ្រឿងបានចេញអន្តរាគមន៍ពន្លត់ភ្លាមៗទើបរលត់ទៅវិញ ហើយការខូចខាតរាប់ម៉ឺនដុល្លារ ។
ហេតុការណ៍នេះ បានកើតឡើង កាលពីវេលាម៉ោង១២និង៣០នាទីថ្ងៃត្រង់ ថ្ងៃទី១៦ ខែធ្នូ ឆ្នាំ២០២១ នៅតាមផ្លូវលេខ៣៨អឺ៤ ក្នុងភូមិត្រពាំងល្វា២ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពពីអ្នកដែលស្ថិតនៅជិតកន្លែងកើតហេតុនោះបានឲ្យដឹងថា នៅមុនពេលកើតហេតុពួកគាត់ធំក្លិនឈ្ងៀមយ៉ាងខ្លាំង បន្ទាប់មកក៏បានឃើញផ្សែងហុយចេញពីក្នុងផ្ទះល្វែងខាងលើ យ៉ាងឃ្មួលខ្មាញ់ព្រមទាំងលាយឡំជាមួយអណ្ដាតភ្លើងផងដែរ ។ ខណៈនោះបានបង្កឲ្យមានការភ្ញាក់ផ្អើលយ៉ាងខ្លាំង ហើយបាននាំគ្នាយកបំពង់ពន្លត់អគ្គិភ័យពីតាមផ្ទះរៀងៗខ្លួនទៅជួយបាញ់ពន្លត់ រីឯអ្នកខ្លះប្រើទុយោបាញ់ពន្លត់ដែរ ។ ប៉ុន្តែបាញ់អស់ជាច្រើនបំពង់នៅតែមិនរលត់ឡើយ ក្រោយមកក៏បានរាយការណ៍ជូនអាជ្ញាធរសុំឲ្យជួយអន្តរាគមន៍ ។
នគរបាលបាននិយាយថា នៅពេលមានអគ្គិភ័យកើតឡើងអ្នកភូមិបាននាំគ្នាជួយពន្លត់តែមិនឈ្នះ ចំណែកកម្លាំងគណៈបញ្ជាការឯកភាពខណ្ឌពោធិ៍សែនជ័យបានចេញអន្តរាគមន៍ភ្លាមៗផងដែរ ។
បន្ទាប់មកបានផ្ដល់ព័ត៌មានដល់នគរបាលការិយាល័យបង្ការ និងសង្គ្រោះពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញ ដើម្បីជួយពន្លត់ ។ ពេលនោះរថយន្តពន្លត់អគ្គិភ័យជាច្រើនគ្រឿងបានចេញទៅពន្លត់ភ្លើងរហូតរលត់ទៅវិញទាំងស្រុង ហើយភ្លើងបានឆេះដល់ផ្ទះដែលស្ថិតនៅជាប់គ្នានោះខ្លះៗផងដែរ ៕
ចែករំលែកព័តមាននេះ